MIINIIÑ 14 - NITI GONTU N.T. (BSI)

Ikonium ho

¹ Siisi Ikonium ho mohlu tongepa Jew atañka sinagog ho ahtii, ho lutii hopa abuje miyu taropa henje nyatii, Jew atañ la Grik atañ tonyeru hokii

² Hojalo henjemanii Jew atañ Midomiyu atañmi luru biido ho mohluka ahha ho iimmyo niibiido anubarmii atañmi chekho dopa.

³ Hopa mohlu dakañtii myodu abuje, haropa Attohpa lubiidola, mohlu haki pa lyila miitii aroh-aya ka aguñpa, mohluka alah lo kagiñnanii ho kahotamo miigo miike nembii dola.

⁴ Hojalo citi daka miyuatañ tache ritii; tonge Jew atañ agiñho datii, ho tonge kiiniñkonii atañ agiñho.

⁵ Midomiyu atañ la Jew atañ, mohluka sangiinii agiñho miidupa miikele, mohlumi miipyu dupa ho mohlumi yalañ kupa,

⁶ mohlu hiimi chimpa lala ho Laistra la Derbe ho hargiitii, Licaonia daka citi atañ ho, ho aruñare daka ganda atañ ho;

⁷ ho hiiko mohlu ayapuyu mi tonsḛr khenyotii.

Listra La Derbe Ho

⁸ Siisi Laistra ho miyu kone dutii, huna mohka alih mi miitaluta lama tiinii; mo bubii jaho hokii liichatii, huna ronge hetrḛ ila matiinii.

⁹ Mo Pol ka luniiñmi tala dutii; ho Pol, mohmi kaniila kadi biido ho mohko miipya lado pa henje giido hiila kapa lala,

¹⁰ lutii goropa, “Gurito denki niika alih lo.” Ho mo tusḛr lala ho intii.

¹¹ Ho miyuatañ Pol ka miiniiñmi kapa lala, mohlu aguñlo mohlu gyutii, Likonium ho lubiidola, “Ngunu ko pinii atañ todoke miyu atañka kapu pa!”

¹² Barnabas mohlu Zeus, ho Pol, mi gyotii niimpalukoda mo bukuñ lugii niipa datii, mohlu Harmes mi gyotii.

¹³ Ho Zeus daka nyibu, huka piniiude na citi ka hata dalyi dotiinii, siihhiibo la apoolalu khelii nansa nii biiliitii hagyaho ho miyuatañ agiñho membi nala hentii.

¹⁴ Hojalo kiiniñkonii Barnabas la Pol nyi siimi tapa lala, mohlu mohluka abitarii mi sarche siitii ho miyuatañ agiñho harliñtii, gyubii dola,

¹⁵ “Miyu atañ, niimpa nunu siimi miidu? Ngunu tiirḛ miyu kiike, nunuka henju ahiñ, ho nunupa ayapuyu balii bila, niimpalukoda nunumi siika piigo amanii drih atañ hokii turnii Pinii ko ahkur kiine dukupa huna dariiganda la kiiddiapiñ ho siimie ho hikha hoka danii atañmi putiinii.

¹⁶ Bilo ka santuñ atañmi mo hikha ganda atañmi mohluka atoh henko indo pa miitii;

¹⁷ hojalo mo apa siima atohmi haki bimapa, niimpalukoda mo aya miigo miitii ho nunumi dariiganda hokii miido hudopa ho myodu myolo mi bitii, nunuka ahha atañmi hempyo ho diigo mi bitii.”

¹⁸ Siika aguñlo mohlu lutiñtii miyu atañmi mohlumi ka membi paka miiniiñmi.

¹⁹ Hojalo Jew atañ hiiko ahtii Antiok la Ikonium hokii; ho miyu atañmi lurutii, mohlu Pol mi yalañ kutii ho mohmi citi ka agoho sepa lintii, hentii mo shiido ku hiila.

²⁰ Hojalo henjeajiñ atañ mo agiñho dakuñ kiile, mo guritii ho citi ho ahtiiku; ho allo lohe yaho mo Barnabas ka agiñho Derbe ho intii.

Mohlu Siria ka Antiok ho Ahkur tiiku

²¹ Mohlu ayapuyu mi hiika citi atañ ho tonsḛr khenyo lala ho abuje henjeajiñ miibiido, mohlu Laistra la Ikonium ho Antiok ho ahkur tiiku,

²² henjeajiñ atañka yallo mi alḛr lupa lala, mohlumi henje mi haro lupatii, ho lubiido abuje hentḛrkanyi loke ngunu Pinii ka raddeganda ho ahkiñ donii.

²³ Ho mohlu mohlupa amiabañ kahe tiiku gyoliñkonii penge abi hokii, kuniiñ ho nyobiidola dola, mohlu mohlumi Attoh ko tiilii bitii humina mohlu henje tiinii.

²⁴ Ho mohlu Pisidia mi impo biitii, ho Pampilia ho ahtii.

²⁵ Ho mohlu Perga ho aguñ luko kula la, mohlu Attalia ho totii;

²⁶ ho hiiko hokii mohlu Antiok ho khobotii, hiiko mohlu Pinii ka aroh-aya mi assañdiilañ tii nii mina mohlu miipe tiinii.

²⁷ Ho mohlu ahchi biila, mohlu tongepa gyoliñkonii mi dakuñ giitii ho lukotii hikha Pinii ka mohlumi ka miiniiñmi, ho niihtañpa mo alyeh miiko bitii Midomiyu atañmi henje dopa.

²⁸ Ho mohlu diiriihe myodu datii henjeajiñ atañ agiñho.