MIINIIÑ 12 - NITI GONTU N.T. (BSI)

Abuyapa ka Miihimiirenii

¹ Hiika myodu ho Herod radde hempḛr uro payagaya la miitii gyoliñkonii agiñ hoka dabo nii atañmi.

² Mo Jon ka anu Jems mi mentii ilyo la;

³ ho mo siika miiniiñ Jew atañmi hempyo miipa do kala lala, mo Pitar mitrḛ latu dupa intii. Siikasi Ipomiiyo manii Yatañ dituñ allo myodu ho.

⁴ Ho mo mohmi latu lala, mo mohmi patiihude ho tuntii, ho mohmi tompe dagur biinii sipahi nembitii mohmi dagur biiniipa, hiila hela Impobiiniiñ dituñ soku lala mohmi miyuatañ ko lingii talyi hiila.

⁵ Hopa Pitar mi patiihude ho atiitii; hojalo uropa kuniiñ mi kubila mohpa Pinii kokii miitii gyoliñkonii atañ.

Pitar mi Pattiih ude Hokii Ago Lingii tiiku

⁶ Hiika ayoh jaho Herod ka mohmika ago hoka lingii dupa miido jaho, Pitar dagur biinii anye ka punko imila dokele, dachañ ranyi sonye lo rako tola, ho sipahi alyeh ho patiihude mi dagur biitii;

⁷ ho kato, Attoh ka miidopopi ahtii, ho patiihude ho hutoh byohatii; ho mo Pitar mi aruñho hinne lala ho mohmi ahutii, lubiidola, “nyibya pa gurito.” Ho dachañ ranyi hii mohka alah hokii hupa lyutii.

⁸ Ho miidopopi mohmi lutii, “Abitarii giito ho niika nyotananii mi giito.” Ho mo hiila miitii. Ho mo mohmi lutii, “Niika pulye mi payu giila ho ngiimi imbo monto.”

⁹ Ho mo agoho lintii ho mohmi imbomontii; mo hang chimatii niihna miidopopi miitiinii hii jije hiila, hojalo mo hentii mihu kappatii hiila.

¹⁰ Mohlu kapyo la anyenii dagur bomi impo kula la, mohlu dachañ hagya ho lichi tiiku citi hoka lingii ko. Hiika hii mohlupa atoh atoh pa miiko bitii, ho mohlu hopa lintii ho lembo byahe pa impo biitii; ho ohepada miidopopi mohlumi apatela intiiku.

¹¹ Ho Pitar mo atohpa ahla. Ho lutii, “Siisi ngo hendḛr doku Attoh mohka miidopopi mi kiiniñtii ngiimi tupya dupa, Herod ka alah hokii ho hikha Jew miyu atañka hemmyo nii hokii.”

¹² Mo siimi hendḛr lala, mo Mary ka ude ho intii, Jon ka annii ko humina Mak hiila myantiinii, nohna abuje tongepa dakuñ dala ho kunya tiinii.

¹³ Ho hagya daka alyeh mi padiñ kiile, nyimii miira Roda hiiniiñbo lintii lukodupa.

¹⁴ Pitar ka aguñmi tala la, hempyo la mo hagya mi miiko matii hojalo hakur habiila ho lukotii Pitar hagya si da hiila.

¹⁵ Mohlu mohmi lutii, “No rundu pa.” Hojalo mo luti lukañtii hiila ke du. Mohlu lutii, “Siikasi mohka miidopopi ke!”

¹⁶ Hojalo Pitar padiñ pakañtii; ho mohlu miiko kiile, mohlu mohmi kapa lala ho hemur nyatii.

¹⁷ Hojalo mohlumi mohka alahlo miikiñ biidola aduyo lutii, mo mohlumi lukotii niihtañpa Attoh mohmi patiihude hokii lingii tiiku. Ho mo lutii, “Siika siimi Jems mi ho anubarmii atañmi lukoto.” Ho mo intiiku ho pongelya gandaho intii.

¹⁸ Siisi allo kukele, hiiko hempḛr hemur nyatii sipahi atañ niihna Pitar ko lyitiinii.

¹⁹ Ho Herod mohmi mekele ho mohmi mepa matii, mo dagur biinii atañmi taka tara lala ho mohlumi shiido pa miito hiila lubiido. Ho mo Judia hokii Kaesarea ho totii, ho hiiko dutii.

Herod ka Shiiniiñ

²⁰ Siisi Herod Tayer la Sidon nyika miyu atañmi hadiitii; ho mohlu tonge pa mohko ahtii, ho Blastus mi lyarpyotii, radde kiimi ka kalya binii, mohlu chimie bipe hiila kutii, niimpalukoda mohluka ganda hii radde ka ganda mi hentiñ tii diigopa.

²¹ Khiibi tola ka donii allo ho Herod mohka radde guju mi giitii, mohka radde duko ho dutii, ho mohlumi lutii.

²² Ho miyuatañ gyutii, “Aguñ si pinii kii, ho miyu kiima!”

²³ Ohepada Attoh ka miidopopi mohmi hitii, niimpalukoda mo Pinii mi assañdiilañ bimatii; ho mo tiho atañlo diikotii ho shiitii.

²⁴ Hojalo Pinii ka aguñ hii sanchatii ho impyainsatii.

²⁵ Ho Barnabas la Sol nyi Jerusalem hokii ahkur tiiku mo anye ka miigomi miija tekula, mo anye ka agiñho Jon mi ahta giitii humi na Mak hiila myantii nii.