MIINIIÑ 10 - NITI GONTU N.T. (BSI)

Pitar la Kornelius

¹ Kaesarea ho miyu kone dutii Kornelius armyañ, sipahi sabii paka danii Italian Kohort hiila ka luniiñ,

² henje nii miyu huna Pinii mi biiso donii hikha mohka uru atañ, hapumibya biidola miyu atañmi hembyuñ tii, ho kiirañ Pinii mi kutii.

³ Alyiñdalyi ka gunta tahiñniiho mo hempḛr kadḛr pa mihu kappatii Pinii ka miidopopi ahla ho mohmi lubiido, “Kornelius.”

⁴ Ho mo mohmi kadi biido biiso biidola, ho lutii, “Siikasi nii, Attoh?” Ho mo mohmi lutii, “Niika kuniiñ ho niika biliñkeliñ nii Pinii ko lohepa hempa hegiñ naniipa chachi doke.

⁵ Ho siisi Joppa ho miyu atañmi kiiniñto, ho Saimon Pitar luniiñ bomi ahgii;

⁶ mo Saimon agiñ hoke dunii, alyopyunii, siimie aruñhoka ude doniibo.”

⁷ Miidopopi mohmika luriibo inke kiile, mo mohka miira anye mi gyolii tii ho henjenii sipahi kone mohmika kalyala danii apur hokii,

⁸ ho hikha drih mi mohlumi luko lala, mo mohlumi Joppa ho kiiniñ biido.

⁹ Allo lohe yaho, mohlu mohluka myodi ila dokele ho citi aruñho ahchi kiile, Pitar ude ka ayoh ho chatii kudu pa hiila, allo liipa ka gunta talyañlenye ho.

¹⁰ Ho mo hayatii ho ngoya ako diinala hentii, hojalo mohluka miimyo laka doho, mo mihu katii

¹¹ ho mo yapuñ mi ngeko dopa kapa biido, ho drihkone todopa kapa biido, kakoho hempḛr pulye beropa, nyetañ taperulo kiiddi ho jolo tii.

¹² Hiiko kapane achu-amyo atañ dotii ho tabutiyyo atañ ho yapuñ hoka gonii piita atañ.

¹³ Ho hiiko aguñ gonge tapatii, “Gurito, Pitar, mela la diito.”

¹⁴ Hojalo Pitar lutii, “Ma, Attoh; niimpalukoda ngo ronge hetrḛ diikama miibḛrniimi malo kachomi.”

¹⁵ Ho hiira ronye niipa mo aguñ tapatii, “Nii mi Pinii darii miitii, hiimi no miibḛrnii hiila luyo.”

¹⁶ Siika lyiniiñ si rohiñhe lyitii, ho drih mi ohepada yapuñ ho chagii datii ku.

¹⁷ Siisi Pitar ahha ura ho hendḛr lamatii mohka mihu kapa niisi niihiisa niimipe hiila, kato, Kornelius ka kiiniñ nii miyu, Saimon ka ude mi tajo biila, hagya ho datii

¹⁸ ho gyola lala takatii Saimon Pitar luniiñbo so ha dunii hiila.

¹⁹ Ho Pitar ka mihu kanii mi hela dorañpa, Yajiyallo mohmi lutii, “Kato, miyu midiñ hinge niimi mela doke.

²⁰ Gurito ho tonge, ho mohluka agiñho imbo monge henkohempe tama pa; niimpalukoda ngoke mohlumi kiiniñ tiinii.”

²¹ Ho Pitar tobo montii miyuatañ agiñho ho lutii, Ngo ha humina nunu medunii; nii pape nunuka ahniiñsi?

²² Ho mohlu lutii, Kornelius, sipahi sabii, denki ho Pinii mika biisonii miyu, huna hikha Jew ganda loka khiikonii, darii miidopopi lo luko kotola niipa kiiniñtii mohka ude ho ahgii hiila, ho niika lusaniimi tadupa

²³ hopa mohlu mohmi nyibopa gyotii. Allo lohe yaho mo mohluka agiñho imbo montii, ho Joppa hoka anubarmii tonge mo agiñho imbo montii.

²⁴ Ho allo lohe yaho mohlu Kaesarea ho ahtii. Kornelius mohlu ahkiñ do hiila hembii tola ho mohka henii-myanii ho ajiñ arañ atañmi gyotii.

²⁵ Pitar ahkele, Kornelius mohmi kariitii ho mohka liidi ho giihila ho mohmi heriitii.

²⁶ Hojalo Pitar mohmi seri biido, lubiidola, “Guritoku; ngotiirḛ miyu kone siike.”

²⁷ Ho mo mohmi luriila dopa, mo ura ho ahtii ho abuje miyu dakuñ dopa kappatii;

²⁸ ho mo mohlumi lutii, “Nunu miilañru chindo siikasi niimpa ayamapa lyido Jew kone khiibe ganda miyu mika kariiniisi; hojalo Pinii ngiimi kakiñtii ngiimi kone mitrḛ miibḛrnii malo kacho luyo hiila.

²⁹ Hopa ngiimika gyolyiho, ngo ma lumapa ahdu. Ngo taka du niimpa ngiimi nunu gyodu.”

³⁰ Ho Kornelius lutii, “Allo lope daku lala, siika myodu jaho, ngo ngiika gunta talyañlenye hoka kuniiñ mi kula dokele ngiika udeho; ho kato, miyu kone puloo pulye giitola ngiika agiñho dari,

³¹ lubiidola, ‘Kornelius, niika kuniiñ mi tapa tiike ho niika binii keniiñ mi Pinii hataho hempa doke.

³² Joppa ho Kiiniñto takabiidola gyoke nento Saimon mi humina Pitar ludunii; mo Saimon ka ude hoke dunii, alyopyunii, siimie aruñho.’

³³ Hopa ngo nyibya loda niimi gyobii hiila kiiniñto, ho no hela la so ahdo. Siisi hopa ngunu miilañru Pinii ka kata ho du, tadupa hikha Attohka niimika luniiñmi.”

Pitar ka Luniiñ

³⁴ Ho Pitar mohka aguñmi gonko rila luritii ho lutii: “Jijeloda ngo helatii Pinii ko khiingu khiire nyima ke,

³⁵ hojalo ganda ponge abi hujalo mohmi biiso talyi ho miidi komi miichi hiimi larii doke.

³⁶ Nunu chindo aguñmi nii mina Isrel ho kiiniñ tiinii, chimie ka ayapuyu mi Jisu Kristo kiila (mo miilañruka Attoh),

³⁷ aguñ nii mina hikha Judia ho gyuko biinenii, Galili hokii gyuri biila Jon ka baptisma lanii mika tonsḛr bii hokii:

³⁸ niihtañpa Pinii Nazaret daka Jisu mi arrḛyartiiku Darii Yajiyallo agiñho ho harchichikelo; niihtañpa mo aya miigo miijola ho miipya la miilañrumi hutiina hensḛrkadu la igii ko dotiinii, niimpalukoda Pinii mo agiñho dabo montii.

³⁹ Ho ngunu haki pa lyido hikha anyeru ganda Jew atañ kala ho Jerusalem hoka miiniiñmi. mohlu mohmi shiidopa miibiine sannii ho leda lala;

⁴⁰ hojalo Pinii mohmi allo lohiñ niiho seri tiiku ho mohmi kakiñ siidopa miitii;

⁴¹ hikha miyuatañ mima hojalo ngunumi humina Pinii kahe tiinii hakipa, huna diibo tambo tiinii mo agiñho mohka shiiniiñ hokiika turiturku lyikuho.

⁴² Ho mo ngunumi miyu atañmi tonsḛr tote hiila lune, ho pyako tote hiila mo Pinii ka kaheniike turnii ho shiinii mika ayakacho kaniipa.

⁴³ Mohmi hikha nyibuhenii atañ tiirḛ haki bine hujalopa mohmi henje talyi ingyamiigyanii hokiika hellokoku niimi kapa kendo mohka armyañ pa.”

Midomiyu Atañ Darii Yajiyallo mi Larii tii

⁴⁴ Pitar ka siimi lula dorañpa, Darii Yajiyallo miilañruko huhitii hutiina aguñmi tala dotiinii.

⁴⁵ Ho henjemiyu atañ hutiina Pitar agiñho ahbo montiinii hemur nyatii, niimpalukoda Darii Yajiyallo ka ahmiñayiñ mi Midomiyu atañ mitrḛ bitii.

⁴⁶ Niimpalukoda mohlu mohlumi mika aguñmi ludopa tapatii ho Pinii mi assañdopa. Ho Pitar lutii,

⁴⁷ “mi kone jalo lutiñ lakiñ dopeha yasie loka baptisma lasa nii hokii siika miyu atañmi hutiina Darii Yajiyallo larii nyabii nenii ngunu giichañ ho?”

⁴⁸ Ho mo mohlumi Jisu Kristo ka armyañ pa baptisma lato lutii. Ho mohlu mohmi lonye lohiñhe dutorañ lubiido.