Biblia Todo Logo
Bìoball air-loidhne

- Sanasan -

MIHUKAKIÑNIIÑ 9 - NITI GONTU N.T. (BSI)

1 Ho yangonii miidopopi mubiido mohka siirii mi, ho ngo takḛr mi yapuñ hokii kiiddiapiñ ho huhi la dopa kapato, ho mohmi sabe mi bibiido kamoramba ura ubu ahkomi;

2 mo kamoramba urañ ka lembo mi miiko biido, ho ubu hokii yamu muku suliñdo hempḛr yamu hongo hokii hiilyañ, ho danyi la piilo nyimi kamo dopa miibiido hiika yamu muku lo niihna kamoramba urañ hokii sucha tiinii.

3 Ho yamumuku hokii kormu lintii kiiddiapiñ ho, ho mohlumi harchichike bibiido hiitañ harchichike kiiddiapiñ daka tarji kiitañ;

4 mohlumi lubiido kiiddiapiñ daka tammi mi miidañ yo malo salyi lela sancha niimi malo sannii mi hang heru dopa miiyo, hojalo hiika miyu atañmi miito hutii kiina mohluka tiirii ho pinii ka jhipponiimi giimanii;

5 mohlumi piilo barngo hemi henga henkha miipa dopa bitii, hojalo mohlumi memma dopa, ho mohluka henga henkha dopaka miiniiñ hii tarji ka henga henkha dopaka miiniiñ hiilyañ, miyu mika asii lyiho hokii hiilyañ.

6 Ho hiika allo atañ ho miyuatañ shiisa niimi mekiñdo ho hiimi mepa kema; mohlu shiinañ la henkiñdo, ho shiiniiñ hii mohluko hokii gogii kendo.

7 Kakoho kormu atañ hii gyambo pate paka gora danii hiilyañdo; mohluka dinta ho kakoso ayyiñ ka tahiñbyopa giidonii hiilyañdo; mohluka nyitumoru hii miyu ka nyitumoru hiilyañdo,

8 mohluka dimmu hii nyimii atañka dimmu hiilyañ, ho mohluka aih hii patii ka aih hiilyañ;

9 mohluka pakhu hii dachañ habyañsiitiñ hiilyañ giido, ho mohluka ale ka lekuniiñ hii goragari atañka gora agiñ hoka gyambo pate paka adu-abiñ donii hiilyañdo.

10 Mohlukii tarji kii hiilyañ amie giido, ho iitha, ho mohluka miyu mika pana naniiñ harchichike hii amie ho giido piilo barngo hepa.

11 Mohluko mohlumi ka kabiinii radde du kamoramba ubu daka miidopopi; mohka Hebrew hoka armyañ Abaddon, ho Grik ho mohmi Apollyon hiila gyodu.

12 Kappyo japa ka biisokacho hii inne kuke; kato, biisokacho anye hiira ahkiñ dorañ.

13 Ho khiihnii miidopopi mohka siirii mi mubiido, ho ngo tapato Pinii ka hata hoka ayyiñ agyañ ka arii bupe ka adu-abiñ niimi,

14 lubiidola khiihnii miidopopi siirii biinii bomi, “Tiipa linto piilye miidopopi atañmi humina ratola donii kahe kiiley Yuprates ho.”

15 Ho piilye miidopopi atañmi tiipa limbiido, humina hemmyo tola atii tiinii siika myodupa, allopa, piilopa, ho anyañpa, mendupa miyu atañka hingenii hakhu mi.

16 Khiika koho gora hoka yohabo atañ hempḛr taro kror nyikhañ hepahe; ngo tapato mohluka taromi.

17 Ho sitañpa ngo gora atañmi kapa to ngiika mihukaniiñho: gora yonii atañ habyañsiitiñ nanii giitola yamu hiilyañ lanchañ ho sapphire yalañ hiilyañ jiji ho sulphur hiilyañ pilañ miilañ, ho gora atañka adiñ hii patii ka adiñ hiilyañ, ho yamu ho muku ho sulphur mohka aguñ hokii muliñ biido.

18 Siika hinge dolilo miyu atañka hingenii hakhumi membiido, yamulo ho mukulo ho sulphur lo mohka aguñ hokii ka muliñ niilo.

19 Niimpalukoda gora atañka harchichike hii mohluka aguñ ho la amie nyiho giido; mohluka amie hii tabu adiñ giinii hiilyañdo, ho hiika hiilo mohlu une agiido.

20 Ho khiibemiyu dunii atañ, hutii mina siika dolilo memanii, henkur nyaku matii mohluka alah loka miiniiñ atañmi malo igii mika herii niimi ho ayyiñ hokii ka puchi niimi ho rupu hokii ho bitie hokii ho yalañ hokii ho yasañ hokii. Niihna kapa lamanii malo tapa lamanii malo ilamanii;

21 malo mohlu mohluka miyu menniiñ hokii tiirḛ henkurma malo mohluka ashumiiniiñ malo mohluka helyihembyo heniiñ malo mohluka diipyo nii hokii.

Apatani New Testament - NITI GONTU 

Copyright © The Bible Society of India, 2014.

Used by permission. All rights reserved worldwide.

Bible Society of India
Lean sinn:



Sanasan