MIHUKAKIÑNIIÑ 7 - NITI GONTU N.T. (BSI)

144,000 Isrel ka Miyu Atañ

¹ Hiika hiiba ho ngo kapato piilye miidopopi atañ kiiddiapiñ ka piilye khonchañ ho dabiidopa, kiiddiapiñ hokiika piilye allyi heliñ niimi gatu biitola, niimpalukoda hang allyi mi heliñ madopa kiiddiapiñho malo siimie ho malo sannii buhe hotiirḛ.

² Ho ngo kapato miidopopi koneya chadopa danyi chako dalyi hokii, turnii Pinii ka jhipponiimi biitola, ho hempḛr goropa gyobiido hiika piilye miidopopi atañmi humina bitola dotiinii harchichike mi kiiddiapiñ la siimie nyimi ayamapa miidopa,

³ lubiidola, “Ayamapa miilyayo kiiddiapiñ mi malo siimie mi malo sannii atañmi, nii dahepa ngunu tiiho tama ngunuka Pinii ka miira atañmi mohluka tiirii atañ ho.”

⁴ Ho ngo tapato abuje tiihoniiñ, 144,000 tiihobiine, halu kone abi hokii Isrel ka oho atañ hokii,

⁵ Jarlyañ lenye jhipponii Juda ka halu giira hokii, Jarlyañ lenye Reuben ka halu giira hokii, Jarlyañ lenye Gad ka halu giira hokii,

⁶ jarlyañ lenye Asher ka halugiira hokii, jarlyañ lenye Naptali ka halugiira hokii, jarlyañ lenye Manase ka halugiira hokii,

⁷ jarlyañ lenye Simeon ka halugiira hokii, jarlyañ lenye Levi ka halugiira hokii, jarlyañ lenye Issachar ka halugiira hokii,

⁸ jarlyañ lenye Zebulun ka halugiira hokii, jarlyañ lenye Josep ka halugiira hokii, jarlyañ lenye mi tiiho biine Benjamin ka halugiira hokii.

Hempḛr taro Miyuapur

⁹ Siika hiibaho ngo kapato, ho kato, hempḛr taro miyu nii mina miyu kone hetrḛ khiila kema, ganda kone abi hokii, kapane halugiira hokii ho miyuatañ, ho aguñ atañ, raddeduko ka hataho danyada ho Siibuñ ka hataho, puloo tarii giinya tola, pam sannii ka halloh mi biitola mohluka alah ho,

¹⁰ ho gyunyada hempḛr goropa, “Sangopyako hii ngunu Pinii kii huna raddeduko ho dunii, ho Siibuñ kii!”

¹¹ Ho hikha miidopopi atañ raddeduko mi gokḛrpala dabiida ho amiabañ atañ mila ho piilye turnii achu-amyo atañmi, ho mohlu mohluka nyimo mi nyanki nyada raddeduko ka hataho ho Pinii mi heriinyada,

¹² lubiidola, “Amen! Lyaniiñ ho tatukatu ho chila ho payapacho ho kiniiñ ho harchichike ho haro hii ngunu Pinii kii ayu dahepa! Amen.”

¹³ Ho amiabañ kone ngiimi luhii, lubiidola, “Hupe siika atañsi, puloo tarii hokii giinya tola, ho nohkii yu mohlu ahnya danii?”

¹⁴ Ngo mohmi lutii, “Tonsḛrbo, no chindo.” Ho mo ngiimi luhii, Siika atañsi mohlu hutiina hempḛr kahe hentḛrkanyi hokii lintii kunii; mohlu mohluka tarii mi ase tiiku ho hiika atañmi puloo dopa miitiiku Siibuñ ka ai lo.

¹⁵ Hopa mohlu Pinii ka raddeduko ka hataho da, ho miiho nyada mohmi allo ayoh mi mohka piniiude ho; ho huna raddeduko ho dunii kagur biikiñdo mohlumi mo dabo mombii dola.

¹⁶ Mohlu haya keñkuma, yasie tiirḛ hangḛr keñkuma; danyi hii mohlumi benkhii kema, malo hang gubu paka beniiñ.

¹⁷ Niimpalukoda Siibuñ raddeduko punko hoka daniibo mohlumika siibuñsorniibo, ho mo mohlumi lembo pagiikendo turnii yasie ka shoo huliñ ko lohe; ho Pinii tipa kendo kone abika mila mi mohluka amee hokii.