MIHUKAKIÑNIIÑ 6 - NITI GONTU N.T. (BSI)

Jhipponiiñ

¹ Siisi ngo kapato kanunii jhipponiiñ hokii kone mi Siibuñ atu miikokiile, ho ngo tapato piilye turnii achu-amyo hokii kone lune, yapuñ geniiñ hiilyañ luniiñhii, “Ahto!”

² Ho ngo kapato, ho kato, puloo gora, ho hiika gora yoniibo apiihalyi biitola; ho tahiñbyopa mi mohmi bibiine, ho mo inne pamiñpajo biila ho pamiñdupa.

³ Mo anyenii jhipponiimi miiko kiile, ngo tapato anyenii turnii achu-amyo ka luniiñmi, “Ahto!”

⁴ Ho gora doreya lilyimi, lanchañ hendḛr; hiika gora yoniibomi kiiddiapiñ sokii chimie mi labii dokupa bitii kumi, niimpalukoda miyu atañmi kone anyañmi mensu dopa; ho mohmi hempḛr ilyo soro sohe bibiido.

⁵ Mo hingenii jhipponiimi miiko kiile, ngo tapato hingenii turnii achu-amyo ka luniiñmi, “Ahto!” Ho ngo kapato, ho kato, jih gora, ho hiika gora yoniiboka alah ho aie-haju kaka naniiñ biitola;

⁶ ho ngo tapato, takoso piilye turnii achu-amyo ka punko hokiipe hendo lubiidola, “denarii perepa yatañ tuhe, ho embiñ koda tuhiñhe denarii perepa; hojalo kutu la roalha nyimi miidañ biyo!”

⁷ Mo piilyenii jhipponiimi miiko kiile, ngo tapato piilyenii turnii achu-amyo ka luniiñmi, ludo, “Ahto!”

⁸ Ho ngo kapato, ho kato, loppo gora dore, ho hiika gora yonii boka armyañ hii Shiiniiñ hiila, ho nelimyoko hii mo kiiliñ ho injo mondo, ho mohlumi harchichike mi bibiido kiiddiapiñ ka piilyenii hakhu akomi tamobiila dopa, ilyo lo mendo pa ho diime ahniiñlo ho dolipiiliñlo ho kiiddiapiñ daka morey achu-amyo lo.

⁹ Mo yangonii jhipponiimi miiko kiile, ngo kapato agyañ ka ura ho hiika atañka yallo mi hutiina Pinii ka aguñpa menko nyabii nenii ho mohluka haki biniiñ kiipa;

¹⁰ mohlu hempḛr goropa gyurine, “O Kayeja Attoh, darii ho jije, ne diirii kendo rañ niika halii sanii ho nunuka ai paka miili sanii hutiina kiiddiapiñ ho dunya durañnii?”

¹¹ Ho mohlumi kone abimi puloo tarii bersa binya biine ho lubiine ichuche hemmo lyatorañ, nunuka miira ahiñ mila ho nunuka anubarmii atañ mitrḛ abbi dopa, hutii mina menkiñ dorañnii nunu mika mencha ho.

¹² Mo khiihnii jhipponiimi miiko kiile, ngo kapato, ho kato, hiikoho hempḛr uro myobu hudomi; ho danyi hii piichañ gata naniiñ mitrḛ jih yadomi, karbyañ piilo hii ai hiilyañ lyine,

¹³ ho yapuñ daka takḛr atañ kiiddiapiñ ho huhine taro sannii ka dorii piilo hoka ahee liiniiñ chuli allyiaro loka hello konii;

¹⁴ yapuñ hii lyuhi lyimi karkiesiilyo mika karkie biine kunii hiilyañ, ho putoo puhe abi ho siilokiiddi koneabi mi lapa biine.

¹⁵ Ho kiiddiapiñ daka radde atañ la miyu kahe atañ ho dumiñ miyu ho mingo ho tamo, ho kone abi, miira la dasḛr nyi, lampii ho achugiine ho putoo daka yalañ atañ ho,

¹⁶ putoo atañla yalañ atañmi lubiido, “Ngunu ko huhito ho ngunumi achuñ biipe mohka nyitumoru hokii huna raddeduko ho dunii, ho Siibuñ kokii ka hadii ahsanii hokii;

¹⁷ niimpalukoda mohluka hadii ka hempḛr kahe allo ahdoku, ho hu hiika hataho dala kendo?”