MIHUKAKIÑNIIÑ 20 - NITI GONTU N.T. (BSI)

Anyañ Jare

¹ Ho ngo kapato miidopopi dariiganda hokii todopa, mohka alah ho kamoramba urañ ka sabe mi biitola ho hempḛr kaye dachañ ranyimi.

² Ho mo tabu mi latu biine, hiika ayuhoka tabu mi, huna igii ho saitan nii, ho mohmi ratola atiibiine anyañ nyang jarepa,

³ ho mohmi ubu ho jopa liibiine, ho hiimi miitiñ biine ho mohka ayoh ho jhippo biine, niimpalukoda mohmi hiika hiiba hokii ganda atañmi talubalo kuma dopa, anyañ jare inja menda hemi. Hiika hiiba ho mohmi ichuche myodu pahe tiipa linkiñdo.

⁴ Ho ngo kapato raddeduko atañmi, ho hiika atañ hoka dunii atañ ayakacho mi kaniipa. Hiira kapatota yallo atañmi hutiina langu patu konya biinenii Jisu mika pyako kopa ho Pinii ka aguñpa, ho hutiina achu-amyo mi herii nyama nenii malo hiika puchiniimi ho hutiina hiika miiho niimi mohluka tiirii ho malo alah atañ ho giima nenii. Mohlu turi neku, ho Kristo ka agiñho anyañ jare sangii sahiñ mone.

⁵ Khiibe shiinii atañ hiira sango mi kapa kati mane anyañ jare nyanja menda hemi. Siikasi kapyo paka turiturku riku nii hii.

⁶ Lyankonii ho darii hiika hii hutiina kapyo turiturku rilyi ho turbo rikiñ donii! Hiika hiipa ronye niipaka shiiniiñ ho hang harchichike giima, hojalo mohlu nyibu pa lyikiñdo Pinii la Kristo nyipa, ho mohlu sangii sambo monkiñdo anyañ jare.

Saitan Mika Pamiñnii

⁷ Ho niida anyañ jare nyanja talyi, Saitan mi mohmika patiihtunii hokii tupya linkiñdo

⁸ ho agoho linkiñdo ganda atañmi talubalo dupa niihna kiiddiapiñ ka piilye khonchañ ho donii, hiika hii, Gog la Magog nyi, mohlumi gyokuñ lala gyambo paniipa; mohlu khiika ko siimie daka siikhiisuru kane.

⁹ Ho mohlu hikha kiiddiapiñ ho intii pakiñdo ho piniimiyu atañka dukuñ komi dakḛr pabii kendo ho heniiñja citi mi; hojalo dariiganda hokii yamu lyahi ne ho mohlumi yakhii biine,

¹⁰ ho igii huna mohlumi talubalo biinenii yamu ka siimie ho jopa liibiine ho sulphur ho nohna achu-amyo la amuh nyibuhenii dunii, ho mohlu henga henkha hela dokiñdo allo ayoh dadumi ayu dahepa.

Kamijapa ka Ayakacho kaniiñ

¹¹ Ho ngo kapato hempḛr puloo raddeduko ho mohmi huna hiiko dunii; mohka kadopa kiiddiapiñ la yapuñ nyi gopa giine, ho mohlupa hang ganda kapa kumane.

¹² Ho ngo kapato shiinii mi, kaye atu nyimi, raddeduko ka hataho dapa, ho kheta atañmi beko biine. Hiira kheta taheyami beko biine, hiikahii sango ka kheta. Ho shiinii atañmi halii biine nii hiila na kheta atañ ho ketola donii, niihna mohlu miitiinii.

¹³ Ho siimie hoka shiinii atañ mitrḛ hempa bibiido, Shiiniiñ la Nelimyoko nyitrḛ mohluko hoka shiinii atañmi hempa bibiido, ho hikha miilañ rumi halii biido niihna mohlu miitiinii.

¹⁴ Ho Shiiniiñ la Nelimyoko atañmi yamu ka siimie ho jopa liibiido. Siikasi ronye niipa shiinii, yamu ka siimie;

¹⁵ ho hu koneka jalo armyañ mi matiirḛ kapa makoda sango ka kheta ho ketola dopa, mohmi yamu ka siimie ho jopa liikiñdo.