MIHUKAKIÑNIIÑ 2 - NITI GONTU N.T. (BSI)

Ipisia Paka Puyu

¹ “Ipisia gyoliñkonii daka miidopopi kedo: ‘hiika aguñ huna takḛr pukkanuhemi mohka lahbi alah ho gabii tola biidonii, huna ila donii kanuhe ayyiñ hokiika yamumiiru agiñho.

² “‘Ngo chindo nunuka miigo atañmi, nunuka kheniiñmi ho nunuka yanu paka pigii niimi, ho niihtañpa nunu diimmah miyu mi pigii lama hojalo tenkatii hiika atañmi hutiina kiiniñkonii hiila lusu donii hojalo hiilama, ho chimpatiiku mohlumi amuh hiila;

³ Ngo chindo nunuka yanu paka pigii niimi ho ngiika armyañ kiipa heru hembi niimi, ho nunu renge marañ.

⁴ Hojalo ngo siika sipake nunumi hadii donii, niimpalukoda nunu apa tiiku nunuka kapyo hoka heniiñmi.

⁵ Henka nyatoku nohkiina nunu huhi nyado kunii, henkur toku ho miito nunuka kapyo hoka miigo miiniiñmi. Hiila matiirḛ miima koda, ngo nunuko ahchi ho nunuka muru mi lara biichi ku hiika ahii ko hokii, nii dahepa nunu henkur tama.

⁶ Hojalo siimi nunu giido, nunu kanamatii Nikolaitan ka miigomi, nii mina ngo tiirḛ kanamanii.

⁷ Hii hukiina yaroo giidonii, mohmi take nento niihna Yajiyallo gyoliñkonii atañmi ludonii. Huna pamiñdonii hiimi ngo diike nenchi sango ka sannii hokii, niihna Pinii ka Diilyañdiiloganda ho dunii.’

Ismarna Paka Puyu

⁸ “Ho Ismarna gyoliñkonii daka miidopopi kedo: ‘Kappyo jahii la kami jaka aguñ atañ, huna shiitii kunii ho turiturku tiikunii.

⁹ “‘Ngo chindo nunuka hentḛrkanyi ho nunuka arromi (hojalo nunu mingodo), ho nipasiiniiñ atañ huna ludonii mohlu Jew ke hiila ho mohlu hiilama, hojalo Saitan ka sinagog.

¹⁰ Biisoyo niihna nunu heru henkiñ donii. Kato, igii si jopa liipa miidoke nunu tonge mi patiihude ho, hiikahii nunumi tenka dupa hiila, ho allo lolyañ hepa nunu hentḛrkanyi la lyikiñ doke. Lotiitolya shiihi menda hemi, ho ngo nunumi sango ka tahiñ byopa mi bichi ke.

¹¹ Hii hukiina yaroo giidonii, mohmi take nento niihna Yajiyallo hii gyoliñkonii atañmi ludonii. Huna pamiñdonii pema achihdopa miiko kemake ronye niika shiiniiñlo.’

Pargamum Paka Puyu

¹² “Ho Pargamum gyoliñkonii daka miidopopi kedo: ‘Mohka aguñ huna ilyo lyogañ lyoro areh giinii biidonii.

¹³ “‘Ngo chindo nohna nunu dunii, nohna saitan ka raddeduko hii; nunu lotiido ngiika armyañ pa ho nunu mapa ma ngiipa ka henje niimi Antipas ngiimika haki biniika allo lohe pa, ngiika lotii kone, humina membii nenii nunuka punkoho, nohna saitan dunii.

¹⁴ Hojalo ngiiko drih tongedo nii pana nunumi hadii donii: nunuko tongeda huna tadonii Balam ka tonsḛr niimi, huna tonsḛr tiinii Balak mi miitiñ tote hiila Isrel ka oho atañka hataho, niimpalukoda mohlumi diike nendupa diigo nii mina puchi niimi membi tiinii ho helyihembyo miijumi miike nendupa.

¹⁵ Hopa nunu kotrḛ tonge biinya do Nikolaitan ka tonsḛr niimi.

¹⁶ Hokoda henkur nyato. Hiila makoda, ngo nunuko nyibya pa ahchi ke ho gyambo pachi mohluka agiñho ngiika aguñ ka ilyo lo.

¹⁷ Hii hukiina yaroo giidonii, mohmi take nento niihna Yajiyallo ludonii gyoliñkonii atañmi. Hiika atañmi hutiina pamiñdonii ngo bichi manna tonge achuñ tola doniimi, ho ngo mohmi puloo yalañ mi bichi, niti armyañ ka agiñho hiika yalañho ketola nii mina kone hetrḛ chimanii hii kontiisii huna hiimi lariidonii.’

Taitira paka Puyu

¹⁸ “Ho Taitira gyoliñkonii daka miidopopi kedo: ‘Pinii ka Oho ka aguñ, hukiina amee yamu miilyo hiilyañ giidonii, ho huka alihna bitie mika hilu miitiinii hiilyañ donii.

¹⁹ “‘Ngo chindo nunuka miigo atañmi, nunuka hensuniimi ho henje ho miigo miiniiñmi ho yanu paka pigii niimi, ho kamikalo hoka miigo miiniiñhii kapyo hokiimi uroyapa miido.

²⁰ Hojalo ngo siika sipake hadii donii nunumi, niimpalukoda nunu pigiido annii akha Jezebel mi, huna atohmi nyimii nyibuhenii hiila lusudonii ho tonsḛr donii ho ngiika miira atañmi anyoh giila helyihembyo miiniiñmi miigii donii ho diigo diigii donii puchinii atañ mika membi niimi.

²¹ Ngo mohmi myodu bitii henkur dopa, hojalo mo henkur tama ludo mohka helyihembyo miiniiñ hokii.

²² Kato, ngo mohmi achihnii dota naniiho ripa liichi, ho huna mo agiñho ipfyo donii ngo hempḛr uro hentḛrkanyi ho rilii talyi, nii dahepa mo henkur tama mohka miiniiñ hokii;

²³ ho ngo mohka wiinga mi shiidopa miichi. Ho hikha gyoliñkonii atañ chinkiñdo ngoke hii huna punyu la ahha nyimi mechi ladunii, ho ngo kone abimi bichi nunuka miigo miijo atañmi.

²⁴ Hojalo khiibe Taitira hoka dunii atañpa, huna siika tonsḛr niimi biimanii, hutiina chima ranii nii mina ludonii Saitan ka hempḛr urañ drih hiila, nunupa ngo ludu, ngo nunuka ayoh ho pongelya alluaba malyike;

²⁵ niihna nunuko donii hiimi kontii biito, nii dahepa ngo ahtema.

²⁶ Hii huna pamiñdonii ho huna biidonii ngiika miigomi kamikalo lohepa, ngo mohmi harchichike mi bichi ganda atañmi sangii ladopa,

²⁷ ho mo mohlumi sangii kendoke dachañ panyilo, dekiñ piichañ ka penyo penyopa tache donii hiilyañpa, ngo atoh tiirḛ harchichike mi lariitii ngiika Aba kokii;

²⁸ ho ngo mohmi arokonchi ka takḛr mi bichi.

²⁹ Hii hukiina yaroo giidonii, mohmi take nento niihna Yajiyallo gyoliñkonii atañmi ludonii.’