MIHUKAKIÑNIIÑ 18 - NITI GONTU N.T. (BSI)

Babilon ka Huhinii

¹ Siika hiiba ho ngo hiira kapato koneya miidopopi dariiganda hokii tola dopa, hempḛr kahe otority giitola; ho kiiddiapiñ mi hudopa miibiine mohka huniiñ lo.

² Ho mo hempḛr goropa gyune, “Huhine, huhine Babilon kahebo! Hiika hii igii atañka dukopa lyine, kapane ayamanii yajiyallo ka dukopa, kapane ayamanii ho kanamanii piita ka duko;

³ Niimpalukoda hikha ganda atañ tangii nyado mohka miibḛrnii helyihembyo ka ow, ho kiiddiapiñ daka radde atañ datuapu punyatii mohka agiñho, ho kiiddiapiñ daka kiirimiinii atañ mingo nyane mohka helyihembyo ka layalabya hokiila.”

⁴ Ho ngo aguñ gongeya tapato dariiganda hokii lubiidola, “Mohkokii lintoku, ngiika miyuatañ, hiilamakoda nunu mohka ingyamiigya ko miibo diike, hiilamakoda nunu mohka doli mi bache mondiike;

⁵ niimpalukoda mohka ingyamiigya hii dariiganda lohe chachi dokuke, ho Pinii mohka diimmah mi henge giidoku.

⁶ Mo mitrḛ miito niihtañpa mo atoh miisutii, ho ronye abuyapa bili toku mohka miiniiñpa; ronye abuyapa miiyo bito mohka turla ho mohka miiyo niiho.

⁷ Niitañpa mo atohmi assañ siitii ho helyihembyo mi sobiitii, mohmi bito hiika ahiñ japa henga henkha la herumyanka mi. Niimpalukoda mohka ahha ho mo ludo, ‘Ngo nyimiiradde du, Ngo hiimima, ngo heru mi pema hempa kemma,’

⁸ hiiko hopa doli hii ahkiñdo allo lohepada, doli ho haruheniiñ ho diime, ho mo yamulo lyako kendo; niimpalukoda tamojake Pinii Attoh huna mohmi halii donii.”

⁹ Ho kiiddiapiñ daka radde atañ, hutiina datuapu punya tiinii ho mohka agiñho helyihembyo montii nii, khekiñdo ho mohpa heru kendo niida mohlu kapa talyi muku suliñ niimi mohmika lyaniiñ hokii;

¹⁰ mohlu hempḛr adho ho dakiñdo, biisola mohka henga henkha heniiñmi kala la, ho lukiñdo, “Iimbyocho! iimbyocho! no citi kahe bo, no citi tamojabo, Babilon! Gunta tahe ho niimika ayakacho kaniiñ ahne.”

¹¹ Ho kiiddiapiñ daka kiirimiinii atañ khenyado ho mohpa haru henyada, niimpalukoda kone hetrḛ riinyama mohluka drih atañmi,

¹² ayyiñ ka drih, rupu, khiniiñyalañ la tassañ nyi, pulye aya, niiji pulye, jilya ho lanchañkoma pulye, kapane narunempyo yasañ atañ, kapane siitii aih hokiika drih atañ, kapane khiiniiñ yasañ hokiika miiniiñ atañ, bitie, dachañ ho takolaro,

¹³ khehialyo, takitero, byamunanii, mirr, narunempyo kutu, ow, kutu, aya yatañ la sarse emmo atañ, siihsubu la subuñ atañ, gora atañ la goragari atañ, ho miira atañ, hiika hii, miyu ka yallo atañ.

¹⁴ “Nii ahee pana niika yallo hii hangḛr nenii hii niiko hokii inne ku, ho hikha niika ngenchih la niika tatukatu lyune ku, pema hiira kapa lakiñ kuma!”

¹⁵ Siika drih atañ mika kiirimiinii atañ, hutiina mingo nyatii kunii mohkokii, adhopa dakiñdo mohkokii, biisola mohka henga henkha heniiñmi, khela ho haruhenkiñdo goropa,

¹⁶ “Iimbyocho, iimbyocho, niimpalukoda citi kahebo khiiniiñ pulye hokii agii tola doniihii, niiji ho lanchañkoma hokii, ahiñ hokii agii niisi, khiniiñyalañ hokii, ho tassañ hokii!

¹⁷ Gunta tahepa hikha siika mingotamo hii danyopa impa neku.” Ho hikha yasiejaji mika khogiibo ho yasiejaji hoka miyu innii atañ ho khoniiñ atañ ho hikha hutii kiina siimie ho kiiri miidonii, hii adho ho dasa giine

¹⁸ ho gyunyatii mohlu muku mi kapa lala mohmika lyaniiñmi, “Siika citi kaye hiilyañ citi dola kendopeha?”

¹⁹ Ho mohlu dimḛr piipu siibiido mohluka adiñho, mohlu khela dola ho haruhela dola, gyurido, “Iimbyocho, iimbyocho, citi kahebo nohna hikha hutii kiina siimie ho yasiejaji atañ donii mingonyane mohka mingotamo lo! Gunta tahe pa mohkiimi hikha miilyi miipya biine.

²⁰ Mohpa hempyo to, O dariiganda, O piniimiyu atañ ho kiiniñkonii atañ ho nyibuhenii atañ, niimpalukoda Pinii ayakacho katii mohmi nunukiipa!”

²¹ Ho tamo miidopopi yalañ puhe tucha biido miriiyalañ hempḛr puro kane ho hiika hiimi siimie ho jolo biido, lubiidola, “Sitañ karukachopa Babilon citi kaye bomi jopa lokiñdo, ho pema kapa keñkuma;

²² ho berañ ka beniiñ ho miyu ka luniiñ, ellu beniiñ ho siirii muniiñ atañkiimi, niiko tapa keñkuma; ho bitiemiinii miyu ka bitie jalo niiko kapa keñkuma; ho miriiriinii ka adu-abiñ niimi niiko tapa keñkuma;

²³ ho muru ka hutoh hii byokiñ kuma ke niiko; ho mihie la millo nyika aguñ tapa keñku make niiko; niimpalukoda niiko hoka kiirimiinii atañ hempḛr kaye miyu neke kiiddiapiñ ho, ho hikha ganda atañ talubalo kobiine niika ashumiiniiñ lo.

²⁴ Ho mohko kappatii nyibuhenii atañla ho piniimiyu atañka ai mi, ho hikha hiika atañ hutii mihna kiiddiapiñ ho mentii nii.”