MIHUKAKIÑNIIÑ 17 - NITI GONTU N.T. (BSI)

Pfyoaridiisunii Boka Tatukatu

¹ Ho kanuhe miidopopi hokii, kone huna kanuhe paaka biidonii ahla ho ngiimi luhii, “Ahto, ngo niimi kakiñso pfyoaridiisunii tatukatu bomika ayakacho kaniiñmi huna abuje yasie ka ayoh ho dunii,

² huka agiñ hona kiiddiapiñ daka radde atañ datuapu putiinii, ho huka datuapu punya niika ow lana kiiddiapiñ hoka dunii atañ tangii nyadonii.”

³ Ho mo ngiimi irigii Yajiyallo pa zabyo ho, ho ngo kapato annii akha mi lanchañkoma achu-amyo ho dupa huko hona poteje nipakoyaniika armyañ giidonii, ho hiika hiikii adiñ pukkanuhe ho arii bulyañhe giido.

⁴ Annii akha giijutii niiji la lanchañkoma nyiho hokii, ho ayyiñ ho khiiniiñ yalañ ho tassañ hokii, mohka alah ho ayyiñ hokii turla jobii tola poteje kanamanii ho miibḛrnii mohka datuapu puniiñ hokii;

⁵ ho mohka tiirii ho ketola giido michilamanii armyañ: “Kaye Babilon, pfyoaridiisunii atañka annii ho kiiddiapiñ ka kanamanii.”

⁶ Ho ngo annii akha mi kapato, piniimiyu atañka ai hokii tangii tola ho Jisu paka shiibi nii atañka ai mi. Ngiika mohmika kapa lyiho ngo ano hemurto.

⁷ Hojalo miidopopi ngiimi lune, “Niimpa kapuñtale du? Ngo niimi annii akha ka michilamanii mi lukoso, ho achu-amyo adiñ pukkanuhe ho arii bulyañhe giiniibo mohmika bagiibomi.

⁸ Achu-amyo niika kapanii hii, ho siisi nyima, ho hiika hii kamoramba ura hokii chakiñdo ho pamyo kenko ho inkiñdo; ho kiiddiapiñ hoka dunii atañ huka armyañ na sango ka kheta ho kemanii dohadolo mika liidi rabii jaho hokii, kapuñtale nyakiñdo achu-amyo mi kala la, niimpalukoda hiika hii dune ho nyima ho ahkiñ do.

⁹ Siikasi chila naniimi kudo: adiñ pukkanuhe hii putoo pukkanuhe niihona annii akha dunii;

¹⁰ mohlu kanuhe radde atañ, yangohe huko hokiina huhi nekunii, kone hii du, kone hii siisi lohe pa ahma rañ, ho niida mo ahchi mo ichuche myodu pasu dakiñ siido nii.

¹¹ Hiika achu-amyo pakoda niihna danenii ho siisi nyima, hiika hii pinye nii hojalo hiika hii kanunii kii, ho hiika hii pamyo kenko ho inkiñdo.

¹² Ho arii bulyañhe niika kapa niisi radde alyañ heke hutiina siisi lohe radde harchichike mi larii marañnii, hojalo mohlu otority mi larii kendo raddepa gunta tahepa, achu-amyo ka agiñho.

¹³ Siika atañsi henju kone ke ho mohluka harchichike la otority mi bipa tiiku achu-amyo mi;

¹⁴ mohlu gyambo pakiñdo Subuñmi, ho Subuñ hii mohlumi pamiñ kendo, niimpalukoda mo attoh atañka Attoh ho radde atañka Radde, ho hutiina mo agiñho danii hiika atañ gyokodo kahekonii ho lotii.”

¹⁵ Ho mo ngiimi luhii, “Yasie niika kapa niisi, nohna pfyoaridiisunii dunii, miyu ho miyuabuje ho gandaho aguñ atañ.

¹⁶ Ho arii bulyañhe niika kapa niisi, mohlu la ho achu-amyo hii kahu kendo pfyoaridiisunii bomi; mohlu mohmi arrokapa apa kendo ho ahuara pa, ho mohka asiialyo mi diikiñdo ho yamu lo mohmi ronkiñdo,

¹⁷ niimpalukoda Pinii siimi mohluka ahha atañ ho atii tiiku mohka miidupaka heniiñmi henju konepa giila miidopa ho radde harchichike mi achu-amyo mi bidupa, nii dahepa Pinii ka aguñ lyipe tama.

¹⁸ Ho annii akha niika kapa niisi kaye citi ke niihna kiiddiapiñ daka radde mi domiñ biikiñ donii.”