MIHUKAKIÑNIIÑ 14 - NITI GONTU N.T. (BSI)

Subuñ la Mohka Miyu Atañ

¹ Ho ngo kakele, ho kato, Zayon Putoo ho Subuñ dami, ho mohka agiñho 144,000 miyu dami mohluka tiirii ho mohluka armyañ ho mohluka aba ka armyañ mi kegii tola.

² Ho ngo aguñ tapato dariiganda hokii hempḛr yasie bido nii hiilyañ ho hempḛr yapuñ uro gendo nii hiilyañ; aguñ ngiika tapa nii berañ beniiñ atañ hiilyañ mohluka berañ mi bedo niihtañ,

³ ho mohlu niti biisie sine radde duko ka hataho ho piilye turnii achu-amyo ka hataho ho amiabañ ka hataho. Kone hetrḛ hiika biisie mi sichiñ giimane 144000 kontiisii hutii mina kiiddiapiñ hokii tupya tukunii.

⁴ Siika atañsi hiike hutiina atohmi miibḛr siima tiinii nyimii atañ agiñho, niimpalukoda mohlu addah ke; siika atañ sike hutiina Subuñ mi imbo nyatii nii nohjalo mo intii; siika atañmi tupya tiiku miyuatañ kokii Pinii ka kapyo ja ahee pa ho Subuñ pala,

⁵ ho mohluka aguñ ho hang gollunii kapama, niimpalukoda mohlu pahañ hansa giima.

Hinge Miidopopi

⁶ Ho ngo hiira koneta miidopopi mi yapuñ liipa ho gola dopa kapato, lyulasamanii ayapuyu mi gyuko kiine hupa hiila hutiina kiiddiapiñ so dunii, kapane ganda atañmi ho halugiira atañmi ho aguñ atañmi ho miyu atañmi;

⁷ ho mo hempḛr goro aguñ pa lubiido, “Pinii mi biisoto ho mohmi assañto, niimpalukoda mohka ayakacho kadu myodu ahdo kuke; ho mohmi heriito huna dariiganda la kiiddiapiñ nyimi putiinii, siimie la yasie shoo mi.”

⁸ Koneya miidopopi, anye niibo, imbo mondo, lubiidola, “Huhineku, huhineku Babilon kahe bo, mo huna hikha ganda atañmi tandopa miitiinii mohka miibḛrnii helyihembyo ka ow mi.”

⁹ Ho koneya miidopopi, hingeniibo, mohlumi imbo mondo, hempḛr goropa lubiidola, “Hu konejalo pa matiirḛ heriido achu-amyo mi ho hiimika puchiniimi, ho mohka tiirii ho miiho kodonii malo mohka alah ho,

¹⁰ mo tiirḛ tankiñdo Pinii ka hadii ow mi, toliñtii miiyomanii mi mohka hadii ka turla ho, ho mohmi yamu ho herudopa lyakiñ do ho sulphur ho darii miidopopi atañka hataho ho Subuñ ka hataho.

¹¹ Ho mohlumika herudopa ka miiniiñ yamu muku hii sucha kendo ayu dahepa; ho mohluko hemmo nanii nyima, allo malo ayoh, siika achu-amyo la puchi niimika heriibo, ho hu jalopa hiika armyañ ka miiho niimi giidoku.”

¹² Siika sike gyoniiñ pigiikiinedupa piniimiyu atañmi, hiika atañ hutiina Pinii ka lujubiniiñ mi atii biidonii ho Jisu ka henje mi.

¹³ Ho ngo tapato aguñ dariiganda hokii lubiidola, “Keto siimi: Lyanko kendo siisi kiija shiinii atañ hutiina shiidonii Attoh ko.” “Lyanko kendo jijeloda,” yajiyallo hii ludo, “niimpalukoda mohlu dumo kendoku mohluka miigo miiniiñ hokii, niimpalukoda mohluka miiniiñ hii mohlumi injo mokiñdo!”

Kiiddiapiñ Mika Amoo Laniiñ

¹⁴ Ho ngo kakele, ho kato, puloo jomii, ho jomiiho kone du kakoho miyu ka oho hiilyañ, mohka adiñ ho ayyiñ tahiñbyopa giitola, ho hempḛr tagi areh hokii mohka alah ho biitola.

¹⁵ Ho koneya miidopopi piniiude hokii lindo, hempḛr goropa gyubii dola huna hiika jomii ayoh ho dunii, “Niika tagi lo pirito, ho pito, niimpalukoda amoo pidu dokuke, niimpalukoda kiiddiapiñ mi amoo pidu kupa armiñ dokuke.”

¹⁶ Hopa mo huna jomii ka ayoh ho dunii mohka tagi mi jari biido kiiddiapiñmi, ho kiiddiapiñ mi amoo pibii doku.

¹⁷ Ho koneya miidopopi piniiude hokii lindo dariiganda ho, ho motrḛ hempḛr areh tagi biido.

¹⁸ Ho koneya miidopopi lindo agyañ hokii, miidopopi huko hona yamu mitrḛ pamiñ lanii harchichike giidonii, ho mo hempḛr goropa gyobii do mohmi huna hempḛr areh tagi biidonii, “Niika tagi lo pirito, ho kiiddiapiñ daka halloh apyuñ paka giiniimi gakuñto, niimpalukoda hiika roahee atañ armiñ dokuke pidu kupa.”

¹⁹ Ho miidopopi mohka tagi mi jari biido kiiddiapiñ mi ho roahee byantu mi halloh hokii pila lala, roalha nyoliñko ripa liibiido Pinii ka hadii ho;

²⁰ ho roalha nyoliñbo citi ka agoho nyorpi biido, ho ai biliñdo roalha nyorpi kokii, ai hii bila lahiñhela nyikhañhela pohe nyatumi abu ya adhopa biliñtii ho tungohe urañpa.