MIHUKAKIÑNIIÑ 12 - NITI GONTU N.T. (BSI)

Nyimii la Tabunyi

¹ Ho hempḛr kahe kagiñnanii yapuñho lintii. annii akha danyi mi pulye pa giitola, piilo mi mohka alih nyota nambii tola, ho mohka adiñ ho takḛr perlyañ lenye hemi tahiñbyopa pa giitola;

² mo wiinga giitii ho mo gyurido wiinga akhii chila, wiinga mi buna kula.

³ Ho koneya kagiñnanii yapuñho lintii; kato, hempḛr kahe lanchañ tabu, adiñ pukkanuhe giitola ho arii bulyañhe, ho tahiñbyopa kanuhe mohka adiñ atañ ho giitola.

⁴ Mohka amie lo yapuñ daka takḛr hakhu hingemi halo biido, ho hiika hiimi kiiddiapiñ ho jopa lobiido. Ho tabuhii annii akha ka hataho da huna wiinga biipa miidonii, niimpalukoda mo mohka wiinga mi diidupa hiila buliñ dalyi;

⁵ mo milobo wiinga bubiido, kone huna hikha ganda atañmi sangii kendonii dachañ panyi biitola, hojalo mohka wiinga mi latu biila Pinii ko chagiitii mohka raddeduko ho,

⁶ ho annii akha hii jabyo ho hargiitii, nohna mohpa duko dotiinii Pinii ka miimyo biniiñ, hiiko 1260 allo kalyañkada kendo.

⁷ Siisi dariiganda ho gyambo pasu ritii, Mikel la mohka miidopopi atañ tabu mi pariitii; ho tabula mohka miidopopi atañ pasutii,

⁸ ho mohlumi pamiñtii ho hiiko mohlupa hang duko nyiku matii mohlupa dariiganda ho.

⁹ Ho hempḛr kahe tabu mi ripa limbiido, hiika ayuhoka tabu mi, humina Igii ho Saitan hiila myantiinii, hikha dohadolo mika talubalobo-mohmi kiiddiapiñ ho jopa lobiido, ho mohka miidopopi atañ miilañmi mohka agiñho jopa lobiido.

¹⁰ Ho ngo hempḛr goropa aguñ tapato dariiganda ho, lubiidola, “Siisi sangopyako ho harchichike ho ngunuka Pinii ka raddeganda ho mohka Kristo ka otority hii ahdoku, niimpalukoda ngunuka anubarmii mika halii bomi ripa lobii neku, huna mohlumi haliila donenii allo ayohmi Pinii ka hataho.

¹¹ Ho mohlu mohmi pamiñtii Subuñ ka ai lo ho mohluka aguñ pyako niilo, niimpalukoda mohlu mohluka sangomi abyo siimatii shiihi lyihepa.

¹² Hopa hempyoto, O dariiganda ho nunu hiiko hoka dunii atañ! Hojalo aiya hiila nunumi hembido, O kiiddiapiñ la siimie nyimi, niimpalukoda igii hii nunuko tone hempḛr uro hadii mi ahgii la, niimpalukoda mo chindo mohka myodu tunii doku hiila!”

¹³ Ho tabu mohmi kiiddiapiñ ho ripa lobii lyiku hiila kapa lala, mo annii akha mi mejomondo huna milobo wiinga bubii donii.

¹⁴ Hojalo annii akha mi hempḛr kaye khonkhuñ ka ale lenye mi bibiido niimpalukoda mohmi tabu kokii Zabyo ho gogii kiine dupa hiila, hiika duko ho nohna mohmi kalyañ kendonii danyi nyahiñ hela nyampohe.

¹⁵ Tabu hii mohka aguñ hokii yasie ulliñ biido kiiley chitañ annii akha ka kiiliñho, mohmi yasie tuhala tubii kiine dupa.

¹⁶ Hojalo kiiddiapiñ hii ahtii annii akha mi hembyuñ dupa, ho kiiddiapiñ mohka aguñmi gongkotii ho kiiley mi annii biido nii mina tabu mohka aguñ hokii ulliñ biidonii.

¹⁷ Ho tabu hii hadiido annii akha mi, ho inneku gyambo padupa hiila hikha mohka ohoasi mi, hiika atañmi hutiina Pinii ka lujubiniiñ mi atii biinya donii ho Jisu pa pyako binya danii.

¹⁸ Ho mo siimie ka sumuho datii.