MIHUKAKIÑNIIÑ 11 - NITI GONTU N.T. (BSI)

Haki Anye

¹ Ho ngiimi tuka nanii dachañ abu buhe bihii panyi chuli, ho ngiimi lukone: “Gurito ho tukato Pinii ka piniiude mi ho agyañmi ho hutiina hiiko herii nyadonii,

² hojalo tuka yayo piniiude ago daka lengo mi; hiimi apato, niimpalukoda hiika hiimi Midomiyu atañmi bitii kuke, ho mohlu darii citi mi piilo alyañ piilye la barnye nyorpi biikiñ doke.

³ Ho ngo ngiika haki anye mi nyibuhela dopa harchichike mi bichi 1260 allo hendopa, niirepulye giitola.”

⁴ Siikasi olive sannii bunye ke ho muru ahiiko anye nohna danii kiiddiapiñ daka Attoh ka hataho.

⁵ Ho hu kone jalo matiirḛ mohlumi heru dopa miipa dokoda, mohluka aguñ hokii yamu lyaliñla ho mohlumika ahha-banii atañmi yapa kendo; hu kone jalo matiirḛ mohlumi heru miipa dokoda mo menko dupa lyikiñ doke.

⁶ Mohluko yapuñ mi miipiñ ladopa lohe harchichike giido, hang miido huma dopa mohluka nyibu hendo allo atañ ho, ho mohluko harchichike giido yasie mi lohe ai pa miila dopa, ho kiiddiapiñ ho kapane doli mi ahgii ladopa, niidajalo mo miinala henchi.

⁷ Ho mohlu mohluka pyako niimi pyaja lala, achu-amyo kamoramba urañ hokiika chanii mohluka agiñho gyambo pakiñdo ho mohlumi pamiñ kendo ho mohlumi menkiñdo,

⁸ ho mohluka shiima atañ hempḛr kaye citi ka lembo ho dokiñdo nii mina lumunala ludonii Sodom la Egip hiila, nohna mohluka Attoh mi ledalala membii nenii.

⁹ Niimpalukoda allo lohiñ hela lopohe miyu atañka apur hokii ho halu atañ hokii ho ponsa ponsa aguñ lunii hokii ho ganda atañ hokii miyu kamiñ biila dokiñdo mohluka shiima atañmi ho chekho nyane mohlumi byuh ho jolii kiine tama hiila,

¹⁰ ho hutiina kiiddiapiñ ho dunya dunii hempyo nyakiñdo mohluka shiima mi ho hempyo sonya kendo ho ahmiñayiñ bisu kendo, niimpalukoda siika nyibuhenii anyesi mohlumi henga henkha miipa la dutii hutiina kiiddiapiñ ho dunyatiinii.

¹¹ Hojalo allo lohiñ hela lopo heka hiibapa sango ka allyi Pinii kokii mohluko ahtii, ho mohlu baritii mohluka alih lo, ho hempḛr uro biiso nyatii hutiina mohlumi kapa tiinii.

¹² Ho mohlu hempḛr goro aguñ tapatii dariiganda hokii mohlumi lubiido, “So chato!” Ho mohluka ahha-banii ka kadopa mohlu dariiganda ho chatii jomii ho.

¹³ Ho hiika myodu jaho hempḛr uro myobu hune, ho citi ka alyañnii hakhu hii yahine; miyu jakkanuhe shiine myobu hukoho, ho khiibe atañ biiso nyane ho assañ nyane dariiganda daka Pinii mi.

¹⁴ Anyenii biiso hii inne ku; kato, hingenii biiso nyibya ahkiñ doke.

Kanunii Siirii munananii

¹⁵ Ho kanunii miidopopi mohka siirii mi mutii, ho hiiko hempḛr goro aguñ adune dariiganda ho, lubiidola, “Dohadolo ka raddeganda hii ngunuka Attoh ho mohka Kristo ka raddeganda pa lyidoku, ho mo ayu dahepa sangii kendoku.”

¹⁶ Ho nyikhañhela piilye amiabañ hutiina mohluka raddeduko ho dutiinii Pinii ka hataho mohluka nyimo chukila ho Pinii mi heriido,

¹⁷ lubiidola, “Ngunu niimi payapacho ludu, Attoh Pinii Tamo, huna dunii ho dutiinii, niimpalukoda no niika kahe harchichike mi lala la ho sangii ritii.

¹⁸ Ganda atañ hadii ritii, hojalo niika hadii hii ahtii, ho shiinii atañmi halii dupa myodu ahtiiku, niika miira atañmi ahmiñayiñ bidukupa, nyibuhenii atañ mila ho piniimiyu atañmi, ho hutiina niika armyañ mi biiso nyadonii, anyerumi atu la kahe, ho pyadu dupa kiiddiapiñ mika pyadulonii bomi.”

¹⁹ Ho Pinii ka dariiganda daka piniiude hii miikone, ho mohka hemmesiiniiñ bako mi kapane mohka piniiude ka uraho; ho hiiko dolya kiibyone, adu-abiñne, yapuñ genne, myobu hune ho hempḛr uro tariñ rine.