MIHUKAKIÑNIIÑ 10 - NITI GONTU N.T. (BSI)

Miidopopi la Atu Karkiesiilyo

¹ Ho ngo koneya tamo miidopopi dariiganda hokii tola dopa kapa, jomii lo apu biiko tola, mohka adiñ ayoh ho nyimeyaru giitola, ho mohka nyimo hii danyi chitañ, ho mohka alih hii yamu hokii ka siirañ chuli.

² Mo karkiesiilyo atu kone biido mohka alah ho khako biitola. Ho mo mohka liihbi alih mi siimie ho dahatii, ho mohka liichi alih hii kiiddi ho,

³ ho gyodo hempḛr goropa, patii ka gyuchañho; mohka gyolyi ho, rongkannunii yapuñ genii hii gerine.

⁴ Ho yapuñhii rongkanuhe gengkele, ngo kepa miito, hojalo ngo tapato luniiñ dariiganda hokii lubiidola, “Jhippotoku yapuñ rongkanuhe gembii dola ka luniiñmi, ho hiimi kelyayo.”

⁵ Ho miidopopi humina ngo siimie la kiiddi ho dapa kapa tonii mohka lahbi alah mi dariiganda ho yucha lala

⁶ ho hemmetii mohkiilo huna ayu dahepa sankiñ donii, huna dariiganda mi putiinii ho hiiko hoka donii atañmi, ho kiiddiapiñ mi ho hiikohoka dunii atañmi, ho siimie mi ho hoka danii atañmi, niimpalukoda dakañ ano kumadopa,

⁷ hojalo niimpalukoda kanunii miidopopi ka goropaka siirii mulyi allo ho, Pinii ka michilamanii drih, mohka miira nyibuhenii atañ mika hemme biniiñhii, lyipe kendo.

⁸ Hiikahiiba ho luniiñ nii mina ngo tapa tonii dariiganda hokii hiira ngiimi luhii, lubiidola, “Inge, karkiesiilyo mi labii he niihna miiko tola donii miidopopi ka alah ho, huna siimie la kiiddi nyiho danii.”

⁹ Hopa ngo miidopopi ko intehe ho mohmi luto hiika atu karkiesiilyo mi ngiimi bipe; ho mo ngiimi luhii, “Simi labiihe ho diito; siikasi niika errepa kochi kendoke, hojalo tangualha hiilyañ tihi kendoke niika aguñho.”

¹⁰ Ho ngo atu karkiesiilyo mi miidopopi ka alah hokii lala la ho hiimi diito; hiikahii tangualha hiilyañ tihi ne ngiika aguñho, hojalo ngo hiimi diiku kiile ngiika erre hii kochi rine.

¹¹ Ho ngiimi lukotii, “No hiira nyibuhento loda abuje miyu atañka piigo mi ho ganda atañ ho aguñ atañ ho radde atañmi.”