MIHUKAKIÑNIIÑ 1 - NITI GONTU N.T. (BSI)

¹ Jisu Kristo ka kakiñniiñ, nii mina Pinii mohmi bitiinii mohka miira atañmi kakiñ dupa niihna hempḛr nyibya lyikiñ donii; ho mo siika siimi chindopa miitii miidopopi mi mohka miira Jon ko kiiniñ lala,

² huna haki bitiinii Pinii ka aguñmi ho Jisu Kristo mika pyako niimi, hikha mohka kapanii lohepa.

³ Lyanko kendo hii huna goropa ridonii nyibuheniiñ aguñ atañmi, ho lyanko kendo hii huna tadonii, ho huna luniiñtadonii hoka keniiñmi; niimpalukoda myodu si tunii doku.

Gyoliñkonii Pengkanu hemi Ayahelyi

⁴ Jon kokiila pengkanuhe gyoliñkonii Asia hoka doniimi: Aroh-aya la chimie mi nunupa bilyike mohkokii huna dunii ho huna dutiinii ho huna ahkiñ donii, ho kanuhe yajiyallo kokii huna mohka raddeduko hataho danii,

⁵ ho Jisu Kristo lotii haki binii boko hokii, shiinii hokiika kapyo japa ka bukonii, ho kiiddiapiñ daka radde atañ mika sangiinii. Mohmi huna ngunumi hendonii ho ngunumi dasḛr miitiiku ngunuka ingyamiigya atañ hokii mohka ai lo

⁶ ho ngunumi miitii raddeganda pa, mohka Pinii la Aba nyika nyibupa, mohmi assañ kencho ho pamiñbiinii ayudahe dokiñ cho. Amen.

⁷ Kato, mo jomiika agiñho ahla do, ho kone abika amee mohmi kapa kendo, hiika atañ lohepa huna mohmi niikhii tiinii; ho hikha kiiddiapiñ daka halugiira atañ heru kendo mohkiipa. Hiipa tiirḛ. Amen.

⁸ “Ngo Alpha ho Omega ke,” Pinii Attoh ludo, huna dunii ho huna dutiinii ho huna ahkiñ donii, Tamoja.

Kristo ka Mihukaniiñ

⁹ Ngo Jon, nunuka anu, huna nunuka agiñho hembo montiinii Jisu ko hentḛrkanyi mi ho raddeganda pa ho yanupa pigii biidola, siilokiiddi Patmos luniiñho ahtii Pinii aguñ kiipa ho Jisu mika pyako kopa.

¹⁰ Ngo Yajiyallo ho dato Attoh ka allo ho, ho ngo tapato ngiika kiiliñho hempḛr goropa siirii muniiñ hiilyañ

¹¹ lubiidola, “Keto niihna no kapadonii khetaho ho hiika hiimi pengkanuhe gyoliñkonii atañ ko bito, Ipisia ho Ismarna Pargamum ho Taitira ho Sardis ho Piladelpia ho Laodisia ho.”

¹² Ho ngo mokurla kakele ngiimika luniiñmi, ho mokurla dola ayyiñ hokiika punii yamumiiru kanuhe kapato,

¹³ ho yamumiiru ka liipa jaho kone miyu ka oho hiilyañ, tarii obyo hokii giitola ho mohka habyañho ayyiñ hokii huriñmi giitola;

¹⁴ mohka adiñ la mohka dimmu nyi puloo tano mitrḛ puloo yatola, pembe chitañ puloo; mohka amee hii yamu miilyo tila donii hiilyañ,

¹⁵ mohka alih hii bitie mika hilu miitiinii hiilyañ, yamu loka dariimiinii hiilyañ, ho mohka luliñnii hii abuje yasie atañka adunii hiilyañ;

¹⁶ mohka lahbi alah ho takḛr pukkannu biitola, mohka aguñ hokii hempḛr ilyo lyogañ lyoro areh giinii luliñdo, ho mohka nyimohii lolyañ danyi chitañ hudakiila.

¹⁷ Ngo mohmi kapa lala, ngo mohka alih ho chuhato shiinii hiilyañ. Hojalo mo mohka lahbi alah mi ngiiko tencha lala, luhii, “Biisoyo, Ngo kapyoja ho kamija ke,

¹⁸ ho turnii koneke; Ngo shiito, ho kato ngo turduku ayudahepa, ho ngiiko sabe do Shiiniiñ la nelimyoko nyikii.

¹⁹ Siisi keto niihna no kapa donii, niihna donii ho niihna lyikiñ donii siika hiiba ho.

²⁰ Michilamanii kanuhe takḛr atañmi nii mina no ngiika lahbi alah ho kapa tiinii, ho kanuhe ayyiñ hokiika yamumiiru mi, kanuhe takḛr atañ hii kanuhe miidopopi atañ ke ho kanuhe yamumiiru atañ hii kanuhe gyoliñkonii atañke.