METHU 7 - NITI GONTU N.T. (BSI)

Mi Mika Haliiniiñ

¹ Halii yo, niimpalukoda nunu mitrḛ halii kemake.

² Niihtañpa nunu ayakacho katii hiitañ pa nunu mitrḛ halii kendoke, ho niimkane pa nunu khiiliitii hiimkane pa nunu mitrḛ khiilii kendoke.

³ Niimpa nunu nunuka anubarmii ka amee hoka hiiri amii pere giiniiñ miya kahado, atoh amee hoka sampo kane giiniiñ miya hempa siimapa?

⁴ Malo niihtañpa nunu nunuka anubarmii mi lula kendo, Niika amee daka hiirimi lapa toso, niika amee hoya sampo kane pohe giido la?

⁵ Nunu apukahi, kapyopa nunuka amee daka sampo miya lapa siito rañ, hoke nunu didḛrpa kappa lakiñ donii niika anubarmii ka amee daka hiirimi.

⁶ Niihna darii donii hiimi akie atañmi biyo; ho nunuka tassañ mi alyee mi kubiyo, hiilamiikoda mohlu mohluka alih nyota lala ho niimi asiipa miikiñ doke.

Kuto, Meto, Padiñ to

⁷ Kuto, ho nunumi bikiñ doke; meto, ho nunu mepa kendoke, padiñto, ho alyeh miiko bikiñ doke.

⁸ Niimpalukoda kone abi kunii atañ lanya biida, ho huna menya donii mepa nyadu, ho hutiina padiñ nyadonii, hiipa miiko bikiñdo.

⁹ Malo nunu niihtañ miyupe, niika wiinga matiirḛ yatañ kudo koda, mohmi yalañ bikiñ dopeha?

¹⁰ Malo mo matiirḛ ngiiyyi kudo koda, mohmi tabu bikiñ dopeha?

¹¹ Nunuya, diimmah siido tiirḛ, chindo niihtañ aya ahmiñayiñ na bikiñ donii nunuka wiinga atañmi, niimkane kayeya nunuka Aba dariiganda hoka duniibo bikiñdo huna mohmi kuchinii!

¹² Niihtañpa no mihmi niipa miibi kencho hiila hendo, hiitañpa no mohlupa miibito; niimpalukoda siika sike dapo la nyibuhenii atañ.

Hagya Ponchu

¹³ Hagya ponchu hopa ahto; niimpalukoda hagya poro ho lembo hii impyodo, hii byasako dalyi hoke ingiidonii, ho hiiko hopa hempḛr abuje ahnya da.

¹⁴ Hagya ponchu siido ho lembo iru siido, hii sango dalyi hoke ingii donii, ho hiimi lamasii kapa siidonii.

Sannii la Hiika Ahee

¹⁵ Hendi nyatolya gollumisu nyibuhenii atañ kokii, nunuko subuñ ammu hokii giitola ahkiñdo hojalo ahha ura hii siipya ke.

¹⁶ Nunu mohlumi mohluka ahee loke kala kendonii. Roahee si tareapya ho giidu peha, malo tarro ahee si piita sannii hokii peha?

¹⁷ Hopa, kapane aya sannii hii aya ahee hidu, hojalo ayamanii sannii hii ayamanii ahee hidu.

¹⁸ Aya sannii hii ayamanii ahee hila kemma, hii chulipa ayamanii sannii hiitiirḛ aya ahee hila kemma.

¹⁹ Sannii buhe abi niihna aya ahee hima nii hiimi palo lala la yamuho jopa liikiñdo.

²⁰ Si chulipa nunu mohlumi kala kendoke mohluka ahee-amḛrlo.

Ngo Pema Niimi Kachiñ Ma

²¹ Kone abi hutiina ngiimi ludonii, Atoh, Atoh, hii dariiganda ka raddeganda ho ahla kemma, hojalo huna dariiganda daka Aba ka henko jaho miidonii hii kontiisii ahla kensu donii.

²² Hiika allo ho abuje ngiimi lukiñ do, Atoh, Atoh, ngunu niika armyañ pa nyibuhema toha, ho niika armyañ lo igii mompa matoha, ho abuje tamo-chikho miigo miima toha niika armyañ pa?

²³ Ho Ngo mohlumi luchi, Ngo nunumi iche tiirḛ kachiñ make; ngiiko hokii insa nyato, nunu ayamanii miinii atañ.

Ude Penii Anye

²⁴ Hutiina ngiika luniiñmi tapa lala ho hii chulipa miidonii hiike hendinii miyu huna atoh ude mi yalañ hoka pembii donii hiilyañ;

²⁵ ho miido hutii, yasie tuha siitii, ho allyi heha la hiika ude mi heda siitii, hojalo hii tehyi ma, niimpalukoda hii yalañ ayoh ho pentii.

²⁶ Ho hutiina ngiika aguñmi tapa lala ho hii chulipa miinya manii hii piicha miyu chulido huna atoh ude mi suru ho pembii donii;

²⁷ ho miido hukele, ho yasie tuha kiile, ho allyi hekele ude ho hedatii, ho hii tehyi datii; ho hiika tehyi nii hii hempḛr urotii.

Jisu ka Otority

²⁸ Ho Jisu siika kolobiisie niimi luja kukele, miyuatañ mohka tonsḛr niimi aluñ nyatii,

²⁹ niimpalukoda mo mohlumi tonsḛrtii hukohona otority giidonii chulipa, ho mohluka pagenii atañ chulima.