METHU 6 - NITI GONTU N.T. (BSI)

Hapumibya Biniiñ Piigo mika Tonsḛrniiñ

¹ Nunuka mihmika heriilyiho hendi biidola miito mihmi miikiñ talyi hiila miiyo; niimpalukoda hiilamiikoda nunu dariiganda daka Aba kokii ajunii juniimi kappa kemake.

² Hopa, niidajalo nunu biliñ talyi, nunuka hataho siirii gyuke nelyayo, apukahi atañka sinagog ho lembo hoka miichañ ho, mohlu miyu atañlo assañ kodupa hiila miida. Jijeloda, Ngo nunumi lukoso, mohlu mohlupa ka ajunii juniimi latiiku.

³ Hojalo nunuka biliñ lyiho, nunuka lahchi alah mitrḛ chinke neyo nunuka lahbi alah loka miiniiñmi,

⁴ niimpalukoda nunuka biniiñ mi bisie la bito, ho nunuka Aba bisie laka biniiñ mi kalala mo nunumi ajunii juniimi bikiñ doke.

Kuniiñ Piigo Mika Tonsḛrniiñ

⁵ Ho niida nunu kuchi, nunu apukahi hiilyañpa lyiyo; niimpalukoda mohlu sinagog ho, lembo aruñho bari tola dala kula miinala lyidu, mihlo kappa kodupa hiila. Jijeloda, Ngo nunumi lukoso, mohlupa ka ajunii juniimi mohlu latiiku.

⁶ Hojalo niida nunu kuchi, nunuka chidiiho ingekula ho alyeh mi miipiñ lala ho kuto nunuka Aba mi huna tasiela tala dunii; ho nunuka Aba tasiela tala lala nunumi ajunii juniimi jubi kendoke.

⁷ Nunuka kulyiho piigo amapa Midomiyu atañka miichañ ho miiyo; niimpalukoda mohlu hiila hendu mohluka hempḛr obyo paka luniiñmi talii lyido hiila.

⁸ Mohlu chulipa lyiyo, niimpalukoda nunuka Aba nunuka kuma rampa nunuka anna niimi chindoke.

⁹ Si chulipa kuto: Dariiganda hoka duniibo ngunuka Aba, Niika armyañ mi kaye kiinesa.

¹⁰ Niika raddeganda mi ahke nento. Niika henko doke nento, kiiddiapiñ so niihtañpa dariiganda ho do.

¹¹ Dumiñ ka ngunu diijumi mi siilo bipe;

¹² Ho ngunuka gyandimi hello kupe, Niihtañpa ngunu tiirḛ ngunu kokiika giinii bomi hello bitii;

¹³ Ho tenkalarka ho ngunumi aliiyo, hojalo ayamanii hokii ngunumi tupyape.

¹⁴ Niimpalukoda nunu matiirḛ mika palle miiniiñmi hello dokoda, nunuka dariiganda daka Aba tiirḛ nunumi hello kendo;

¹⁵ hojalo nunu matiirḛ mihmi mohluka palle miiniiñmi hello makoda, nunuka Aba tiirḛ nunuka palle miiniiñmi hello kemma.

Nyoniiñ Piigo Mika Tonsḛrniiñ

¹⁶ Ho niida nunu nyochi, heru busu kapa kakiñyo, apukahi hiilyañ, niimpalukoda mohlu mohluka nyimo mi moyo rusu dukiñla mihmi nyodo hiila kakiñdu. Jijeloda, Ngo nunumi lukoso, mohlupa ka ajunii juniimi mohlu latiiku.

¹⁷ Hojalo nunuka nyolyiho, nunuka adiñho kutu negii tolya ho nyimo harsu tolya,

¹⁸ nunuka nyoniiñ mi miyu atañlo kala koyo hojalo nunuka Aba lo huna kasiela kala dunii; ho nunuka Aba kasie laka kala dunii nunumi ajunii jubi kendoke.

Dariiganda Hoka Mingo

¹⁹ Siika kiiddiapiñ so nunu alḛrdrih atii tiikuñ biiyo, nohna harti ahla ho tachi pudonii ho nohna diipyonii ahla ho diipyo donii,

²⁰ hojalo nunuka alḛrdrih mi dariiganda hoya atii tiikuñto, nohna tagyu tiirḛ pulama ho harti tiirḛ ahlama ho diipyonii tiirḛ ahla ho diipyo lama.

²¹ Niimpalukoda noh nunuka alḛrdrih do, hiikaho nunuka ahha tiirḛ dobodo.

Apo Ka Hutoh

²² Amee si apo ka murupa lyido. Hopa, nunuka amee matiirḛ kadiko kado koda, nunuka hikha apo ho poteje hutoh giikiñdo;

²³ hojalo nunuka amee matiirḛ kagya dokoda, nunuka hikha apo hii kamo ramba dokiñdo. Nunu koka muru matiirḛ kamola dokoda, nekane kamo kendo!

Pinii la Buniipanii

²⁴ Kone hetrḛ atoh anye mi miiho lakiñma; niimpalukoda konemi hempa lyalala ho konemi hendopa lyikiñdo, malo konemi hensañ lyalala ho konemi hempa heya kendo. Nunu Pinii la mammon nyimi miiho lakiñ make.

²⁵ Hopa Ngo nunumi lukoso, nunuka sangomi hena siiyo, niihna diichinii malo niihna tanchinii, malo niika apo mi, niihna giichinii. Sango si diigomi khiiniiñ yama siipeha, ho apo si abitarii mi?

²⁶ Yapuñ daka piita gonii atañmi kato; mohlu lilo tiirḛ lilo ma ho amoo tiirḛ pima ho nesu hotiirḛ bakuñ ma, hojalopa nunuka dariiganda daka Aba mohlumi diigo mi bida. Nunu siika atañmi khiiniiñ yapa lyimasa ehna?

²⁷ Ho nunu apur hokii huyana hena biidola haka kohe jalo abu yapa sangomi sancha lakiñ donii?

²⁸ Ho niimpa nunu giigopa hena du? Zabyo daka apoo atañmi kato, niihtañpa mohlu sanda; mohlu khelanyola tiirḛ miima ho niibyutano tiirḛ miima;

²⁹ hojalo Ngo nunumi lukoso, Solomon tiirḛ hiimkane tatukatu pa dusune siika atañka ako chitañ patrḛ lyimane.

³⁰ Hojalo Pinii matiirḛ zabyo hoka tammi dunii miya hiimkane hembyuñ do, siilo sala la ho ardaka yamu hoka hompa saniiñ mi, mo nunumi siika atañmi uro yapa henkiñ ma ehna, nunu henje papo atañ?

³¹ Hopa henayo, lubiidola, niiyu diichinii? malo niiyu tanchinii? malo niiyu giichinii?

³² Niimpalukoda Midomiyu atañke siika drihpa hena nyadunii; ho nunuka dariiganda daka Aba chindoke siika atañmi nunu anna nyado hiila.

³³ Hojalopa kapyopa Pinii ka raddeganda la mohka denki miya mepyoto, ho hikha siika drih atañ mitrḛ niimi bikiñ doke.

³⁴ Hopa hena yo ardaka allopa, niimpalukoda ardaka alloka henahii ardapa dokiñ siidoke. Siilo ka henahii siilopa khe doke.