METHU 28 - NITI GONTU N.T. (BSI)

Turiturku Kuniiñ

¹ Dumoalo ahku lala, allo lotuka aro konchiho, Mary Magdalen la akoya Mary nyi byuh ho katepa intii.

² Ho kato, hiiko hempḛr uro myobu hutii; niimpalukoda dariiganda hokii Pinii ka miidopopi totii ho ahtii ho yalañ mi giipa biido, ho hiiko dutii.

³ Mohka ahniiñhii dolya kiibyo niitañtii, ho mohka pulye hii pembe chikañ puloo tii.

⁴ Ho dagur biiniibo mohmi biisola alyetii ho miyu shiinii hiilyañ tiiku.

⁵ Miidopopi lutii annii akha anyemi, “Biisoyo; niimpalukoda ngo chindo niinyi Jisu mi melada humina leda lala mentiinii.

⁶ Mo so nyikumake; niimpalukoda mo turi neku, mo luniiñ chulipa. Ahla, kakatocho nohna mohmi atii biinenii.

⁷ Nyibya ingela ho mohka henjeajiñ atañmi lukohe mo shiinii hokii turi neku hiila, ho kato, mo nunumi impyo yapa Galili ho inkiñdo; hiiko nunu mohmi kappa kendoke. Tageto, ngo nunumi luko biilyi ke.”

⁸ Hopa mo anye nyibyaloda byuh hokii intiiku biiso biidola ho hempḛr hempyo biidola, ho hartii mohka henjeajiñ atañmi luko dupa.

⁹ Ho kato, Jisu mohlumi kappa lala ho lutii, “Hiika atañ!” Ho mohlu haratii ho mohka alih mi gabii tola mohmi heriitii.

¹⁰ Ho Jisu mohlumi lutii, “Biisoyo; inge ho lukohe ngiika anubarmii atañmi Galili ho inge hiila, ho hiikoho mohlu ngiimi kappa kendoke.”

Dagur Biinii Boka Luko Kuniiñ

¹¹ Mohluka ila ka doho, kato, dagur biinii tonge citi ho intii ho nyibu burii atañmi lukotii hikha lyiniiñ atañmi.

¹² Ho mohlu amiabañ atañmi dakuñ kiine lala ho taka siila la, mohlu sipahi mi tiicko bitii.

¹³ ho lutii, “Miyu atañmi lukoto, Mohka henjeajiñ atañ ayoh ho ahla ho mohmi jopyo biine ngunuka imi laka doho.

¹⁴ Ho si matiirḛ govonor ka yaroo ho ahchi lyimilo, ngunu luko lubyañ talyike ho nunuko hang ahiare ahke nente make.”

¹⁵ Hopa mohlu tiicko mi labiitii ho mohluka luniiñ chulipa miitii; ho siika lukonii hii siilo jalopa Jew atañka punkoho tapa takañla do.

Jisu Mohka Henjeajiñ Atañ ko Ahdo

¹⁶ Siisi alyañhela kone henjeajiñ atañ Galili ho intii, Jisu ka mohlumi ka putoo kakiñ koho.

¹⁷ Ho mohmi kappa lala mohlu mohmi heriitii; hojalo tonge hemmotii.

¹⁸ Ho Jisu ahtii ho mohlumi lutii, “Hikha yapuñ la kiiddiapiñ nyika otority mi ngiimi bitola do.

¹⁹ Hopa inge ho hikha ganda atañ ho henjeajiñ lyidopa miinge, baptisma bingelya Aba ho Oho ho Darii Yajiyallo ka armyañ pa,

²⁰ tonsḛr tolya hikha ngiika nunumika lujubiniiñmi tatolya hiila; ho kato, Ngo nunuka agiñho kiirañ dabo talyike, kiiddimiidoh ka dodo hemi.”