METHU 25 - NITI GONTU N.T. (BSI)

Nyimuñ Alyañ hemika Lutiñnaniiñ

¹ Ho dariiganda ka raddeganda mi nyimuñ alyañ hemi khiitiñ nantii hutiina mohluka muru mi biitola ho mihielasa bomi kappa dupa intiinii.

² Mohlu yangohe piichatii, ho yangohe piibitii.

³ Piicha atañ mohluka muru mika biilyiho, mohlu kutu jobii matii mohlupa;

⁴ hojalo piibi atañ mohluka muru agiñho pinta ho kutu miilañ jobiitii.

⁵ Mihielasabo atañ nyibya ahma lyinii, mohlu miilañru imi niitetii ho imi nyatii.

⁶ Hojalopa ayohliipa ho gyuritii, Kato, mihielasabo! Ago linyato mohmi karii dupa.

⁷ Ho hikha hiika nyimuñ atañ guritii ho mohluka muru atañmi tige nyatii.

⁸ Ho piicha atañ lutii piibi atañmi, Ngunumi nunuka kutu eche bipe, niimpalukoda ngunuka muru si mipa miilyila.

⁹ Hojalopa piibi atañ lusitii, Rongkoda ngunu pala ho nunu pala khe diima; pyunii bokoya ingela ho nunupa riibii tiika.

¹⁰ Ho mohluka riidu paka inne ho, mihielasabo ahtiiku, ho hutiina henju nyatiinii hii mo agiñho ahbotii mihiemilo lasu lyiho hoka apiñ diikoho; ho alyeh mi miitiñ tiiku.

¹¹ Dahidamo lala nyimuñ tange hiitiirḛ ahtiiku, lunyado, Attoh, attoh, ngunupa miiko tope.

¹² Hojalo mo lusitii, Jijeloda, Ngo nunumi lukoso, Ngo nunumi chimake.

¹³ Hopa hendila dato, niimpalukoda nunu chimake allo mi ho myodu mitrḛ.

Miira hinge mika Lutiñnaniiñ

¹⁴ Niimpalukoda si hiila lyinii chitañdo, miyu kone myodi indupa mohka miira atañmi gyola la ho mohka doniidanii mi mohlumi kabii tolya lutii;

¹⁵ kone mi talents pengohe bitii, kone mi penye, kone mi pere, mohluka miilalula mi kabii dola bitii. Ho mo intii.

¹⁶ Huna talents pengohe labii tiinii mo nyibya loda inkula ho hiilo kiiri miina nantii; ho mo pengohe abuyapa miiliñ biitii.

¹⁷ Hii chulipa, talents penye labii botrḛ penye abuyapa miitii.

¹⁸ Hojalopa huna talents pere kontii labii tiinii intiiku ho kiiddi hekko lala ho mohka atoh ka tiicko mi alitii.

¹⁹ Siisi hempḛr myodu abuje hiiba ho hiika miira atañka atoh ahtiiku ho mohluka agiñho khiika siitiiku.

²⁰ Ho huna talents pengohe biitiinii hii ahtii, talents pengohe biibyañ liitii, lubiidola, Atoh, no ngiimi talents pengohe bi; si ngo pengohe talents abu dopa miibyañ tiike.

²¹ Mohka atoh mohmi lutii, Aya miitii, denki ho lotii miira; no eche mitrḛ lotii biida, Ngo niimi abujemi kabii kiine talyi; kiije ahto niika atoh ka hempyo sokoso.

²² Ho hiika talents penye biinii botrḛ aruñ ahhitii, lubiidola, Atoh, no ngiimi talents penye bihii; si ngo talents penye abuyapa miitii.

²³ Mohka atoh mohmi lutii, Aya miitii, denki ho lotii miira; no eche mitrḛ lotii biida, Ngo niimi abujemi kabii kiine talyi; kiije ahto niika atoh ka hempyo sokoso.

²⁴ Huna talent pere kontii biitii nii motrḛ aruñ ahhitii, lubiidola, Atoh, ngo chindu no luruluka miyu hiila, lilo mapa dola no amoo pidiñbo, ho no endi lilo mapa elyañ ladiñ laniibo;

²⁵ hopa ngo biisola, ho ngo ila ho niika talent mi kiiddi ho achuñto. Kato sike niikii.

²⁶ Ho mohka atoh mohmi lusitii, No diimmah ho assu miira! No chindo ngo lilo mapa dola amoo pidiñbo ho ngo endi liimapa elyañ ladiñ laniibo hiila?

²⁷ Hiila koda no ngiika tiicko mi kiirilya miina nantii koda, ho ngiika ahlyi kuho ngiimi ngiika tiicko agiñho atu lata la lado kupa.

²⁸ Hopa mohkokii talents mi latiiku, ho hiimi hiika pelyañhe biinii bomi bitii.

²⁹ Niimpalukoda hukiina donii hiimi abuyaya bikiñdo, ho mohkii abuje dokiñdo; hojalo hukiina nyimanii, niihna mohko donii hiimi miilañ lara biikiñdo.

³⁰ Ho piigoama nii miira mi kamoramba doko ho jopa liibiido; hiiko miyuatañ khela ho mohluka aih mi nyensu la dokiñdo.

Kami Japaka Ayakacho Kakuniiñ

³¹ Miyu ka Oho ka huda khada ahlyi kuho, ho hikha miidopopi atañka agiñho, mo mohka tatu katu duta naniiñho dukiñdo.

³² Mohka hataho hikha ganda daka miyuatañ dakuñ kendo, ho mo nenkhu nenche kendo subuñ sornii ka subuñ mika siibiñ kokiika nenkhu nencha jaho,

³³ ho mo subuñmi mohka lahbi dalyiho atii kendo, ho siibiñ atañmi mohka lahchi dalyiho.

³⁴ Ho Radde mohka lahbi dalyi hoka danii atañmi lukiñdo, Ahto, ngiika Aba ka Lyaniiñ atañ, nunupaka dohadolo mika pulyi jaho hokii ka miimyo tola donii raddeganda mi labii heku;

³⁵ niimpalukoda ngiika haya lyiho no ngiimi diigo bihii, ngiika yasie tana lyiho no ngiimi yasie bihii, ngiika nyibo pa lyila ahlyi ho no ngiimi kariine,

³⁶ Ngo arapa dato ho no ngiimi pulye agii, ngo achihla doto no ngiimi kalyañ ha, ngo patiihude ho duto ho no ngiiko ahhii.

³⁷ Ho denki atañ mohmi luko lusi kendo, Attoh, niido ngunu niimi haya dopa kappa ho niimi diigo bihii, malo yasie tana lyiho ho niimi yasie bihii?

³⁸ Ho niido niimi ngunu nyibopa kappa ho niimi gyolii, malo arapa kappa ho niimi pulye agii?

³⁹ Ho niido ngunu niimi achih dopa kappa malo patiihude ho niimi kaha?

⁴⁰ Ho Radde mohlumi luko lusi kendo, Jijeloda, Ngo nunumi lukoso, nunuka siika khiima janii ngiika anubarmii atañ mika kalyañ nii hii, nunu ngiimi ke kalyañ donii.

⁴¹ Hiika hiiba ho mo lukiñdo mohka lahchi dalyi hoka danii atañmi, Ngiiko hokii insa nyato, nunu bekonii atañ, yamu lyame lama lyako ho igii la mohka miidopopi atañ paka miimyo tola doko;

⁴² niimpalukoda ngiika haya laka daho nunu ngiimi diigo bima, ngiika yasie tana lyiho nunu ngiimi yasie bima,

⁴³ Ngiika nyibopa daho nunu ngiimi gyoliima, arapa daho nunu ngiimi pulye agiima, achihla doto, patiihude ho duto ho nunu ngiimi kahama.

⁴⁴ Ho mo lutrḛ luko lusi kendo, Attoh, niido ngunu niimi haya dopa kappa to malo yasie tana dopa malo nyibopa malo arapa malo achih dopa malo pattiih udeho, ho niimi ngunu kalyañ mato?

⁴⁵ Ho mo lusi kendo mohlumi, Jijeloda, Ngo nunumi lukoso, nunu ngiika siika khiimaniija anubarmii kone mi kalyañ tama lutii koda hii ngiimi ke kalyañ tama lutiinii.

⁴⁶ Ho mohlu mungu mapa ka miikhiiñ ko gandaho inkiñdo, hojalo denki atañ santḛrlamanii sango dokoho.