METHU 24 - NITI GONTU N.T. (BSI)

Jisu Piniiude Mika Pyadu Losa niimi ludo

¹ Jisu piniiude mi apatekula intiiku ho adoh ila dotii, hiiko mohka henjeajiñ atañ ahbiila mohmi piniiude ka ude atañmi nyakiñ tii.

² Hojalo mo mohlumi lukotii, “Nunu hikha siika atañmi kappa do, kappa maha ehna? Jijeloda, Ngo nunumi lukoso, so yalañ puhe tiirḛ yalañ puheka hahoho dokiñ kuma, hiikahii giipa loko mapa.”

Ahiare La Miihimiire

³ Mo Olives Putoo ho dukele, henjeajiñ atañ mohko ahsiela ahtii, lubiido, “Ngunumi lukope, si niida lyikiñdo, ho nii kagiñnanii dokiñdo niika ahniiñ la ho sango ka santḛr saniiñ?”

⁴ Ho Jisu mohlumi lukotii, Hendi tolya nunu kone lotrḛ ngogii kolyayo.

⁵ Niimpalukoda abuje ngiika armyañ pa ahkiñdo, lubiidola, Ngo kristoke, ho mohlu abujemi ngogii kendo.

⁶ Ho nunu gyambo pasu niimi ho gyambo pasudo hiila tapa kendo; kato nunu ahialuñ nyayo; niimpalukoda hiila lyikiñdo lodake, hojalo anya nyanja sanii ahma ranke.

⁷ Niimpalukoda ganda ponge hii ganda ponge mi parii kendo, ho raddeganda hii raddeganda konemi, ho diime ahkiñdo ho myobu huniiñ hii ganda siiko abi hukiñ doke:

⁸ hikha siika atañsi hojalo chunchi akhii chiri biiniiñ hiilyañ pasuke.

⁹ Ho mohlu nunumi hentḛrkanyi lohepa tiilii bilyi diike, ho nunumi siidopa miilyido; ho nunumi hikha miyuatañ ngiika piigopa kanamapa miikiñdo.

¹⁰ Ho abuje henje kumapa miikiñdo, ho kone anyañmi talubalo siikiñdo, ho kone anyañmi kasu kema.

¹¹ Ho abuje amuhpaka nyibuhenii duri kendo ho abujemi ngogii kendo.

¹² Ho diimmah hii abuyaya kendo, miyu atañka hensunii lama lyukiñdo.

¹³ Hojalo huna kamikalo lohepa pigii talyinii hii lyangur kokiñdo.

¹⁴ Ho siika raddeganda ka ayapuyu mi hikha kiiddi dotrḛ ho tonsḛr khenyo kendo, hikha ganda atañmi luko lugiñ naniiñpa; hosu kamikalo hii ahkiñ siidonii.

Biisokacho

¹⁵ Hopa niida nunu biisokacho jirara kappa talyi nyibuhenii Daniel ka darii lengoho dala luniiñ hiilyañ kendo, (riniibo atañ tachiñ nyato),

¹⁶ ho Judia hoka dunii atañmi putoo ho harcha giike nento;

¹⁷ ude mantu hoka danii akañho tonya kuyo drih pachi laliñ budupa ude ura hokii;

¹⁸ ho huna ajiho danii hiitḛr ahkur kuyo tarii mi la talyiku hiila.

¹⁹ Ho aiya hiila hembido wiinga ajañ biito laka duniiñ atañpa hiika allo ho!

²⁰ Kuto niika hargii niimi dorii piilo ho lyike neyo malo dumoalo hotiirḛ.

²¹ Niimpalukoda hempḛr hentḛrkanyi dokiñ doke, Pinii ka puliñ biihokii siilo lohe paka lyika manii, ma, ronge hetḛr lyikiñ mata.

²² Ho hiika allo mi matiirḛ tudii dopa miima tiikoda, miyu kone mitrḛ lyangur lakiñ matii; hojalopa kahe konii atañ kiipa allo mi tudii dopa miibitii.

²³ Ho mi kone matiirḛ nunumi lulyi milo, Kato, Sike Kristo! malo Inka sike mo! hiimi henje lyayo.

²⁴ Niimpalukoda amuh Kristo ho amuh nyibuhenii hiila duri kendo ho kaye kagiñnanii la kahotamo miikiñ kendo, ngogya giidupa hiila, miila dokoda, kahenii atañmi.

²⁵ Tageto, Ngo nunumi luko lumyo biilyi ke.

²⁶ Hopa, mohlu matiirḛ nunumi lulyi milo, kato, mo siikhii sumu gandasi da, ho ilyayo; mohlu matiirḛ lulyi milo, Kato, mo chidiika ura si du, hiimi taje lyayo.

²⁷ Niimpalukoda dolya danyichaggo dalyiho byodo koda danyiaggo dalyi lohepa hutoh byodu, hiichuli kendo miyu ka Oho ka ahniiñ.

²⁸ Nohjalo miyu shiima dochi, hiiko piigeen puwa atañ gokuñ hadu.

Miyu Ka Oho Ka Ahsanii

²⁹ Hiika hentḛrkanyi allo loja dala la, ho danyi hii kamo rikiñdo, ho piilo hutoh byobi kemma, ho takḛr atañhii yapuñ hokii huhi kendo, ho yapuñ atañ daka harchichike hii abyu rikiñdo;

³⁰ hiikahiiba ho miyu ka Oho ka kagiñnanii hii yapuñho dari kendo, ho hikha kiiddiapiñ daka halu atañ heru nyakiñdo, ho mohlu miyu ka Oho mi yapuñ daka jomii ho harchichike ka agiñho huda khada ahla doniimi kappa kendo;

³¹ ho mo mohka miidopopi atañmi hempḛr goropa siirii mubii dola kiiniñ kendo, ho mohlu mohka kahenii atañmi hikha khonchañ hokiimi gyokuñ kendo, yapuñ pache hokii pache dalyi lohepa.

Taro Sannii Hokii Ka Chingiiniiñ

³² Taro sannii hokii siika drih mi chingiito: halloh giiliñ dalyi ho annii saliñ niimi kappa dala la, nunu chindu darupiilo ahlyi ku hiila.

³³ Hii chulipa, niida nunu hikha siika drih siimi kappa talyi, nunu chintolya mo aruñho daku, hagya aruñ jaho.

³⁴ Jijeloda, Ngo nunumi lukoso, siika santuñ ronge si santḛr kemma ke niida lohepa siika drih si lyitema.

³⁵ Dariiganda la kiiddiapiñ nyi lyukiñdo, hojalo ngiika aguñ luniiñ hii lyukiñ make.

Kone Hetrḛ Chima Allo la Myodu Nyimi

³⁶ Hojalo hiika allo la hiika myodumi kone hetḛr chimma, dariiganda daka miidopopi tiirḛ, malo Oho, hojalo Aba kontiisii chinsu donii.

³⁷ Niitañpa Noah ka myodu ho lyine, hii chuli kendo Miyu ka Oho ka ahniiñ hii.

³⁸ Niimpalukoda hiika allo ho yasie tuha marañpa mohlu diila ho talha miitii, mihie lala ho millo ayañla miitii, Noah ka hulu ura ho amiñ dayemi,

³⁹ ho nii dahepa yasie tuha matiirañ ho mohlumi ka hikha tubii mado rañ hemi mohlu chimatii, hii chuli kendo miyu ka Oho ka ahniiñ hii.

⁴⁰ Ho miyu anye aji ho dakiñdo; kone mi ingii kendo ho kone mi apakendo.

⁴¹ Annii akha anye yaperho du hula dakiñdo; kone mi ingii kendo ho kone mi apakendo.

⁴² Hopa hendila dato, niimpalukoda nunu chimake nii allo ho niika Attoh ahkiñdo.

⁴³ Hojalo siimi chinto, ude atoh matiirḛ ayoh hoka diipyo nii ahsanii myodu mi chindo koda, mo kalyala dukiñdo ho mohka ude mi danko kiine kema.

⁴⁴ Hopa nunu tiirḛ hendila duto; niimpalukoda miyu ka Oho nunuka ahlyido hiila hemado arta ho ahkiñdo.

Lotii La Lotiimanii Miira

⁴⁵ Huna hokoda lotii ho piibi miira, humina mohka atoh hikha ude mi kabii tolya hiila bitiinii, mohlumi myodu mi kabii dola mohluka diigo mi bidopa?

⁴⁶ Lyanko kendo hiika miira hii humina mohka atoh ahkur lyikuho miigo miila dopa kappa kendonii.

⁴⁷ Jijeloda, Ngo nunumi lukoso, mo hikha mohka donii panii atañmi mohmi kabii kiine kendo.

⁴⁸ Hojalo hiika diimmah miira matiirḛ atoh atoh lusu dokoda, Ngiika atoh nyibya ahkiñ make,

⁴⁹ ho mohka miira ahiñ miya miine dokoda, ho diibo tambola ow tanii atañ agiñho,

⁵⁰ hiika miira ka atoh mohka siilo ahlyido hiila hema doho ho myodu mika chima doho ahkiñdo,

⁵¹ ho mohmi miikhiiñ kendo, ho apukahi agiñho atii kendo; hiiko miyuatañ khela ho aih nyensula dokiñdo.