METHU 2 - NITI GONTU N.T. (BSI)

Danyichaggo Dalyi Hokii ka Nyibo Atañ

¹ Siisi Jisu mi Judia ka Betlehem ho butii Radde Herod ka myodu ho, kato, danyichaggo hokii chiniimiyu atañ Jerusalem ho ahtii, lubiidola,

² “Nohna Jew atañ paka Radde lyisa bomi butiinii? Niimpalukoda ngunu mohka takḛr mi danyichaggo ho kappa to, ho ngunu mohmi herii dupa ahdu.”

³ Hiimi Radde Herod tapa lala, mo ano henga henkhatii, ho hikha Jerusalem miilañ mohmi hembotii;

⁴ ho hikha nyibu burii atañmi ho miyuatañ paka pagenii atañmi gyokuñtii, mo tahii biido nohyu Kristo mi bukiñ doniiñ.

⁵ Mohlu mohmi lukotii, Judia ka Betlehem ho yuke; niimpalukoda siikasi nyibuhenii ka keniiñ:

⁶ Ho no, Betlehem, Juda ka kiiddi ho, Juda hoka donii khiima niija lemba kone make; niimpalukoda niiko hokiike akhoja kone ngiika Isrel miyu atañmi sangii niipa ahkiñ donii.

⁷ Ho Herod chiniimiyu atañmi gyosila gyokuñtii ho takḛr ka linniiñ myodu jami mohluko hokii tagiitii;

⁸ ho mo mohlumi Betlehem ho kiiniñtii, lubiidola, “Inge ho hempḛr ayapa wiinga mi menge, ho niida mepa talyi ngiimi luko lyape, niimpalukoda ngo miilañ ila mohmi herii talyila.”

⁹ Ho mohlu radde kokii tagiikula mohlu mohluka lemboho intiiku, ho kato, mohluka takḛr danyichaggo hoka kapaniihii mohluka hata dalyi ila dotii, nohna wiinga butola donii ho lohepa tiimo mapa inkañtii.

¹⁰ Mohlu takḛr mi kappa lala, mohlu hempḛr hempyo biidola sotii;

¹¹ ho ude uraho ahbiila mohlu wiinga mi mohka annii Mary agiñho kappatii, ho mohlu giihitii ho herii nyatii. Hiika hiibaho, mohluka drih mi khako lala, mohlu ahmiñayiñ bitii, ayyiñ ho narunempyo kutu ho mirr.

¹² Ho mohlumi Herod ko ahkur lyaku yo hala emmako lubii lyinii, mohlu lembo byahe yapa atoh ganda ho intiiku.

Egip Hoka Hargiiniiñ

¹³ Siisi mohluka inne kuho, kato, Attoh ka miidopopi Josep ka emmako ahtii ho lutii, “Gurito, wiinga la mohka annii nyimi ingiila, ho Egip ho hargii he, ho ngiika luko menda hemi ho duhe; niimpalukoda Herod wiinga mi mehpa miido ke, mohmi mempa dupa.”

¹⁴ Ho mo guri biila ho wiinga la mohka annii nyimi ayoh liipa ho gyogiitii, ho Egip ho hargii tii,

¹⁵ ho Herod ka shiimiñ da hemi ho dutii. Siikasi Attoh ka nyibuhenii mi luna nala luniiñmi lyipe kiine dupa lyitii, “Egip hokii ngo ngiika wiinga mi gyoliñ tii.”

Himme Atañ Mika Menniiñ

¹⁶ Ho Herod, chiniimiyu atañ mohmi gollutii byomi hiila chila lala, hempḛr hadiitii, ho mo kiiniñtii ho hikha milobo atu budu ronye malo hiimika ajañ yami menge Betlehem ho hikha aruñare hoka dunii hemi, chiniimiyu kokii niihtañpa mo tapa tii hiika myodu jami khiirii biidola miike nentii.

¹⁷ Ho hii lyipetii nii hiilana nyibuhenii Jeremiah lutiinii:

¹⁸ “Ramah ho aguñ gonge tapatii, hempḛr heru ho goro paka kheniiñ mi. Rachel mohka oho atañpa khetii; mo myaniiñ mi tama tii, niimpalukoda mohlu nyiku matii.”

Egip Hokii Ka Ahkur Kuniiñ

¹⁹ Herod ka shiine kuho, kato, Attoh ka miidopopi Josep ka emmako Egip ho ahtii, lubiidola,

²⁰ “Gurito, wiinga la mohka annii nyimi ingii kula, ho Isrel ka kiiddi ho ingeku, niimpalukoda wiinga ka sango mika mehniibo shiine kuke.”

²¹ Ho mo guri tiiku ho wiinga la mohka annii nyimi ingii kula, ho Isrel ka kiiddi ho intiiku.

²² Hojalopa mo Arkelas Judia mi sangiigyagii niipa dusi duku mohka aba Herod ka dukoho hiila tapalala, mo hiikoho biisola ahkur nanku matii, ho mohmi emmako luluñ bulyinii mo Galili ka gandachie ho ingu giitii.

²³ Ho mo ila ho Nazaret hiiniiñ citi ho dutii, niimpalukoda nii hiila na nyibuhenii atañ lutii nii hiimi lyipe kiine dupa, “Mohmi Nazarene hiila gyokiñdo.”