METHU 19 - NITI GONTU N.T. (BSI)

Jisu ka Tonsḛrniiñ Byasunii Piigo mi

¹ Siisi Jisu siika kolobiisie mi luja tekula, mo Galili hokii intiiku ho Judia ka ganda Jordan mi ahii yala ahtii;

² ho hempḛr miyu taro mohmi imbo montii, ho mo mohlumi hiiko miipya bitii.

³ Ho Parisi atañ mohko ahtii ho mohmi tenkatii takabiidola, “Atoh ka mihie mi byasu lakiñ dopeha hang lugo konepa?”

⁴ Mo lusitii, “Nunu rika matopo huna lotuho mo anye mi putiinii mo anye mi milo bola nyimii pa putii hiila,

⁵ ho lutii, ‘Hopa milobo mohka annii-aba mi apatela mohka mihie agiñho dubo kendo, ho anye hii apo konepa lyikiñdo hiila’?

⁶ Hopa mo anye, anye kumake hojalo apo koneku. Niihmina Pinii pudiñ bitiinii, hiimi miyu diipelupe bilyalyo.”

⁷ Mohlu mohmi lutii, Hokoda niimpa Mose lutii byasu tiiku hiila paniiñpota bila lala, ho mohmi apatolya hiila?

⁸ Mo mohlumi lutii, Niimpalukoda nunuka ahha alḛr kopa Mose nunumi atoh mihie mi byasu dopa lutii, hojalo lotuho si hiila nyimane.

⁹ Ho Ngo nunumi lukoso: hujalopa atoh mihie mi byasu talyi, ipfyo niimi kontii apalala, ho koneya mihie lahchi, hii ipfyo dokuke.

¹⁰ Henjeajiñ atañ mohmi lutii, “Milo boka lugo matiirḛ sitañ koda mohka mihie agiñho, mihie millo lasu maniilya aya yamasa?”

¹¹ Hojalo mo mohlumi lutii, “Hikha miyuatañ siika luniiñ siimi talii lakiñ make, hojalo hutii mina siimi bitiinii hiipa siike.

¹² Niimpalukoda tange bulyi hokiija nyimlo pa bukotii, ho nyimlo tange mi miyuatañ nyimlo pa miitii, ho nyimlo tange atoh atoh nyimlo pa miisutii dariiganda ka raddeganda ka piigopa. Huna simi talii ladonii, hiimi talii kiineto siimi.

Jisu Himme Atu Atañmi Lyambiido

¹³ Ho himme atañmi mohko ahgii bitii niimpalukoda mohka alah mi mohluko tengala ho kubi kiinedupa. Henjeajiñ atañ miyu atañmi gatii;

¹⁴ hojalo Jisu lutii, “Himme atañmi ngiiko ahke nento, ho mohlumi lutiñyo; niimpalukoda dariiganda ka raddeganda hii mo lutañ payake.”

¹⁵ Ho mo mohka alah mi mohlumi tenka tekula ho intiiku.

Mingo Yapa Atu Kone

¹⁶ Ho kato, kone mohko ahtii, lubiidola, “Tonsḛrbo, nii aya miigo ngo miido kodape, santḛrlamanii sango kappa kendonii?”

¹⁷ Ho mo mohmi lutii, “Niimpa no ngiimi takadu niihna aya hiila? So kone aya hiila dopeha. No matiirḛ sango kappa nando koda, lujubiniiñ mi taliito.”

¹⁸ Mo mohmi lutii, “Nii bomi?” Ho Jisu lutii, No melyayo, no ipfyo lyayo, no diipyo lyayo, no amuhpa haki dulyayo,

¹⁹ Niika aba la annii nyimi khiitolya, ho, no niika ariapii mi atoh mika henchañho hentolya.

²⁰ Hiika yapa atu mohmi lutii, “Hikha siika atañmi ngo miitii; niihpe ngo miigo tiinii?”

²¹ Jisu mohmi lutii, “No matiirḛ digoabiaya nando koda, inge, pyunge niihna niiko donii ho arro atu atañmi binge, ho niikii dariiganda ho alḛrdrih dokiñ doke; ho ahto, ngiimi imbo monto.”

²² Yapa atu siimi tapa lala mo heru biidola intiiku; niimpalukoda mohkii abuje ganda nencha dotii.

²³ Ho Jisu lutii mohka henjeajiñ atañmi, “Jijeloda, ngo lukoso nunumi, mingo miyu pa hempḛr ahru kendo dariiganda ka raddeganda ho ahdupa.

²⁴ Hiira ngo lukoso, uth ka pasu ubu hoka pabonii ya papyo boya kendo mingo miyu ka Pinii ka raddeganda hoka ahniiñmi hentola.”

²⁵ Siimi henjeajiñ atañ tapa lala mohlu hempḛr hemurtii, lubiidola, Hu hokoda lyangur kola kendo?

²⁶ Hojalo Jisu mohlumi kadi lala ho mohlumi lutii, “miyu pakoda si miila kema, hojalo Pinii pakoda kapane drih mi miila kendoke.”

²⁷ Ho Pitar lusila lutii, “Kato, ngunu kapanemi apateku ho niimi imbomondu. Niihpe hokoda ngunupa donii?”

²⁸ Jisu mohlumi lutii, Jijeloda, Ngo nunumi lukoso, niti dohadolo so, niida miyu ka Oho mohka akhoja radde dukoho duchiku, nunu hutiina ngiimi imbo mondonii hiitḛr alyañlenye radde dukoho dukiñ doke, Isrel ka halu alyañlenye mi sangii gyagiila.

²⁹ Ho kone abi huna ude malo anuabañ malo barmii malo aba malo annii malo himme malo ganda nencha, ngiika armyañ kiipa apatiinii, hii lange abuyapa pasi kendo, ho santḛrlamanii sango mi kappa kendota.

³⁰ Hojalo abuje kapyo hii kami kendo, ho kami hii kapyo kendo.