METHU 18 - NITI GONTU N.T. (BSI)

Kayeja Hupe?

¹ Hiika myodu ho henjeajiñ atañ Jisu ko ahtii, lubiidola, Huna dariiganda ka raddeganda ho kayejanii?

² Ho himme kone mi mohko gyolii lala, mo hiika himme mi mohluka punko jaho dake nentii,

³ ho lutii, Jijeloda, Ngo nunumi lukoso, nii dahepa nunu hengu la siika himme chitañpa lyitema, nunu pema dariiganda ka raddeganda ho ahla kemake.

⁴ Hujalopa siika himme chitañ yanu talyi, hii dariiganda ka raddeganda ho kayeja.

⁵ Hujalopa si chitañ himme mi karii talyi ngiika armyañ pa hii ngiimi ke karii donii;

Ingyamiigya Dopaka Tenkalarka niiñ

⁶ Hojalo hujalopa sokii kone mijalo ngiimika henjeniimi ingyamiigya dopa miipa talyi, hiika miyu pa langu ho sampo poro pohe palii giila ka hempḛr urañ yasie siimie hoka chubañ haniiñlya aya yakiñdo.

⁷ Aya hiila hembido dohadolo mi ingyamiigya dopaka tenkalarka niimi! Niimpalukoda tenkalarka ahniiñ ahkiñdo, hojalo aiya la hembido huko hokiina tenkalarka hii ahdonii!

⁸ Ho niika alah malo niika alih matiirḛ niimi ingyamiigya dopa miigii domilo, hiimi papa siito ho hiimi ripato; alih alah buhe giima paka sango kappa nii niipa aya lyakiñ doke alah bunye malo alih bunye giito laka lyangu lama nii yamuganda hoka jolii kosa niimi.

⁹ Ho niika amee matiirḛ niimi ingyamiigya giido milo, hiimi harpa lila la ho hiimi ripato; amee puhe giima paka sango kappa niisi niipa aya lyakiñ doke amee punye giito laka yamuganda hoka jopa loko saniiñmi.

Subuñ Lyuniiñ Mika Lutiñnaniiñ

¹⁰ Henditolya no siika atu kone mitrḛ khiima pama miilyayo; niimpalukoda ngo nunumi lukoso dariiganda daka mohluka miidopopi atañ kiirañ dariiganda hoka dunii boka Aba ka nyimo mi kalada.

¹¹ Niimpalukoda Miyu ka Oho lyunii mi lyangur dupake ahtiinii.

¹² Nunu nii hiila hendo? Miyu konekii matiirḛ subuñ lange dakoda, ho dore lyune koda, mo kowakhangela dorkowahemi putoo ho apatela ho hiika lyunii dore mi mete kemma siipeha?

¹³ Ho hiimi matiirḛ mebii doku koda, jijeloda, Ngo nunumi lukoso, mo hiika dore pa ano hempyo kendo lyuma nii kowakhangela dorkowahemi hentola.

¹⁴ Hopa siikasi ngiika dariiganda daka Aba ka henju ke sokii donyo dore tiirḛ lyuma dokoda hiila.

Niida kone Ingyamiigya talyi

¹⁵ Nunuka anubarmii matiirḛ niimi miigya dokoda, ingela ho mohmi mohka miigya niimi lukohe, niinyika punko kontii. Mo matiirḛ niimi tado koda, no niika anubarmii mi hiira lulyañ giidoke.

¹⁶ Hojalo mo matiirḛ niika luniiñ tama koda, kone jalo malo anye jalo niika agiñho ingiito, niimpalukoda aguñ gonge abi goliñ niimi talya niipa anye jalo malo hingejalo.

¹⁷ Mo matiirḛ mohluka luniiñmi tama lyimilo, hiimi gyoliñkonii mi lukoto; ho gyoliñkonii ka luniiñ mitrḛ mo talii tama lulyi milo, mohmi no Midomiyu malo biijokajo myaniipa henda siito ku.

Miike Neniiñ la Miike Nemaniiñ

¹⁸ Jijeloda, ngo nunumi lukoso, niijalo nunu kiiddiapiñ so talii siichi hiimi dariiganda hotiirḛ talii kendo, ho niijalo nunu kiiddiapiñ so talii siitema hiimi dariiganda hotiirḛ talii kema.

¹⁹ Hiira ngo nunumi lukoso, niinyi anye matiirḛ kiiddiapiñ so talii siila niijalo niinyi kuchi, hiimi niinyipa miibi kendo ngiika dariiganda daka Aba.

²⁰ Niimpalukoda noh anye malo hinge ngiika armyañ pa dachi, ho Ngo mohluka punkoho dadu.

Hello Lamanii Miira mika Lutiñnaniiñ

²¹ Ho Pitar chabiila ho mohmi lutii, Attoh, ronepe ngiika anubarmii ngiimi ingyamiigya dokoda ho hello bikiñ donii? Rongkanu hemi abu yapa peha?

²² Jisu mohmi lutii, Ngo niimi rongkanuhe hiila lumake, hojalo rongkanuhe adi kanukhange.

²³ Hopa dariiganda ka raddeganda mi hiila tiirḛ khiitiñ nala kendo radde mohka miihonii atañ agiñ hoka tiicko khiika siiniiñmi.

²⁴ Mohka khiiri bulyi ho, mohko kone ahgii bitii huna mohkokii pagi jarlyañhe talents giitiinii;

²⁵ ho mo bila kuma tola, mohka attoh mohmi pyunge hiila lubiido, mohka mihie oho atañ miilañmi ho hikha mohkoka donii miilañmi, ho ngentoku.

²⁶ Hopa miira hii mohka liibañ khangala, mohmi lyartii, Attoh, ngiimi ichuche kalyape, ho ngo niimi hikha ngensu talyi kuke.

²⁷ Ho mohmi arrola hiika miira ka attoh hii mohmi apabitii ho mohka gyandi mi hello bitii.

²⁸ Hojalo hiika miira hii, mo ago limbii kula, mohka miira ahiñ ko ahtii huna mohkokii lange denarii pagi giitiinii; ho mohmi langu gala lala mo lutii, Niika pagi mi bito ku.

²⁹ Hopa mohka miira dahiñ giihila ho mohmi lyarbiido, Ngiimi iche kalyape, ho ngo niimi ngensu talyi kuke.

³⁰ Mo ma lubiido ho intiiku ho mohmi pattiih ude ho aliitii nii dahepa mo gyandi mi tupya matii.

³¹ Mohka miira dahiñ niihna lyitiinii hiimi kappa lala, mohlu hempḛr henga henkhatii, ho mohlu ila ho hikha lyiniiñmi mohluka attoh mi luko biido.

³² Ho mohka attoh mohmi gyola lala ho mohmi lutii, No diimmah miira! Ngo niimi hikha pagi mi hello bihañ hangkele niika lyarko hopa;

³³ ho no tiirḛ niika miira dahiñ ahiñ mi aroh bikiñma, niihtañpa ngo niimi arohtii?

³⁴ Ho hadiila mohka attoh mohmi pattiih bonii bomi nembitii, nii dahepa mohka hikha gyandi mi tupyatama.

³⁵ Hopa hiichulipa ngiika dariiganda daka Aba tiirḛ nunu kone abimi miikiñdo, nunu matiirḛ nunuka anubarmii mi nunuka ahha lo hello makoda.