METHU 14 - NITI GONTU N.T. (BSI)

Jon Baptisma Binii Boka Shiiniiñ

¹ Hiika myodu ho Galili mika sangiibo Herod Jisu ka tatukatu mi tapa biido;

² ho mo mohka miira atañmi lutii, “Siikasi Jon Baptisma biniibo, mo shiinii hokii turi doku; hiikohopa siika harchichike si mohko miigiñ nando.”

³ Niimpalukoda Herod Jon mi latu lala ho rala la ho pattiih udeho tuntii, niimpalukoda Herodias ka piigopa, mohka abañ Pilip ka mihie;

⁴ niimpalukoda Jon mohmi lutii, “Niika mohmika biiniiñ si biiju ho biimake.”

⁵ Ho mo mohmi mempa nansutii, mo miyu atañmi biisotii, niimpalukoda mohlu mohmi nyibuhenii hiila khiitii.

⁶ Hojalo Herod budu allo ahkele, Herodias ka nyimii wiinga nasu sotii sipahi atañka hataho, ho Herod mi hempyo miipatii,

⁷ hopa mo hemme biidola lutii no nii kuchi ngo niimi bichi.

⁸ Mohka annii lo luru kotola, mo kutii, “Ngiimi Jon Baptisma binii boka adiñ mi siika paaku ho bipe.”

⁹ Ho radde henkur tiiku; hojalo mohka hemme kopa ho mohka nyibo ahnii atañ kiipa bitote hiila lutii;

¹⁰ mo kiiniñtii ho Jon mi pattiih udeho adiñ patutii,

¹¹ ho mohka adiñmi paaku ho jolii bitii ho nyimii mi bitii, ho mo hiikahiimi mohka annii mi joliibitii.

¹² Ho mohka henjeajiñ atañ ahtii ho apo mi jobiikula ho alie tiiku; ho mohlu intiiku ho Jisu mi lukotii.

Jisu Jarngohemi Diigo Hobiido

¹³ Siisi Jisu siimi tapa lala, mo hiiko hokii insa giitii hulu pa jirara myokoh ho. Hojalo miyuatañ hiimi tapa lala, mohlu alih pa imbo montii taun hokii.

¹⁴ Mo siilyo ila dola mo hempḛr miyuabuje kappatii; ho mo mohlumi arohtii, ho mohluka achihmi miipya bitii.

¹⁵ Alyiñdalyi kukele, henjeajiñ atañ mohko ahtii ho lutii, “Siika si jirara myokoh ke, ho allo loja talyiku; miyu atañmi kiiniñ toku lembaho ho mohlupa diigo riido kiine siito.”

¹⁶ Jisu lutii, “Mohlu indo kupa lyikiñ make; nunu mohlumi diisa iche bito.”

¹⁷ Mohlu mohmi lutii, “Ngunukii lyatañ pengohe ho ngiiyyi sonye sii dosudonii.”

¹⁸ Ho mo lutii, “Hiimi so ngiiko biilii.”

¹⁹ Ho mo miyu atañmi tammi ho duha tote lutii; ho lyatañ pengo hemila ho ngiiyyi sonyemi biitola mo yapuñ ho kachatii, ho lyantii, ho petutii ho yatañ mi henjeajiñ atañmi bitii, ho henjeajiñ atañ miyu atañmi bitii.

²⁰ Ho hikha diitii ho diidetii. Ho mohlu yagii giilyañlenye poteje petu pepo diilemi tukuñ tiiku.

²¹ Ho hiika diinii atañ milobo jarngo hepa diitii, nyimii la hemme nyimi khiita mapa.

Jisu Yasie ho Indo

²² Hiika hiibaho mo henje ajiñatañ mi huluho chakula ho mohmi kapyo yapa pache dalyiho boke nentii, mohka miyuatañ mika nempya nensa tado.

²³ Ho miyu atañmi inke nenkulala, mo putoo ho chatii mohkontii kudupa. Alyiñdalyi tiiku, hiiko mohkontii datii,

²⁴ siika myoduso hulu hii kiitiñ hokiila hempḛr adho hartii ku, lando poniiñlo tiicko nyatii; niimpalukoda allyi mohlumi herii hala dotii.

²⁵ Ho ayoh ka gunta tape niiho mo mohluko ahtii, siimie ho imbiidola.

²⁶ Henjeajiñ atañ mohmi siimie ho ila dopa kappa lala, mohlu biiso nyatii, lubiidola, “Siikasi uyi ke!” Ho mohlu biisola gyutii.

²⁷ Hojalo nyibyaloda mo mohlumi luriitii, lubiidola, “Haronyato; Siikasi ngoke: biiso nyayo.”

²⁸ Ho Pitar lusitii mohmi, “Attoh, nohsu milo, ngiimi tiirḛ niika agiñho yasie ho ahke nempe.”

²⁹ Mo lutii, “Ahto.” Ho Pitar hulu hokii agoho daliñtii ho yasie ho intii ho Jisu ko ahtii;

³⁰ hojalo mo allyi henii mi kappa lala, mo biisotii, ho huhapa miikele gyuritii, “Attoh, lyangurpe ngiimi.”

³¹ Jisu nyibyaloda mohka alah lyuliñla mohmi gatutii, mohmi lubiido, “Henje papo giiniibo miyu, niimpa hemmodu?”

³² Ho mo anye huluho chaku kiile, allyi hengu ritiiku.

³³ Ho hulu hoka dunii atañ mohmi heriinyatii, lubiidola, “Jijeloda no Pinii ka Oho.”

Jisu Genesaret ho Achih mi miipya biido

³⁴ Ho mohlu bochi kulala, mohlu Genesaret gandaho ahtii.

³⁵ Ho hoka miyuatañ mohmi kala lala, mohlu hikha aruñare ho kiiniñtii ho hikha achihnii atañmi mohko ahgii bitii,

³⁶ ho mohmi lyartii, mohlumi mohka pulye nyetañ mijalo tene kiinepe; ho hutii tenetii hii hempyo nyatii.