MAK KA AYAPUYU 5 - NITI GONTU N.T. (BSI)

Jisu Miyu kone mi Diimmah Yajiyallo hokii Miipya biido

¹ Mohlu siimie ka pache dalyiho botii, Gerasene ka gandaho.

² Ho mo hulu hokii alih daliñ dakele, miyu kone byuh byuhkhiiñ hokii kacho yajiyallo giitola mohmi kachi hala ahtii,

³ byuh byuhkhiiñ hoka sala danii; ho mohmi kone hetḛr ratola atii lamatii, dachañ saha latrḛ rala kumatii;

⁴ niimpalukoda mohmi tiiha dado dachañ saha la dachañ tapḛr lo ratola atiitii, hojalo mo dachañ saha miilañmi dure giitii, ho dachañ tapḛr miilañmi tiiche tiihe miitii; ho kone hetḛr mohmi latu lamatii.

⁵ Allo ayoh hendḛr mapa byuh byuhkhiiñ, putoo pukoho gyaduñla mo kiirañ gyula datii, ho atoh atoh yalañ tiisutii.

⁶ Jisu mi mo adho hokiila kapa lala, mo hara biila ho mohmi heriitii;

⁷ ho hempḛr uropa gyukhe jami gyulala, mo lutii, “No ngiimi nii miipa, Jisu, Pinii kahe jaka Oho? Ngo niimi Pinii kiipake lulyinii, ngiimi heru myanka dopa miiyo”

⁸ Hopa mo mohmi lutii, “Siika miyu kokii ago limpatoku, no kacho yajiyallo!”

⁹ Ho Jisu mohmi tahiitii, “Niika armyañ nii hiila?” Mo lukotii, “Ngiika armyañ Legion hiila; niimpalukoda ngunu abuje da.”

¹⁰ Ho mo hempḛr uropa anyohtii mohlumi ganda ka ago nempa yo hiila.

¹¹ Siisi hempḛr taropa alyee ohho la dotii putoo dalyiho;

¹² ho mohlu mohmi anyohtii, “Ngunu mi alyee apurho nembope, ngunumi mohluka ura ho neliipe.”

¹³ Hopa mo mohlumi inke nentii. Ho kacho yajiyallo ago lintiiku, ho alyee ka ura ho ahtii; ho alyee khiika ko jarnye pahe datii, bulu-biila dado siimie ka siilyo ho haratii, ho siimie ho chubañ hanyatii.

¹⁴ Alyee sornii atañ hargii nyatiiku, ho siika drihmi citi la ganda nyiho lukotii. Ho miyuatañ lila kaliñ nyatii niihna lyitiinii hiila.

¹⁵ Ho mohlu Jisu ko ahtii, ho jarpiñ konii bomi hiiko dupa kappatii, punyu hendḛr kula ho abi-tarii giito kula, nii miyu kona legion giitiinii; ho mohlu biiso nyatii.

¹⁶ Ho hutiina kappa nyatiinii hiimi luko nyatii jarpiñ konii bola ho alyee atañ koka lyiniiñmi.

¹⁷ Ho mohlu Jisu mi yartii mohluka ari-apii mi apatela ingeku.

¹⁸ Ho mo huluho chapa miikele, kapyo hoka igii jarpiñ koniibo mohmi yarbiido mohmiilañ mi mohka agiñho ingiipe hiila.

¹⁹ Hojalo mo ma hiibii do, ho mohmi lutii, “Ude ho ingeku niika ajiñ atañ ko, ho lukohe niimkane na Pinii niipa miibi tiinii, ho niihtañ aroh-aya na niimi kakiñ tiinii.”

²⁰ Ho mo intiiku ho Lemba polyañhe ho gyuko ribiitii niim kanena Jisu mohpa miibi tiinii; ho kone abi aluñ nyatii.

Jairas ka Wiinga la Annii akha kone huna Jisu ka pulye mi tene tiinii

²¹ Ho Jisu hiira hulu lo pache dalyiho bochi biikele, hempḛr miyuabuje mohmi bunkḛr biitii; ho mo siimie ka aruñho datii.

²² Ho sinagog hoka sangii laka danii kone ahtii, Jairas hiila armyañ, ho mohmi kapalala, mohka alih ho giihitii,

²³ ho yarbiido mohmi, lubiidola, “Ngiika wiinga si shiipa miila doke. Ahla ho niika alah mohmi tenka tope, niimpalukoda mohmi hempyo kula, ho sando kupa.”

²⁴ Ho mo mo agiñho imbotii. Ho hempḛr miyuabuje mo kiiliñ ho imbotii ho mohmi bumpu biitii.

²⁵ Ho hiikoho annii akha kone nyalyañlenye ai bila achih la dotii.

²⁶ Ho hiika achihbo abuje datḛr miilañmi kakiñ la lyitii, ho mohka tiicko miilañ mi miipa miija tiiku; hojalo hempyo yamatii, uro yapaya herula lyitii.

²⁷ Mo Jisu piigomi tapatii, ho miyuapur ka kiiliñ hopa ahla ho mohka pulye mi tennetii,

²⁸ Niimpalukoda mo lutii, “Ngo matiirḛ mohka pulye mijalo tenne dokoda, ngiimi hempyo dopa miikiñdo.”

²⁹ Ho ohepada mohka ai bila ka lyiniiñhii bingu datii; ho mo hiila hempatii mohka apo daka achih giiniiñmi miipya tiiku hiila.

³⁰ Ho Jisu hempa ritii mohkokii harchichike kone limpa ne hiila, ohepada miyu apurho mokur biila ho lutii, “Huna ngiika pulye mi tenne biinenii?”

³¹ Ho mohka henjeajiñ atañ mohmi lutii, No siika miyu taro siimi kato niimika nenga niisi mi, ho hotiirḛha ludunii, huna ngiimi tenne biinenii hiila?

³² Mo kahikasotii hujana miitiinii.

³³ Hojalo annii akha, niihna mohko lyitiinii chimbii dola, biiso ho alye biidola ahtii ho mohka hataho giihitii, ho hikha jijemi lukotii.

³⁴ Ho mo mohmi lutii, “Wiinga, niika henje ke niimi hempyo dopa miibii nenii; chimie pa ingeku, ho niika achih hokii hempyo toku.”

³⁵ Mohka lula dorañpa, sangii niika ude hokii hiikoho kone ahtii huna lutiinii, “Niika wiinga shiido kuke. Niimpa tonsḛr bomi ahiare miipada?”

³⁶ Hojalo mohluka luniiñmi tapataya lala, Jisu sinagog daka sangii bomi lutii, “Biisoyo, henje kontii henjeto.”

³⁷ Ho mo kone mitrḛ mo kiiliñ ho imbo kiine matii Pitar, Jems, ho Jon Jems ka anu kontii misu.

³⁸ Mohlu sinagog hoka sangii niika ude ho ahchi biikele, mo miyu atañmi haru hela, khela ho hempḛr uropa gyula dopa kappatii.

³⁹ Ho mo uraho ahbiila, mo mohlumi lutii, “Niimpa nunu haru henyada ho khedu? Siika himme si shiima ke hojalo imi lasu ke donii.”

⁴⁰ Ho mohlu mohmi ngarpatii. Hojalo mo miilañ rumi agoho nempa lintii, ho himme ka aba ho annii ho mo agiñ hoka imbo monii atañmi gyogiila, ho ura ho ahtii niihona himme dotiinii.

⁴¹ Mohka alah ho gala lala ho mohmi Jisu lutii, “Talitha kumi,” siika luniiñsi, “Nyimii atu, Ngo niimi ludu, gurito.”

⁴² Ho ohepada hiika nyimii gurila iri datii (mo nyalyañlenye akha tii), ho mohlu ohepada hemur nyatii.

⁴³ Ho mo hempḛr uropa lutiñtii mohlumi siimi kone mitrḛ chinke neyo, ho mohlumi lubiido mohmi diisa iche bilala diike nento.