MAK KA AYAPUYU 4 - NITI GONTU N.T. (BSI)

Lilo niimi ka Lutiñnaniiñ

¹ Hiira mo siimie aruñho tonsḛr ritii. Ho hempḛr miyu taropa mohmi dakḛr pabiitii, hopa mo siimie daka huluho chatii ho hiikoho duhatii; ho hikha miyuatañ siimie ka siilyo biilyo daka kiiddi ho datii.

² Ho mo hempḛr abuje lutiñnaniiñlo mohlumi tonsḛrtii, ho mohka tonsḛr ko mo mohlumi lutii:

³ Tageto! Lilonii kone lilotapa intii.

⁴ Ho mo lilo kiile, kormo tange nii lembo ho chohitii, ho piita atañ gohatii ho hiimi padotii.

⁵ Kormo tangehii yalañ ho chohatii, nohna kiiddi abu nyima tiinii, ho hii ohepada beko datii, kiiddi urañ paka nyima lyiniiñ.

⁶ ho danyi chada hangkele hiimi bembiido, ho hii liima giima siilyi nii hiimi bensiñ datii.

⁷ Tangenii kormo hii tareapya ho chohatii, ho tare hii sancha biila ho hiimi halotii, ho hii amoo giimatii.

⁸ Tangenii kormo hii aya kiiddi ho chohatii ho amoo giitii, sancha biila ho abu yapa giiliñla hikhañhe ho alyañkhe ho lange giitii.

⁹ Ho mo lutii, “Hukiina tana naniipa yaroo giidonii, mohmi take nento.”

Lutiñnaniiñ luta nando paka Lyiniiñ

¹⁰ Ho mo kontii ka duhoho, hutiina mo agiñho alyañlenye ka agiñho datiinii mohmi lutiñnaniiñ ka piigomi takatii.

¹¹ Ho mo mohlumi lutii, “Nunumi Pinii ka raddeganda ka khiibe chimma niimi bitola do, hojalo ago miyu atañpa amanehemi lutiñnaniiñ loke lukiñ donii.

¹² niimpalukoda mohlumi kasu jalo kachiñ madopa, ho tasu jalo tachiñ madopa; mohlumi hiira henkur hado kupa, ho hello kodopa.”

Jisu ka Lilonii Lutiñnaniiñ mika Luko kuniiñ

¹³ Ho mo mohlumi lutii, “Nunu siika lutiñnaniiñ siimi tachiñ maha? Ho niihtañpa nunu tala talyi hikha lutiñnaniiñ atañmi?

¹⁴ Lilonii aguñmi lilotii.

¹⁵ Ho siika atañ sinya lembo hoka lilo niiñ, nohna aguñmi lilo tiinii; mohlu tapa dalyi, saitan ohepada ahla ho aguñmi lara biidado mohluko hoka lilo niimi.

¹⁶ Ho si chulipa siika atañ sinya yalañ hoka lilonii, huna, mohlu aguñmi tapa dalyi, nyibya loda hempyo biidola larii biido;

¹⁷ ho mohluko liima giimatii, hojalo iche kontii pigii lala; hiika hiiba ho, hentḛrkanyi malo miihimiire dalyi aguñka piigopa, ohepada mohlu giiyi dadu.

¹⁸ Ho tange hiika tareapya hoka lilo niiñ hii; mohlu hiika atañ aguñmika taniibo,

¹⁹ hojalo supuñ mika hena, ho mingo hembyo, ho yoheya drih atañ mika hembyo, hii ahla ho aguñmi dotiñ biido, ho hii hang ahee higiima.

²⁰ Hojalo aya kiiddi hoka lilonii sike mohlu aguñmi tapa lala ho talii biido ho ahee hinyado, hikhañhe ho alyañkhe ho lange.”

Muru Piichañ ka Uraho

²¹ Ho mo mohlumi lutii, “Muru mi biilii la yagii ka ura ho atii dupeha, malo dotananii ka ura ho, ho muru ahii kosu masu peha?

²² Niimpalukoda hangja achuñ giisanii nyima, kakiñ saniiñ adi siida; ma hiila mapa lusi lupe drih tiirḛ nyima, hutoh hoka kakiñ saniiñ siida.

²³ Hu miyu na tana naniipa yaroo giidonii, hiimi take nento.”

²⁴ Ho mo mohlumi lutii, “Tadila Tanyato nunuka tanii siimi; niim kane nunu bichi hiimkane nunu tiirḛ pakiñ doke, ho abu yapa tiirḛ nunumi bikiñ dotake.

²⁵ Hopa huko hona donii abu yaya bikiñ doke, ho huko hona hang nyimanii, niihna mohluko donii hiimi tiirḛya lapa bikiñ doke.”

Kormo Sancha Niimi ka Lutiñnaniiñ

²⁶ Ho mo lutii, “Pinii ka raddeganda si chulike niihtañpa miyu kone kormo mi kiiddi ho gyapya lodu,

²⁷ ho ayoh imila ho allo ho gurila miida kiile, ho kormo hii beko kula ho saritii, niihtañpa lyitii mo chima.

²⁸ Kiiddi hokii atoh-atoh sari siidu, kapyopa anniih, hiika hiiba ho elyañ, hiika hiiba ho poteje amoo giiliñdu elyañ ho.

²⁹ Hojalo elyañ ka armiñ lyikuho, miyu tagi biila indu, niimpalukoda amoo pidu tiiku.

Giyañ Kormo mika Lutiñnaniiñ

³⁰ Ho mo lutii, “Niilo ngunu Pinii ka raddeganda mi khiitiñ nanchi, malo nii lutiñnaniiñ mi ngunu luta nanchi sipa?

³¹ Siikasi gihañ kormo chulike, hiimika, kiiddi hoka lilo lyiho, hii kiiddi apiñ ho kormo paka penyo jaku;

³² hojalo hiimi ka lilo lyiho hii sancha du ho hiisa hiima hopa koda raro japa lyidu, ho halloh buropa saliñdu, niimpalukoda yapuñ hoka piita gonii tiirḛ asi puha ladu hiika amiñho.”

³³ Abuje si chulipa mo lutiñnaniiñ lumu nambii dola mohlumi lukotii, mohluka tala giisanii hokii;

³⁴ mo mohlumi lutiñnaniiñ luna namapa lurii matii, hojalo mo mohka henjeajiñ atañmi mi nyima ho tadḛrpa lukola lyitii.

Jisu Allyiaro mi Yanu Lulo Biido

³⁵ Hiika allo ho, alyiñdalyi kukele, mo mohlumi lutii, “Kiije inka pache dalyiho bossa.”

³⁶ Ho miyu atañmi apatela, mohlu Jisu mi mohluka agiñho huluho chagiitii, niihtañpa mo datii. Ho Mika hulu miilañ mo agiñho bobo montii

³⁷ Ho hempḛr uropa allyiaro miiritii, ho lando poniiñhii huluho tiihala lyitii, hopa huluho yasie ahtii.

³⁸ Hojalo Jisu hulu ka mitu jaho dota naniiho imi la dotii; ho mohlu mohmi ahutii ho mohmi lutii, “Tonsḛrbo, no ngunu lyulyi hiila hena siiduha?”

³⁹ Ho mo hurotii ho allyi mi gatii, ho siimie mi lutii, “Chimie! Yanuto!” Ho allyi hii yanutii, ho hiikoho hempḛr chimie ritiiku

⁴⁰ Mo mohlumi lutii, “Niimpa nunu biisodu? Nunu henje giimapo?”

⁴¹ Ho mohluko biiso poteje giitii, ho kone anyañ mi lusutii, “Hu jape si, allyi la siimie nyi lohe paka mo luniiñmi talii danii?”