MAK KA AYAPUYU 3 - NITI GONTU N.T. (BSI)

Alah Lakuñnii Miyu

¹ Hiira mo sinagog ho ahtii, ho hiiko alah lakuñnii miyu kone datii.

² Mohlu mohmi kalyala datii, mo dumoalo ho miipya talyiha miipya tamaha hiila, niimpalukoda mohmi mohlu halii dupa.

³ Ho mo lutii hiika miyu mi huka alah na lakuñtiinii “So ahto.”

⁴ Ho mo mohlumi lutii, Dumoalo hoka aya miiniiñ si aya dopeha malo ayamapa ka miiniiñ siya peha, miyu mika lyangur niisi peha malo menniiñ siya peha? Hojalo mohlu adu matii.

⁵ Ho mo hadii biidola mohlumi kahi kasotii; mohluka ahha alḛr mi kala lala herutii, ho hiika miyu mi lutii, “Niika alah yuliñto.” Mo yuliñtii, ho mohka alah hii aya ritiiku.

⁶ Parisi atañ ago lintiiku, ho nyibyaloda bulyañ atañmi dukuñ giitii Herodias ka agiñho, niihtañ pape mohmi mudu lochinii hiila.

Yasie Siimie Biilyo ho Hempḛr Miyu Taro

⁷ Jisu mohka henjeajiñ atañ agiñho insa giitii siimie ho, ho hempḛr miyuabuje Galili hokii mohmi imbo montii; Judia hokii miilañ

⁸ ho Jerusalem ho Idumia ho Jordan ka pache dalyi hokii ho Tayer la Sidon aruñare hokii miilañ hempḛr miyu taropa, mohka miiniiñmi tapa lala, mohko ahtii.

⁹ Ho mo mohka henjeajiñ atañmi lukotii mohpa hulu tare henju yato niimpalukoda miyuabuje danii mi kala lala, hiila makoda mohlu mohmi nyoje lyido;

¹⁰ niimpalukoda mo abujemi miipyatii, hopa hikha achih giinii atañ mohmi nengabiitii mohmi tenne dupa.

¹¹ Ho niidajalopa kacho yajiyallo mohmi kappa talyi, mohlu mohka liidi ho giihatii ho gyutii, “No Pinii ka Oho!”

¹² Ho mo hempḛr uropa lutiñtii mohlumi mohmi mihmi chinke neyo hiila.

Jisu Alyañlenye Kiiniñkonii mi Kahe biido

¹³ Ho mo putoo ho chatii, ho hiika atañmi gyoliitii humina mo anna tiinii, ho mohlu mohko ahtii.

¹⁴ Ho mo alyañlenye kahetii, mo agiñho dabo niipa, ho kiiniñ dupa tonsḛrkhenyo niipa,

¹⁵ ho igii atañmi mompa nanii otority giiniipa.

¹⁶ Saimon humina mo Pitar hiila myangiñ tiinii;

¹⁷ Jems Zebedi ka oho ho Jon Jems ka anu nyimi mo Boanargis hiila myangiñtii, hiikahii, yapuñ geniiñ ka oho;

¹⁸ Andrew, ho Pilip, ho Bartolomiu, ho Methu, ho Tomas, ho Jems Alpayas ka oho, ho Tadayas, ho kanan daka Saimon,

¹⁹ ho Judas Iskariot, mohmika talubalo bo.

Jisu la Biljebul

²⁰ Ho mo ude ho intiiku; ho hiira miyuatañ tongepa ahtii, hopa mohlu diigo hetrḛ diila matii.

²¹ Ho hiimi mohka uru atañ tapa lala, mohlu mohmi lutiñ dupa intii, niimpalukoda miyuatañ lunyala dotii, “Mo hendḛr mapa ke miiladanii.”

²² Ho Jerusalem hokii tonii pagenii atañ lutii, “Mohko Biljebul ke giidonii, ho igii raddeka oholo mo igii atañmi mompada.”

²³ Ho mo mohlumi mohko gyoliitii, ho mohlumi lutiñnaniiñ lubii dola lutii, Niitañpa saitan hii saitan mi mompa lakiñdo?

²⁴ Raddeganda matiirḛ atoh-atoh chesula tache siido koda, hiika raddeganda hii sala kemma.

²⁵ Ho uru matiirḛ chesu la atoh-atoh tache siido koda, hiika uru hii sala kemma.

²⁶ Ho saitan matiirḛ atoh-atoh chekho siila ho tacherido koda, mo sala kemma, ho mo byala-ya byakiñdo.

²⁷ Hojalo kone hetḛr miyu tamo ka ude ho ahla ho mohka drih mi diipyo biila kema, nii dahepa hiika tamo miyu mi rantema; hiila miitii kodade mohka ude hokii diipyo biila nedo.

²⁸ Jijeloda, ngo nunumi lukoso, hikha ingyamiigya mi hello bila kendo miyu ka Oho hii, ho nii nipakoya mohlu lusu tiijalo;

²⁹ hojalo hujalopa Darii Yajiyallo mi nipakoya talyi hiimi pema hello bila kema, hojalo hiika ingyamiigya hii ayu-dahe paka hello lama saniiñ.

³⁰ Niimpalukoda mohlu lutii, “Mohko kacho yajiyallo giidoke.”

Jisu ka Annii la Anu-Barmii atañ

³¹ Ho mohka annii la mohka anu atañ ahtii; ho agoho datii, mohlu miyu kone mi kiiniñ lala ho mohmi gyotii.

³² Ho miyuatañ mohmi dukḛr pabiitii; ho mohlu mohmi lutii, “Niika annii la niika anubarmii atañ agosi dake, niimi mohlu gyodoke.”

³³ Ho mo lusitii, Hu ngiika annii ho ngiika anubarmii?

³⁴ Ho mohka aruñhoka dunii atañmi kahi kaso lala, mo lutii, “Siika atañ sinya ngiika annii ho ngiika anubarmii!

³⁵ Hujalopa Pinii henju jaho miichi hii ngiika anuabañ ho barmii ho annii.”