MAK KA AYAPUYU 2 - NITI GONTU N.T. (BSI)

Jisu Liikuñnii Kone mi Miipya biido

¹ Ho mo Keparnam gandaho ahku tiiku allo lonye lohiñhe datii hela, hiila luko nyatii mo ude ho duke hiila.

² Ho abuje miyu bungku-bumpatii, hopa hiikoho mohlupa duko nyiku matii, alyeh ago hotiirḛ nyiku matii; ho mo pinii-aguñmi tonsḛrkhenyo ritii mohlumi.

³ Ho mohlu ahtii, lukuñnii kone mi mohko midiñ piilye jolii biila.

⁴ Ho mohlu mohka aruñho ahlamatii niimpalukoda miyuabuje datii, mohlu Jisu ka ayoh daka santa mi khopatii; ho mohlu ubu miiko lala, mohlu akañ ho lukuñniika giita nanii pepu mi jota lola jolo biido.

⁵ Ho Jisu mohluka henje mi kappa lala, mo lukuñnii bomi lutii, “Ngiika oho, niika ingyamiigya mi hello biilyi kuke.”

⁶ Hiika myodu ho pagenii tonge ho dutii, mohluka ahha ho taka siinyatii,

⁷ Niimpape siika miyu si hiila ludanii? Si nipakoya laka luniiñ! Hu ingyamiigya mi hello lakiñdo hojalo Pinii kontiisii?

⁸ Ho ohepada Jisu, hela datii mohka Yajiyallo lo mohlu taka siila do hiila; mohlumi lutii, “Niimpa nunu sitañ taka sanii nunuka ahha ho giidu?

⁹ Niihpe lupyo yakiñ donii, lukuñnii bomi, ‘Niika ingyamiigya mi hello biilyi kuke,’ hiiyapeha malo ‘Gurito, niika pepu mi khebii kula ho ingeku’?

¹⁰ Hojalo nunu hiila chinto Miyu ka Oho ko kiiddiapiñ daka ingyamiigya mi hello nanii otority giido hiila” mo lukuñnii bomi lutii.

¹¹ “Ngo niimi ludu, gurito, niika pepu mi khebii kula ude ingeku.”

¹² Ho mo guritii, ho nyibyaloda pepu mi khebii kula ho miilañ ruka kadopa agoho lintiiku; hopa mohlu miilañru aluñ nyatii ho Pinii mi assañtii, lubiidola, “Ngunu ronge hetḛr sichuli kappa kaka ma!”

Jisu Levi mi Gyobiido

¹³ Mo hiira siimie ka siilyo biilyo ho lintii; ho hikha miyuatañ mohmi dakḛr pabiitii, ho Jisu mohlumi tonsḛrtii.

¹⁴ Ho mo impobiikele, mo Alpayas ka oho Levi mi kappa biido biijokajo ude ho dupa, ho mo mohmi lutii, “Ngiika kiiliñ ho imboto.” Ho mo guritii ho Jisu mi imbo montii.

¹⁵ Ho mo diitananii ho mohka ude ho dukele, abuje biijokajo myanii atañ ho ingyamiigyanii atañ tiirḛ Jisu la mohka henjeajiñ atañka agiñho dubo montii; niimpalukoda mohmi abuje miyu imbo montii.

¹⁶ Ho Parisi daka pagenii atañ, mohmi ingyamiigya miyu la biijokajo myanii agiñho diibola dupa kappa lala, mohka henjeajiñ atañmi lutii, “Niimpa mo biijokajo myanii la ingyamiigya miyu agiñho diibola du?”

¹⁷ Ho hiimi Jisu tapa lala, mo mohlumi lutii, “Huna dasḛr la dunii hii datḛr mi anna make, hojalo huna achih-ahe nyadonii; Ngo denki mi gyopa make ahdunii hojalo ingyamiigyanii atañ mike.”

Nyoniiñ Piigo mika Takaniiñ

¹⁸ Siisi Jon ka henjeajiñ atañ la Parisi atañ nyola dunyatii; ho miyuatañ ahbii la mohmi lutii, Niimpa Jon ka henjeajiñ atañ la Parisi ka henjeajiñ atañ nyoda, hojalo niika henjeajiñ atañ nyoma?

¹⁹ Ho Jisu mohlumi lutii, “Mihie millo lasu lyiho hoka nyibo ahnii atañ nyola kendo peha mihie lasabo mohluka agiñho durañpa? Nii dahepa mohluka agiñho mihie lasabo duchi rañ, mohlu nyola kema”.

²⁰ Allo loliñ kendoke, niidana mihie lasa bomi mohluka agiñ hokii ira giichinii, ho hiika allo ho mohlu nyola kendo.

²¹ “Kone hetḛr pulye niti lo pulye khu ho palyi liikiñ ma; hiilamiikoda, palyi liiniiñ hii hiiko hokii sarche rikiñdo, niti hii khu hokii, ho uro yapa ya ubu yakiñdo.

²² Ho kone hetḛr roalha ajañ mi dije khu ho hilii ma; hilii koda, roalha hii dije mi buche giikiñdo, ho roalha bipa kendo, ho dije tiirḛ; hojalopa roalha ajañ hii dije niti pasuke.”

Dumoalo mika Takaniiñ

²³ Dumoalo lohe mo emmo aji mi impo biila intii; ho hiika lembo mi impo biila dola mohka henjeajiñ atañ emmo nyetañ hokii tudo ritii.

²⁴ Ho Parisi atañ mohmi lutii, “Kato, niimpa mohlu hiila miinyada nii mina dumoalo ho miikiñ manii?”

²⁵ Ho mo mohlumi lutii, “Nunu ronge hetḛr rika mapo David ka miiniiñmi, mohka hayala anna lyiho, mo la mohka agiñ hoka dabo monii atañ:

²⁶ niihtañpa mo Piniiude ho ahtii, Abiatar ka bukuñ nyibu paka duho, ho Pinii mika yatañ biniiñmi diitii, nii mina kone hetḛr diila kema tiinii, hojalo nyibu kontiisii diila kensu tiinii, ho mo agiñ hoka imbo monii atañ mitrḛ bitii?”

²⁷ Ho mo mohlumi lutii, “Dumoalo si miyu pake putiinii, ho miyu si dumoalo pamake;

²⁸ hopa miyu ka Oho si dumoalo katrḛ ka attoh ke.”