MAK KA AYAPUYU 16 - NITI GONTU N.T. (BSI)

Turiturku kuniiñ

¹ Ho dumoalo loja kukele, Mary Magdalen, la Jems ka annii Mary, ho Salome naru nempyo giinii biiliitii, niimpalukoda mohlu ila ho mohmi nelii dupa.

² Ho allo lotu jaka hempḛr aro konchiho mohlu byuh byuhkhiiñ ho intii danyi chada lyi.

³ Ho mohlu ako anyañ mi lusutii, Huyuha ngunumi byuh hagya daka yalañ mi giipa bichinii?

⁴ Ho mohlu kacha biikele, mohlu kappatii yalañ mi giipa lintola dopa; hii hempḛr yalañ puro.

⁵ Ho byuh ura ho ahbii kiile, mohlu yapa atu kone kappatii lahbi dalyiho dupa, puloo tarii hokii giitola; ho mohlu aluñ nyatii

⁶ Ho mo mohlumi lutii, “Aluñ nyayo; nunu Nazaret daka Jisu minya medunii ah, humi na dapoho ledabiinenii. Mo turku rine kuke; mo so nyima ke. Kaka tocho inka sinya mohmika atii ko.

⁷ Hojalo inge, mohka henjeajiñ atañmi ho Pitar mi lukohe nunumi impyo yapa mo Galili ho inchi hiila; hiiko nunu mohmi kappa kendoke, mo luniiñ chulipa.”

⁸ Ho mohlu byuh hokii ago lintii ku ho byuh-byuhkhiiñ hokii hargii nyatii ku; niimpalukoda mohlumi hempḛr biiso ho hemur nyado pa miitii; ho mohlu akomitrḛ hang luko matii, niimpalukoda mohlu biiso nyatii.

KHU AYAPUYU KA LUJA KUNIIÑ Jisu Mary Magdalen ko ahdo

⁹ Ho mo kapyoja allo ho turi kula, mo Mary Magdalen ka agiñho ahtu japa ahtii, huko hokiina mo igii midiñ kanuhe mompa tiinii.

¹⁰ Mo intii ho lukotii mo agiñ hoka dabonii atañmi, mohluka herula haru hela ho khela duho.

¹¹ Hojalo mohlu mo turku doku ho hiika nyimii kappatii hiila tapa lala, mohlu hiimi taje matii.

Jisu Henjeajiñ Anye ko Ahdo

¹² Siika hiiba ho mo yoheyapa lyila midiñ anye ko ahtii, mo anye mohluka gandaho impa ka ila doho.

¹³ Ho mo anye inku kula ho khiibe atañ miilañmi lukotii, hojalo mohlu taje matii mo anyemi.

Jisu Alyañlenkuñ ko Ahdo

¹⁴ Hiikahiiba ho mo alyañlenkuñ he henjeajiñ atañka punkoho ahtii mohluka diigo diiko hoka duho; ho mo mohluka henje paponiimi ho tajemala hiila gabii do, niimpalukoda mohlu taje matii mohka turi kunii mika kappa niimi.

¹⁵ Ho mo mohlumi lutii, “Hikha kiiddiapiñ ho ingela ho tonsḛrhe aya puyumi hikha puliñnii atañmi.

¹⁶ Huna henje talyinii ho baptisma lachinii hii lyangur kokiñ doke; hojalo huna henje tamanii hii khiipa kokiñ doke.

¹⁷ Ho siika kagiñnanii atañsi dojo monkiñdo huna henje nyadonii: ngiika armyañ pa mohlu igii atañmi mompa kendo; mohlu niti aguñ lukiñ do;

¹⁸ mohlu tabu atañmi gala lakiñdo, ho mohlu wiimyo mi tanja lopa, hiika hii mohlumi hang hempa giikiñ ma; mohlu achih-ahe niiko mohluka alah tenga koda, ho mohlu hempyo kendo.”

Jisu mi Dariiganda ho Chagiitiiku

¹⁹ Ho Attoh Jisu, mohlumi lurii tekula, dariiganda ho chatiiku, ho Pinii ka lahbi alah ho duku.

²⁰ Ho mohlu inkula ho aya puyu mi kappa kohe gandaho tonsḛrkhenyo tii, Attoh mohluka agiñho miigo miibo montii ho puyu mi jije ke hiila kakiñ la kagiñnanii dojo montii. Amen.