MAK KA AYAPUYU 14 - NITI GONTU N.T. (BSI)

Jisu mika Rhuniiñ

¹ Impobiiniiñ la Ipomiiyo manii Yatañ dituñ ka allo lonye dorañpa. Nyibu burii atañ la pagenii atañ lembo mela dotii niihtañ pape Jisu mi latu talyinii mohmi halii lala, ho mohmi mendupa;

² niimpalukoda mohlu lutii, “Dituñ sola do ho miimasa, hiila miikoda miyu atañka punkoho yalu lilyi diike”

Jisu Mi Betany ho Arrḛyartii

³ Ho mohka Betany hoka daho ho Saimon tahikoya giinii ka ude ho, diitananii aruñho mo dukele, nyimii kone ahtii alabaster pinchu ho hang miiyomanii nard biitola, hempḛr khiiniiñ, ho mo pinchu mi tuko lala ho toliñ lala mohka dinta ho neliitii.

⁴ Hojalo tonge ho dutii mohlu hadii biidola mohluka punkoho lutii, “Niimpa kutumi sitañpa miilyi miipya danii?

⁵ Niimpalukoda siika kutumi pyudo koda lahiñhe denarii mi abu yapa pyubii todo, ho arroatu atañmi bila kentii.” Ho mohlu hiika nyimiimi gatii.

⁶ Hojalo Jisu lutii, “Mohmi kapato; niimopa nunu mohmi henga henkha miipada? Mo hempḛr aya mujuke ngiipa miidonii.

⁷ Niimpalukoda nunu agiñho arroatu kiirañ dalyi diike, ho nunu niida aroh-aya nanchi, nunu mohlupa aya miila kendoke; hojalo nunu ngiimi tiihadado dagii lakiñ make.

⁸ Mo nii miila kentii mo miitii; mo ngiika apo mi arrḛyartiiku alie marañ paka miisa niimi.

⁹ Ho Jije, Ngo nunumi lukoso, nohjalopa ayapuyu mi luko talyi siika siipuñ so, mo nii miitii hiimi tiirḛ luko kendoke mohmi hempa hengi naniipa.”

Judas Jisu mi Talubalo Dupa talii biido

¹⁰ Ho Judas Iskariot, alyañlenye hoka dabo monii ako, nyibu burii ko intii mohmi talubalo dupa mohluko ho.

¹¹ Ho mohlu tapa lala, mohlu hempḛr hempyo tii, ho mohmi posa bichi ke hiila hemme tii. Ho mo myodu aya mi metii mohmi talubalo dupa.

Jisu Henjeajiñ atañ agiñho Impobiiniiñ Dituñ Apiñ diibodo

¹² Ho Ipomiiyo manii Yatañ dituñ ka sotu allojaho, impobiiniiñ siibuñ atu mika mela ka doho, mohka henjeajiñ atañ mohmi lutii, “No ngunumi no ila ho impobiiniiñ ka diigo mi dudupa miimyo kencho hiila hendo?”

¹³ Ho mo mohka henjeajiñ anye mi kiiniñtii, ho mo anye mi lutii, “Citi ura ho ahnge, ho miyu kone yasie pinta jobii tola kappa lyidiike; mo kiiliñ ho imbo monge,

¹⁴ ho noh mo ahchi, hiika ude atoh mi lutolya, Tonsḛrbo ludoke, nohna ngiika dumo ko, ngiika impobiiniiñ diigo ngiika henjeajiñ agiñho diisa ko?

¹⁵ Ho mo niinyi mi hempḛr chidii pero reke ho kakiñ lyidii ke nyupa nyuya tola ho miimyo tola. Hiikoho ngunupa miimyo he.”

¹⁶ Ho henjeajiñ atañ iritii ho citi ura ho ahtii, ho niihtañpa mo lukotii mo anye mi hii chuli kappatii; ho mo anye impobiiniiñ diigo mi miimyotii.

¹⁷ Ho alyiñdalyi kukele mo alyañlenye ka agiñho ahbo montii.

¹⁸ Ho mohlu diitananii ho dula diila dotii, Jisu lutii, “Jije, Ngo nunumi lukoso, nunuka punko hokii kone ngiimi talubalo kendo, kone ngiika agiñ hoka diibo laka dunii.”

¹⁹ Mohlu heru nyatii ho mohmi lutii koneka hiiba ho kone, “Ngo masu ha?”

²⁰ Mo mohlumi lutii, “Hiika hii alyañlenye hokii koneke, ngiika agiñ hoka kone yatañ mika paka ho niihi doniibo.

²¹ Niimpalukoda miyu ka Oho hii niihiila mohmi ketola do hiila lyikiñdo, hojalo hiika miyu mi aiya hiila hembido huna miyu ka Oho mi talubalo kendo nii! Hiika miyu pa wiinga buko matii kodaya aya yakiñne.”

Attoh Ka Apiñ

²² Ho mohlu diila dokele, mo yatañmi tulala, ho lyantii, ho hiimi petutii, ho hiimi mohlumi bitii, ho lutii, “Lariito; siikasi ngiika apoke”

²³ Ho mo turla mi jolala, ho payapacho lulala mohlumi bitii, ho miilañru hokii tantii.

²⁴ Ho mo mohlumi lutii, “Siikasi ngiika hemmesiiniiñ ka ai ke, abuje miyuatañ paka bipa biniiñ.

²⁵ Jijeloda, Ngo nunumi lukoso, Ngo hiira tantema siika roahee ka alha siimi hiika allo lohepa nii dahepa Ngo Pinii ka raddeganda ho nitipa tante ma.”

²⁶ Ho mohlu bariebiisie sikulala, mohlu Olives Putoo ho chatii.

Jisu Pitar ka mapa niimi luko lumyo biido

²⁷ Ho Jisu mohlumi lutii, “Nunu miilañru hargii nyakiñ do; niimpa hiila ketola do, ‘Ngo subuñ sornii bomi hichi, ho subuñ atañ harpya hasa nyakiñdo’.

²⁸ Hojalo Ngiika turi lyikuho, Ngo nunumi impyo yapa Galili ho inchi.”

²⁹ Pitar mohmi lutii, “Miilañru harja giisu nejalo, Ngo hargii tama.”

³⁰ Ho Jisu mohmi lutii, “Jije, Ngo niimi lukoso, siho ayoh jaho, paro ronye khoma rampa, no ngiimi rohiñhe gollu kendoke.”

³¹ Hojalo mo lukhe kiiliñla lutii, “Ngo niika agiñho siibii lyijalo, Ngo niimi gollu tama.” Ho miilañru hii chulipa luhiñla lutii.

Getsemani Ho Jisu Kudo

³² Ho mohlu Getsemani hiila luniiñ gandaho intii; ho mo lutii mohka henjeajiñ atañmi, “So dutolya, ngiika kula duhoso.”

³³ Ho mo Pitar ho Jems ho Jon mi mo agiñho ingiitii, ho hempḛr hengahenkhatii ho heruritii.

³⁴ Ho mo mohlumi lutii, “Ngiika yallosi hempḛr heru do, shiipa miidonii kanedo (Ngo heru haja kula shiipa miilyi keha); so dulya tolya, ho hurola dutolya.”

³⁵ Ho ichuche ahhi la, mo kiiddi ho giihala ho kutii, miila kendo milo, siika myodu siimi ngiimi impo biike nentope.

³⁶ Ho mo lutii, “Aba, Aba, kapane drih niipa miilado; siika turla siimi ngiiko hokii lapa tope; ngiika hengko homapa, hojalo niika hengko hotiika.”

³⁷ Ho mo lintiiku ho mohlumi imila dopa kappatii; ho mo lutii Pitar mi, “Saimon, no imi lapo donii? No gunta tahe hetrḛ hurola dula ma ha?

³⁸ Hurola duto ho kuto nunuko tenkalarka ahma yapa; yajiyallo si tasu dope hensu do, hojalo asiialyo sike ajju donii.”

³⁹ Ho hiira mo ahkurla ho kutii, luniiñmi luti biidola.

⁴⁰ Ho hiira rongeta mo linkutii ho mohlumi imila dopa kappatii, niimpalukoda mohluka amee hempḛr imi nantii; ho mohlu mohmi nii hiilayu luchinii hang hendḛr lamatii.

⁴¹ Ho mo rohiñ niipa lintii, ho mohlumi lutii, “Nunu siisi lohepa imila donii ho nunu hemmola dunii? Khe dokuke! Myodu ahdo kuke; Miyu ka milobo Oho mi ingyamiigya miyu atañka alah ho talubalo tiikuke.

⁴² Guri nyato, Kiije inkusa; kato, ngiimika talubalobo si hachokiilo.”

Jisu Mika Latunii

⁴³ Ho nyibya loda, mohka lula dorañpa, Judas ahtii, alyañlenye hokii kone, ho mohka agiñho hempḛr miyu taropa ilyo ho gyambo pana nanii biitola, siika atañsi nyibu burii, pagenii atañ ho amiabañ atañ kokii.

⁴⁴ Siisi talubalobo mohlumi kakiñ kehotii, lubiidola, “Ngo humina mochu talyinii hiika miyu ke; mohmi latulala ho dagur biidola mohmi ingii he.”

⁴⁵ Ho mo ahkele, nyibya loda mohka aruñho mo ahtii, ho lutii, “Atoh!” Ho mohmi mochutii.

⁴⁶ Ho mohlu mohluka alah lo gatu lala mohmi latutii.

⁴⁷ Hojalo hiika aruñhoka danii kone mohka ilyomi seliñ lala, ho bukuñ nyibu ka miirami tupalilala ho mohka yaroo mi papa lintii.

⁴⁸ Ho Jisu mohlumi lutii, “Nunu diipyo niimika miichañho miipa ahdunii, gyambo pana nanii ho sipahi atañmi ingiila ngiimi latu dupa ahdunii?

⁴⁹ Allo karmyañmi ngo nunuka agiñho piniiude ho tonsḛrla dadu, ho nunu ngiimi latuma. Hojalo piniipota mi lyipe kiineto.”

⁵⁰ Miilañru mohmi apatela, ho hargiinyatii.

⁵¹ Yapa atu kone mohmi imbo montii, hang giimapa pulye bolyo bere giitola. Mohlu mohmi latutii,

⁵² hojalo mo pulye mi apabitii hela ho ahu arapa hargiitii.

Jisu mi Bulyañ ko Ahgii Bitii

⁵³ Ho mohlu Jisu mi bukuñ nyibu ko ahgiitii; ho hikha nyibu burii atañ, amiabañ atañ, ho pagenii atañ dukuñ nyatii.

⁵⁴ Ho Pitar adhopa mohmi injo montii, bukuñ nyibu ka lengo-byago aruñ lohe; ho mo dagur biinii atañka agiñho dutii, ho yamu higyusiila dubotii.

⁵⁵ Siisi nyibu burii atañ la hikha bulyañ atañ Jisu mi mendupa hiila mohmika haliinii koneja dokoda hiila mela dotii; hojalo mohlu kone hetḛr mepa matii.

⁵⁶ Niimpalukoda abuje amuhpa mohmi halii busudo, ho mohluka halii niimi tajematii.

⁵⁷ Ho tonge guri biila ho amuhpa mohmi haliibiido, lubiidola,

⁵⁸ “Ngunu tapato mohka luniiñmi, ‘Ngo siika piniiude mi pyadu lochi alah loka puniiñmi, ho allo lohiñ niiho Ngo koneya pucha talyi, alah puniiñ loma.’”

⁵⁹ Hojalo siika luniiñ sotrḛ mohlu luniiñmi talii matii.

⁶⁰ Ho bukuñ nyibu mohluka punkoho guritii, ho Jisu mi tahiitii, “Niiko hang lusi sanii nyima ha? Si niihpe siika miyuatañ niimi ka halii niisi?”

⁶¹ Hojalo mo adu matii ho hang lusi matii. Hiira bukuñ nyibu mohmi takatii, “No Kristo peha, Lyaniiñ Oho peha?”

⁶² Ho Jisu lutii, “ḛh ngo; ho nunu kappa kendoke Miyu ka Oho mi Pinii ka lahbi alah ho dupa harchichike giitola, ho Jomii agiñho yapuñ hahoho ahla dopa.”

⁶³ Ho bukuñ nyibu mohka tariimi sarche siitii, ho lutii, “Niimpape ngunu hiira haki anna dorañnii?

⁶⁴ Nunu mohka Pinii mika nipakoya niimi tapa biine. Niihiila no luchi pe?” Ho miilañru mohmi haliitii mempa kendoke.

⁶⁵ Ho tange mohmi chukḛr chupa ritii, ho mohmi amee putiñ lala, ho mohmi pitatii, mohmi lubiido, “Nyibu hento!” Ho dagur biinii botrḛ mohmi kiibiido.

Pitar Jisu mi Mapah Biido

⁶⁶ Ho Pitar byago ka akañ ho datii, bukuñ nyibu ka miira nyimii atu kone aruñho ahtii;

⁶⁷ ho Pitar mi yamu higyu siila duniimi kappa lala, nyimii mohmi kaditii, ho lutii, “No tiirḛ Nazarene, Jisu agiñho dane.”

⁶⁸ Hojalo mo hiimi gollu giitii, lubiidola, “Ngo chinter chimma malo tadḛrlama no nii piigo mi ludo hiila.” Ho mo hagya dalyiho lingi giitii.

⁶⁹ Ho miira-nyimii hii mohmi kappatii, ho hiira hiika aruñare daka danii mi lurido, “Siika miyusi mohluka agiñ hoka dabo monii koneke.”

⁷⁰ Hojalo hiira mo hiila ma hiila lutii. Ho iche dahi damo lala hiira hiika aruñare hoka danii Pitar mi lutii, “No mohluka agiñ hoka dabo monii lodake; niimpalukoda no Galili hokii.”

⁷¹ Hojalo mo atohmi beliisiibii dola, ho mo hemme biido, “Ngo siika nunuka luniiñ miyu mi kachiñ make ya.”

⁷² Ho ohepada paro ronye niipa khoritii. Ho Pitar hempa ritii Jisu ka mohmika luniiñmi, “Paro ronye khoma rampa, no ngiimi rohiñhe gollu kendoke.” Ho mo heru kula ho kheritii.