MAK KA AYAPUYU 12 - NITI GONTU N.T. (BSI)

Robalu Hoka Ajho Innii mika lugiñnaniiñ

¹ Ho mo lutiñnaniiñ lubii dola mohlumi luriitii. Miyu kone roahee balu miitii, pakḛr dado sulu miitiñtii, roalha bikuñ kopa ubu hetii, ho sobya miilañ pentii, ho ajho innii konemi atiitela, ho ganda ponge yaho intii.

² Myodu ahku kiile, mo miira kone mi kiiniñ biido ajho inniiko, mohluko hokii ahee iche robalu hokii kubii hiila.

³ Ho mohlu mohmi setu lala ho mohmi hilala, ho alah arapa kiiniñ nenku tiiku.

⁴ Hiira mo miira koneya mohluko kiiniñtii, ho mohlu mohmi adiñ ho une agiitii, ho mohmi khiima pama miitii.

⁵ Ho mo koneya kiiniñtii, ho hiika kone mi mohlu mentii; Ho hii chulipa abuje miyu mi, tange mi miinetii ho tange mi mohlu mentii.

⁶ Mohko hiira kone dutii rañ, heniiñja oho; Kami kalo jaho mohmi mohluko kiiniñtii, lubiidola, Mohlu ngiika ohomi khiinedo.

⁷ Hojalo hiika ajho konii atañ ako anyañmi lusutii, Sike atoh lyisi sanii; ahto, kiije mohmi ngunu mensa, ho siika ganda nenchasi ngunupa dokiñ doke.

⁸ Ho mohlu mohmi latu lala ho mohmi mentii, ho mohmi robalu ka agoho jopa lintii.

⁹ Ho robalu ka atoh niihpe miichi kunii? Mo ahla ho ajho konii atañmi mudu lokiñdo, ho robalu mi mihmi bikiñdo.

¹⁰ Nunu siika piniiaguñ siimi rika mato po: Ude miiniiñ ka yalañ khiipanii hii khiiniiñ japa lyikiñdo;

¹¹ siikasi Pinii ka miiniiñ ke, ho hiika hii ano kapyodo ngunuka amee kataho.

¹² Ho mohlu mohmi patiibopa miitii, hojalo mohlu miyu atañmi biiso nyatii, siika lutiñnaniiñ luko niisi ngunumi chekho la ludo hiila helatii; Hopa mohlu mohmi apa tela ho intiiku.

Biijokajo Biniiñ Piigo mika Takaniiñ

¹³ Ho mohlu mohko Parisi tangela Herodias tangemi neliitii, mohka luniiñho mohmi luhe ludupa hiila.

¹⁴ Ho mohlu ahtii ho mohmi lutii, “Tonsḛrbo, ngunu chindo no ludiko ludo hiila, ho miyu atañmi hang biisoma; niimpalukoda no miyu atañka kahe sanju mi khiima, hojalo jije ludiko Pinii lembo mi lukodo. Hokoda Kesar mika biijokajo biniiñsi bidi kopeha malo bikha dopeha?

¹⁵ Ngunu bikiñ dopeha mohlumi, malo ngunu bikiñ mapeha?” Hojalo mohluka apukahi mi chimbii tola, mo mohlumi lutii, “Niimpa nunu ngiimi tenkadu? Posa pere ngiiko biilii, ho ngiimi kaka kiine pe”

¹⁶ Ho mohlu pere biilii bitii. Ho mo mohlumi lutii, “Huchuli dope si, ho huka armyañ giido?” Mohlu mohmi lutii, “Kesar kii”

¹⁷ Jisu mohlumi lutii, “Kesar ka drih koda Kesar mi bito, ho Pinii ka drih koda Pinii mi bito.” Ho mohlu hemur nyatii mohmi.

Turiturku nii Piigo mika Takaniiñ

¹⁸ Ho Sadusi tonge mohko ahtii, turiturku lakiñma hiila lunii atañ; ho mohlu mohmi takatii, lubiidola,

¹⁹ “Tonsḛrbo, Mose ngunupa ketola do miyu ka abañ matiirḛ siido koda ho mohka mihie mi opatela, hojalo wiinga nyima pa, anu hii hiimi mihie biisi kendo, ho mohka abañ pa wiinga sucha bikiñdo.

²⁰ Midiñ kanu he anuabañ dutii; kapyo jahii mihie latii, ho mohka siilyi ho, wiinga nyimatii;

²¹ ho anyenii hiimi biisitii, ho siitii, wiinga nyimatii; ho hingenii hiitḛr hiila lyitii;

²² ho midiñ kanunii kiitrḛ wiinga nyimatii. Kami kalo jaho nyimii tiirḛ siitiiku.

²³ Turiturku lyikuho huka mihie pa lyikiñdo hiika nyimii hii? Niimpalukoda midiñ kanuhe mohmi mihie pa biitii.”

²⁴ Jisu mohlumi lutii, “Nunu siika drih soma siipeha lukha donii, nunu piniipota mitrḛ chima ho Pinii ka harchichike mitrḛ chima?

²⁵ Niimpalukoda mohlu shiinii hokii ka turku rilyi ko, mohlu mihie millo tiirḛ lakiñma ho mihie millo lasu dopa tiirḛ lyikiñma, hojalo mohlu miidopopi chitañ dakiñdo dariiganda ho.

²⁶ Ho shiinii atañka turi lyikuho, nunu Mose ka kheta ho puri matopo, tareapya piigo mika luko niimi, niihtañpa Pinii mohmi lutii, ‘Ngo Abraham ka Pinii ke, ho Isak ka Pinii, ho Jakob ka Pinii’?

²⁷ Mo shiinii atañka Pinii make, hojalo turnii kiike; nunu lukha duke.”

Kaye Lujubiniiñ

²⁸ Ho pagenii kone aruñ ahtii ho tapatii mohluka chesu niimi, ho si ludiko mohlumi luko biido hiila kala lala, mo tahiitii mohmi, “Nii lujubiniiñ hiipe lupyo japa ka luniiñ?”

²⁹ Jisu lukotii, “Kapyo japa ka luniiñ hii, ‘Tato, Isrel atañ: Pinii ngunuka Pinii, Pinii kone ke;

³⁰ ho nunu hentolya Pinii nunu Pinii mi hikha nunuka ahha lo, ho hikha nunuka yallo lo, ho hikha nunuka punyulo, ho hikha nunuka harchichikelo.’

³¹ Gonye niipaka luniiñ hii sike, ‘Nunu hentolya nunuka ariapii mi atoh mika hennii chitañpa.’ Simi apalala yoheya simi ka kayeya lujubiniiñ nyimake.”

³² Ho pagenii mohmi lutii, “No ludiko ludo, Tonsḛrbo; no ludiko jaho lutii mo koneke, ho mohmi opa lala kone tiirḛ nyimake;

³³ ho mohmi hikha ahha lo henkiñdo, ho hikha chiniiñlo, ho hikha harchichikelo, ho atohka ariapii mi atohmika heniiñ chuli paka heniiñ, siikasi uroya khiiniiñ pa lyido hikha yamu hoka byabi niimi la achu-amyo membi niimi hentola.”

³⁴ Ho Jisu kalala si mo hendi biidola ludo hiila, mo mohmi lutii, “No Pinii ka raddeganda hokii ano adho kumake.” Ho hiika hiiba hokii kone tiirḛ mohmi taka dupa haro giiku matii.

Masiah Piigo mika Takaniiñ

³⁵ Ho Jisu piniiude ho tonsḛr la dola, mo lutii, Niihtañpa pagenii atañ lula kendo Kristo David ka oho hiila?

³⁶ David mohlya, Darii Yajiyallo lo luko kolala, lutii, Attoh lutii ngiika Attoh mi, Ngiika lahbi alah ho duto, nii dahepa ngo niika ahha-banii mi niika alih liidi ho atii tama.

³⁷ David mohlya mohmi Attoh hiila gyotii; niihtañpa mo mohka oho pa lyila kendo? Ho hempḛr taropa miyuatañ mohka luniiñmi taji biidola tanyatii.

Jisu Dapo Tonsḛrbo Atañ mi Luluñ Biido

³⁸ Ho Mohka tonsḛrko, mo lutii, “Pagenii atañ kokii hendila danyato, bihañ mi obyo pa soddo pa giitola indula, ho biijḛr liipa ho mihlo khiiko nala danyada,

³⁹ ho sinagog ho khiiniiñ ja duko dunañla ho butii pungko ka khiiko jaho danala miida,

⁴⁰ mohlu hiimie atañka ude mi kalyi-kabyo nyada ho lukañdo hiila taya hepa kuniiñ mi obyopa lukañ nyada. Mohlu uroyapa halii kokiñdo.”

Hiimie ka Biniiñ

⁴¹ Mo tiicko alii ko pache dalyiho dutii, ho miyu atañka tiicko alii ko hoka alii niimi kala dutii. Abuje mingo miyuatañ hempḛr malañpa tiicko alii nyatii.

⁴² Ho arroatu hiimie kone ahtii, ho posa amii penye alii tii, hiika hii tiicko bare kanetii.

⁴³ Ho mo mohka henjeajiñ atañmi mohko gyoliitii, ho mohlumi lutii, “Jijeloda, ngo nunumi lukoso, siika arroatu hiimie si abu japa tiicko aliibiine hikha soka tiicko alii binii atañmi hentola.

⁴⁴ Niimpalukoda miilañru mohluka abuje donii hokii sii bibii siinenii; hojalo mo arro siido hikha mohkoka donii hemi alii biine, hikha mohka sana nansa nii hemi.”