LUK KA AYAPUYU 5 - NITI GONTU N.T. (BSI)

Jisu Gyotu Japa Hanjeajiñ Atañ mi gyobiido

¹ Miyu atañ mohmi nenje nenge biilyinii Pinii aguñmi tadupa hiila, mo Genesaret ka siimie ho datii.

² Ho mo hulu tanye siimie ho kappatii; hojalo ngiiyyi lanii atañ intiiku ho mohluka pakhe atañmi asela dotii.

³ Hulu tare ho chala, niihna Saimon kiitiinii, mo lubiido mohmi siilyo hokiila ichuche adho dopa miito. Ho mo dutii ho miyu atañmi hulu hokiila tonsḛrtii.

⁴ Ho mo luja kulala, mo lutii Saimon mi, “Urañ dalyiho khohato ho niika pakhe mi kuloto hadupa.”

⁵ Ho Saimon lusitii, “Atoh, ngunu siyo yoteje hakatii ho hang habiima! Hojalo niika lukopa ngo pakhemi kulo talyike.”

⁶ Ho mohlu hiila miikele, mohlu hempḛr ngiiyyi soro abuje habiido; mohluka pakhe lohepa bare giipa miitii,

⁷ mohlu mohluka ajiñ atañmi hoyetii mohluka huluho ahla mohlumi hembyuñpe hiila. Ho mohlu ahtii ho hulu tanye ruho poteje latii, hopa mohlu huhapa miitii.

⁸ Hojalo hiimi Saimon Pitar kappa lala, mo Jisu ka liibañ ho chuha tii, lubiidola, “Ngiiko hokii adho insa heku, niimpalukoda ngo ingyamiigyanii miyu ke, O Attoh.”

⁹ Niimpalukoda mo hempḛr kamutii, ho hikha mo agiñ hoka danii atañ miilañ, mohluka ngiiyyi laniiñ atañmi;

¹⁰ ho hii chulipa Jems la Jon nyi miilañ, Zebedi ka oho anye, mo anye Saimon ka ajiñ paka danii. Ho Jisu lutii Saimon mi, “Biisoyo; siisi kiija nunu miyu mike gyokiñ donii.”

¹¹ Ho mohlu hulu mi kiiddi ko kholiñ kulala, mohlu kapanehemi apatela ho mo kiiliñ ho imbo montii.

Jisu miyu Kone mi Miipya Biido

¹² Mo citi kone ho dakele, hiiko miyu kone tahikoya giitola ahtii; ho mo Jisu mi kappa lala, mo mohka nyimo mi chuki lala ho mohmi kutii, Attoh, no matiirḛ hendo koda, no ngiimi darii dopa miila kendo.

¹³ Ho mo mohka alah mi lyuliñtii, ho tennetii, lubiidola, “Ngo hendo; dariitoku.” Ho ohepada tahikoya giiniiñhii hempyo datiiku.

¹⁴ Ho mo kone mitrḛ luko lyayo hiila mohmi lubiido; hojalo “inge ho no atohmi nyibu mi kakiñ siinge, ho binge Mose ka luniiñ chulipa Pinii mi niimi ka miipya kuko hopa, miyuatañ mika luko lutiñnaniiñ pa.”

¹⁵ Hojalopa abuyapa ya mohka piigomi adhoganda ho tapala lyitii; ho abuje miyu dakuñ nyatii tadupa ho mohluka achih-ahe hokii miipya kodupa hiila.

¹⁶ Hojalo mo hokii zabyo ho ingiitiiku ho kutii.

Jisu Liikuñnii Miyu Kone Mi Miipya Biido

¹⁷ Allo lohe, mo tonsḛrla dokele, hiiko Parisi atañ la dapo ka tonsḛrbo atañ aruñare ho dutii, hiika atañ Galili ho Judia ho Jerusalem lemba kone abi hokii ahnii; ho Attoh ka miipya nanii harchichike hii mohko giitii.

¹⁸ Ho kato, miyuatañ dota naniiñ ho liikuñnii miyu kone mi jolii biido, ho mohlu mohmi ura ho jolii biinatii ho Jisu ka aruñho atii nantii;

¹⁹ hojalo uraho jolii biiko lembo kappa matii, miyuabuje dako hopa, mohlu malo ayoho chatii ho hokiila dota naniiñ mi jota lola santa mi khoko lala punko jaho Jisu ka hataho jolo bitii.

²⁰ Ho mo mohluka henje mi kappa lala mo lutii, “Miyu, niika ingyamiigyanii atañmi hello tiikuke.”

²¹ Ho pagenii atañ la Parisi atañ taka ritii, lubiidola, Huna siika miyu si pinii mi nipadanii? Hu ingyamiigya niimi hello lakiñdo hojalo Pinii kontiisii?

²² Jisu mohluka takanii atañmi hempa lala, mo lusitii mohlumi, “Niimpa nunu taka siinyada nunuka ahha ho?

²³ Niihpe lupyo lyakiñ doniiñ, ludupa, ‘Niika ingyamiigyanii atañmi hello tiikuke,’ malo hiila luniiñ yapeha, ‘Gurito ho into’?

²⁴ Hojalo nunu hiila chingiihe Miyu ka Oho ko kiiddi-apiñ daka ingyamiigya atañmi hello nanii otority giido hiila” mo lukuñlamu bomi lutii “Ngo niimi ludu, gurito, niika pepu mi khebii kula ude ho ingeku.”

²⁵ Ho ohepada mo guridatii mohluka hataho, ho mohka dotananii mi khebii tiiku, ho ude ho intiiku, Pinii mi assañ biidola.

²⁶ Ho miilañrumi hemur dopa miitii, ho mohlu Pinii mi assañtii ho biiso nyatii, lubiidola, siilo kapuñ drih kappatii.

Jisu Levi mi Gyobiido

²⁷ Siika hiibaho mo agoho lintiiku, ho biijokajo myanii kone kappatii, hiika armyañ Levi hiila, biijokajo myako ude ho dupa; ho mo mohmi lutii, “Ngiika kiiliñ ho imboto.”

²⁸ Ho mo amanehemi apatii, ho guritii ho mohmi imbo montii.

²⁹ Ho Levi mohka ude ho hempḛr kayepa mohmi diigo hotii; ho hiiko abuje biijokajo myanii atañ ho khiibemiyu miilañ mohluka agiñho diitananii ho dubo montii.

³⁰ Ho Parisi atañ la pagenii atañ mohka henjeajiñ atañmi budubudu lunyatii, lubiidola, “Niimpa nunu diidu tandu biijokajo myanii atañ la ingyamiigyanii atañ agiñho?”

³¹ Ho Jisu mohlumi lusitii, “Huna dasḛr la dunii hii datḛr mi anna make, hojalo huna achih nyadonii;

³² Ngo denki mi gyopa amake, hojalo ingyamiigyanii atañ misuke henkur kiine dupa hiila.”

Nyoniiñ Piigo mika Takaniiñ

³³ Ho mohlu mohmi lutii, “Jon ka henjeajiñ atañ kiirañ nyodo ho kuniiñ mi kiirañ kudo, ho hii chulipa Parisi ka henjeajiñ atañ tiirḛ, hojalo niikii diido-tando.”

³⁴ Ho Jisu mohlumi lutii, “Mihie millo lasu lyiho hoka nyibo ahnii atañmi nunu nyoke nela kendo peha mohluka agiñho mihie lasabo durañpa?

³⁵ Allo loliñ kendoke, niidana mihie lasa bomi mohluka agiñ hokii ira giichinii, ho mohlu nyola kendo hiika allo ho.”

³⁶ Mo mohlumi lutiñnaniiñ miilañ lukotii: “Kone tiirḛ pulye niti hokii sarliñ lala ho hiimi pulye khu ho ripo liima; mo matiirḛ hiila miidokoda, mo niti miya sarche kendo, ho niti hokiika ripo liiniiñ hii khu ho kapo kema.

³⁷ Ho kone hetḛr roalha ajañ mi dije khu ho hiliima; mo matiirḛ hilii dokoda, roalha ajañ hii dije alyo mi buche giikiñdo ho ubu hopa bipa linkiñdo, ho alyo miya ayamapa miikiñdo.

³⁸ Hojalopa roalha ajañ mi dije niti hosu hilii kensu donii.

³⁹ Ho kone tiirḛ roalha khu mi tala lala niti hokii tanado hiila henkiñma; niimpalukoda mo ludo, ‘Khu hii ayado.’”