LUK KA AYAPUYU 3 - NITI GONTU N.T. (BSI)

Jon Baptisma Biniiboka Tonsḛrniiñ Khenyonii

¹ Tiberias Kesar ka sangiilaka nyalyañ lengo niiho, Pontius Pailet Judia ka govonor paka duho, ho Herod ka Galili ka hakhupiilye ako mika radde paka sangii duho, ho mohka anu Philip ka Iturea la Trakonitis ka hakhupiilye ako ka radde pa duho, ho Laisani ka Abilene ka hakhupiilye ako ka radde paka duho,

² Anna la Kaipas nyika nyibu burii paka duho, Pinii ka aguñ Zakariah ka oho Jon ko ahtii zabyo ho;

³ ho mo hikha Jordan gandaho intii, tonsḛr khenyotii henkur niika baptisma lasa niimi ingyamiigya atañ hokii ka hello koku saniiñ mi.

⁴ Hiila ketola do Aijaya nyibuhenii ka kheta ho, “aguñ gonge gyula do zabyo ho: Attoh pa lembo miimyo bito, mohka lembo mi parda pa miibito.

⁵ Pabupako kone abimi apyañ kendo, ho putoopuko puhe abimi ako dopa miikiñdo, ho tuki mi parda dopa miikiñdo, ho tayatara lembo mi hilu dopa miikiñdo;

⁶ ho hikha miyuatañ Pinii ka sangopyako mi kappa kendo.”

⁷ Mo lutii miyuabuje mohlo baptisma biko dupa ahnii atañmi, Nunu lyolyichochi atañ, hu nunumi Pinii ka hadii hokii hargiihe hiila luluñne?

⁸ Henkur kuniika ahee ya hikiñto, ho nunu atoh-atoh lusu nyayo, Ngunukii Abraham da, ngunuka aba pa; niimpalukoda ngo nunumi lukoso, Pinii siika yalañ miilañ sokii tulala Abraham ka oho pa miila kendoke.

⁹ Siisi jalo yahii mi tellii tola do sannii atañka liimaho; sannii buhe abi aya ahee hima niimi papa lala ho yamu ho golii kendo.

¹⁰ Ho miyuabuje danii atañ mohmi takatii, “Hokoda siisi ngunu niihpe miikiñ donii?”

¹¹ Ho mo mohlumi lusitii, “Hukiina tarii benye donii, hiimi hukiina nyimanii giigii kiineto; ho hukiina diigo donii, hiimi tiirḛ hiila miike nento.”

¹² Biijokajo myanii atañ tiirḛ baptisma ladupa ahtii, ho mohmi lutii, “Tonsḛrbo, ngunu niihpe miikiñ donii?”

¹³ Ho mo mohlumi lutii, “Myale la myalyayo nunumika luniiñmi.”

¹⁴ Sipahi atañ tiirḛ takatii mohmi, “Ho ngunu, niihpe miikiñ donii?” Ho mo mohlumi lutii, “Mikii mi chechepa robi yayo ho amuhpa halii biidola, ho niika injo mi khe biitolya.”

¹⁵ Miyu atañ kalya laka dusu lyinii, ho hikha miyuatañ mohluka ahha ho taka siinyatii Jon mi, rongkoda si masu yuha Kristo,

¹⁶ Jon mohlumi lusitii, “Ngo nunumi yasie lo baptisma bidu; hojalo ngiimi tamo-chikho yanii kone ahkiñdo, Ngo mo agiñho mohka luku rappo nanii mitrḛ tapya binii patḛr lyimake; mo nunumi Darii Yajiyallo la yamulo baptisma bikiñ doke.

¹⁷ Mohka yapyo mi mohka alah ho biido, mohka amoo piniiñ mi kheppa dupa, ho emmo abiñ mi nesu ho atii dupa, hojalo asuh atañmi lyame lamanii yamu ho hompa kendo.”

¹⁸ Hiichulipa, abuje khiibe haro lupatii, mo miyu atañmi aya puyu tonsḛrkhenyo tii.

¹⁹ Hojalo Herod hakhupiilye ako mika sangiinii, humina ayama hiila lutiinii Herodias ka piigopa, mohka anu ka mihie kiipa, ho hikha diimmah drih Herod ka miiniiñ atañpa,

²⁰ siimi hiika agiñho lugyo liilala Jon mi pattiih tuntii.

Jisu ka Baptisma Laniiñ

²¹ Siisi hikha miyuatañ baptisma lanyatii, ho Jisu tiirḛ baptisma latii ho kula dotii, yapuñ hii ngekotii,

²² ho Darii Yajiyallo mohko apopa totii, pakoo chulipa, ho aguñ gonge yapuñ hokii luliñdo, “No ngiika heniiñja Oho; humina ngo ano hempyo biidunii.”

Jisu ka Aba-apa Atañ

²³ Jisu, mohka miigolugo mika miiri biilyiho, anyañ nyang hikhañ hepa lyitiiku, Josep ka oho paka lyilyinii, Heli ka oho,

²⁴ Matthat ka oho, Levi ka oho, Melchi ka oho, Jannai ka oho, Josep ka oho,

²⁵ Mattathias ka oho, Amos ka oho, Nahum ka oho, Esli ka oho, Naggai ka oho,

²⁶ Maath ka oho, Mattathias ka oho, Semein ka oho, Josech ka oho, Joda ka oho,

²⁷ Joanan ka oho, Rhesa ka oho, Zerubabel ka oho, Shealtiel ka oho, Neri ka oho,

²⁸ Melchi ka oho, Addi ka oho, Cosam ka oho, Elmadam ka oho, Er ka oho,

²⁹ Josua ka oho, Eleajar ka oho, Jorim ka oho, Matthat ka oho, Levi ka oho,

³⁰ Simeon ka oho, Juda ka oho, Josep ka oho, Jonam ka oho, Eliakim ka oho,

³¹ Melea ka oho, Menna ka oho, Mattatha ka oho, Nathan ka oho, David ka oho,

³² Jesse ka oho, Obed ka oho, Boaj ka oho, Sala ka oho, Nahson ka oho,

³³ Aminadab ka oho, Admin ka oho, Arni ka oho, Hezron ka oho, Perez ka oho, Juda ka oho,

³⁴ Jakob ka oho, Isak ka oho, Abraham ka oho, Terah ka oho, Nahor ka oho,

³⁵ Serug ka oho, Reu ka oho, Peleg ka oho, Eber ka oho, Shelah ka oho,

³⁶ Kainan ka oho, Arphaxad ka oho, Shem ka oho, Noah ka oho, Lamech ka oho,

³⁷ Methuselah ka oho, Enok ka oho, Jared ka oho, Mahalaleel ka oho, Kainan ka oho,

³⁸ Enos ka oho, Seth ka oho, Adam ka oho, Pinii ka oho.