LUK KA AYAPUYU 19 - NITI GONTU N.T. (BSI)

Jisu la Zakayas nyi

¹ Mo Jeriko ho ahtii ho hiimi impo biitii.

² Ho hiiko miyu kone dutii Zakayas hiila; mo biijokajo myanii pyollojapa dutii, ho mingo tiita.

³ Ho mo Jisu hu jana hiila kaka nantii, hojalo kapa lamatii, miyuabuje dako hopa, niimpalukoda mo miyu akotii.

⁴ Hopa mo hapyola ho sycamore sannii ho sonchatii mohmi kadupa, niimpalukoda mo hiika lembopa impo biikiñtii.

⁵ Ho Jisu lengo ho ahchi biila, mo kadu chatii ho mohmi lutii, Zakayas, nyibya miito ho totoku; niimpalukoda ngo niika ude ho siilo duchike.

⁶ Hopa mo nyibya miitii ho akañ ho totiiku, ho mohmi hempyo biidola kariitii.

⁷ Ho mohlu siimi kappa lala miilañru budubudu adu nyatii, “Mo ingyamiigya niika ude ho nyibo pa lyila ahne.”

⁸ Ho Zakayas guritii ho lutii Attoh mi, “Kato, Attoh, ngo ngiika drihpachi porche hemi arroatu mi bichi; ngo matiirḛ mihmi gollula hang ako lale bitii milo, ngo rompe abu yapa bili talyiku.”

⁹ Ho Jisu mohmi lutii, “Siilo sangopyako hii siika ude so ahdo ke, mo tiirḛ Abraham ka oho paka lyilyinii.

¹⁰ Niimpalukoda miyu ka Oho hii ahtii lyunii mi medupa ho lyangur dupa.”

Ayyiñ Posa atañ mika Lutiñnaniiñ

¹¹ Mohlu siika drih atañmi tala dukele, mo lutiñnaniiñ luko ritii, niimpalukoda mo Jerusalem ka aruñho datii, ho mohlu Pinii ka raddeganda hii nyibya ahkiñ doku hentii.

¹² Hopa mo lutii, Hela miyu kone adho gandaho intii raddeganda mi larii dupa ho hiikahiiba ho ahkurtiiku.

¹³ Mohka miira alyañ hemi gyola lala, mo mohlumi posa pelyañ he bitii, ho mohlumi lutii, Siika siimi kiiri miina nantolya nii dahepa ngo ahtema.

¹⁴ Hojalo mohka citi daka miyuatañ mohmi kana matii ho puyubakobomi mohka kiiliñ ho neliitii, lubiidola, Ngunu siika miyu silo ngunumi sangii konama.

¹⁵ Mo ahkur tiiku, raddeganda mi larii tekula, mo hiika miira atañmi lubiido, humina mo posa bitiinii, mohko gyoliitii, niimpalukoda mo chindupa hiila nehna mohlu kiiri miiko hokii miilii biitiinii.

¹⁶ Kapyojahii ahtii mohko, lubiidola, Attoh, niika posa mi pyarlyañhe abuyadopa miitii.

¹⁷ Ho mo mohmi lutii, Ayamiitii, denki miira! Niimpalukoda no hempḛr ichu mitrḛ lotii biido, niiko citi alyañ hemi kabii dopa otority giikiñ doke.

¹⁸ Ho anye niibo ahtii, lubiidola, Attoh, niika posa mi pyarngohe dopa miitii.

¹⁹ Ho mo mohmi lutii, Ho no citi yangohemi kabii to.

²⁰ Hiikahiibaho koneya ahtii, lubiidola, Attoh, sike niika posa, nii mina ngo pulye nyetañ ho nyuke tola atii tiinii;

²¹ niimpalukoda ngo niimi biisoto, no hempḛr luru miyu; no niika bimanii miilañmi laduku, ho amoo pidu niika lilo manii miilañmi.

²² Mo mohmi lutii, Ngo niimi niika aguñ luliñ niiho halii talyi, no diimmah miira! No chindo ngo luru miyu hiila, ngo bima patḛr kudu hiila ho nii mina lilo manii hokii miilañ amoo pidu hiila?

²³ Niimpa hokoda no posa mi benk ho atiima, ho ngiika ahlyikuho ngo hiimi atu lata la latii kudo?

²⁴ Ho mo lutii hiika aruñhoka danii atañmi, Mo kokii posa mi lato ku, ho hiimi hukiina posa pyarlyañhe biidonii hiimi bito.

²⁵ (Ho mohlu mohmi lutii, Attoh, mohkii posa pyarlyañ he biido!)

²⁶ Ngo nunumi lukoso, kone abi hukiina donii hiimi abuyapa bikiñdo; hojalo hukiina nyimanii hiiko hokii, niihna mohko donii hiimi miilañ lara biikiñ doku.

²⁷ Hojalo siika ngiika ahha-banii atañ siimi, huna ngiimi mohlumi sangii kona manii, mohlumi so ahgii ho ngiika kadopa mento.

Jerusalem hoka Ahniiñ

²⁸ Ho mo siika siimi luku lala, mo hata dalyi intii, Jerusalem lohe chatii.

²⁹ Mo Betpage la Betany ka aruñho ahchibiila, Olivet hiila luniiñ putoo ho, mo henjeajiñ anye mi kiiniñtii,

³⁰ lubiidola, “Inge pache dalyi lemba ho, niinyi ahlyila hiiko gadoh dore rañtola kappa kendoke, nii hona siisi lohepa mi duka marañnii; hiimi tapya biila ho so boliibii.

³¹ Mi matiirḛ niinyimi taka lyimilo, ‘Niimpa siimi niinyi tapya du?’ niinyi hiila lutolya, ‘Attoh siimi anna doke.’”

³² Hopa humina kiiniñ tiinii hii intii ho mohka mo anye mika luniiñ chuli kappa biido.

³³ Ho mo anye gadoh mi tapyala dokele, hiika atoh mo anye mi lutii, “Niimpa niinyi gadoh mi tapya da?”

³⁴ Ho mo anye lutii, “Attoh siimi anna doke.”

³⁵ Ho mo anye hiimi Jisu ko bolii bitii, ho mohluka pulye mi gadoh ho pyucha lala mohlu Jisu mi hiiko duke nentii.

³⁶ Ho mo lembo ho harkele, mohlu mohluka pulye mi lembo ho pyubitii.

³⁷ Mo aruñho siisi ahchi kukele, Olives Putoo ka aruñho, hikha henjeajiñ atañ la miyuatañ hempyo rinyatii ho Pinii mi assañtii hempḛr goropa gyubii dola hikha kaye miigo miiniiñmi mohlu kappa lala,

³⁸ lubiidola, “Lyanko kendo Radde huna Attoh ka armyañ pa ahdonii! Chimie hii dariiganda ho dokiñcho ho kahejapa assañdu!”

³⁹ Ho Parisi tonge miyuapur hoka danii mohmi lutii, “Tonsḛrbo, niika henjeajiñ atañmi gato.”

⁴⁰ Mo lusitii, “Ngo nunumi lukoso, siika atañsi matiirḛ adu makoda, siika yalañ atañsi gyuri kendo.”

Jisu Jerusalem pa Khedo

⁴¹ Ho aruñ ahchi biila ho citi mi kapa lala mo hiipa khetii,

⁴² lubiidola, “Siilo jalo nunu chindo drih atañmi niihna chimie giidonii! Hojalo siisi hiika atañmi nunuka amee hokii achuñ tola doke.

⁴³ Niimpalukoda allo hii nunuko ahkiñ doke, niida nunuka ahha banii nunumi dakḛr pabii kendo ho kapakohe dalyi hokii miitiñ biikiñdo,

⁴⁴ ho nunumi miimiilokiñ doke, niimi ho niika oho atañmi niika agiñho, ho nunuka ayoh ho yalañ puhe tiirḛ doke nenkiñ make; niimpalukoda nunu chima niida myodu ahkiñdo niimi kaha dupa.”

Jisu Piniiude ho Ahdo

⁴⁵ Ho mo piniiude ahtii ho piipa ritii hutiina pyula dotiinii,

⁴⁶ mohlumi lubiidola, “Hiila ketola do, ‘Ngiika ude si kuko ude pake’; hojalo nunu siimi diipyonii atañka dukuñ ko miru pa miitii.”

⁴⁷ Ho mo allokamya mi piniiude ho tonsḛrtii. Nyibu burii atañ la pagenii atañ ho miyu atañka akho atañ mohmi pyadu lodu pa hiila metii;

⁴⁸ hojalo mohlu hangja mepa matii mohluka miila sanii, niimpalukoda hikha miyuatañ mohka luniiñ atañ ho tatii.