LUK KA AYAPUYU 18 - NITI GONTU N.T. (BSI)

Hiimie la Gondu Nyimi ka Lutiñnaniiñ

¹ Ho mo mohlumi lutiñnaniiñ lukotii, hiika lukoniilo mohlumi kiirañ kuke nendupa ho ahha mi hempya siima dopa.

² Mo lutii, “Citi koneda ayakacho kanii kone dutola Pinii mitrḛ biisoma ho miyu mitrḛ khiima;

³ ho hiiko hiimie kone dutii hiika citi ho hii kiirañ mohko ahla ho lukañtii, ‘Ngiimi ngiika ahha banii kokii lupya tokupe.’

⁴ Mo hatuñhe ma lutii; hojalo kamikalo ho mo atoh atoh lusutii, ‘Ngo Pinii mi biiso masu jalo malo miyu mi khiima siijalo,

⁵ hojalo niimpalukoda siika hiimie si lukañari ngiimi ludo, ngo mohmi lupya bichi, hiilamakoda mo ngiimi henga henkha miipa biichi mohka kiirañ ahniiñlo.’”

⁶ Ho Attoh lutii, “Takato niihna diimmah ayakacho kaniibo ludonii.

⁷ Ho Pinii mohka kahenii miyu mi lupya bikiñmaha, huna allo ayoh mi mohmi kheko donii? Mo mohlumi diirii miikañ bikiñdopeha?

⁸ Ngo nunumi lukoso, mo nyibya loda mohlumi lupya bikiñdo. Hiilamakoda, niida miyu ka Oho ahchi ku, mo kiiddiapiñ so henje kappa kendo ha?”

Parisi la Biijokajo Myanii Nyimika Lutiñnaniiñ

⁹ Mo siika lutiñnaniiñ mitrḛ lukotii tangemi huna atohmi henjesiila mohlu denki ho khiibe mi khiipa danii:

¹⁰ “Miyu anye piniiude ho intii kudupa, kone Parisi tii ho kone hii biijokajo myaniitii.

¹¹ Parisi guri biila ho mo atohpa hiila kutii, ‘Pinii, ngo niimi payapacho ludu niimpa ngo khiibemiyu chitañ ma, diilelulenii, henguherenii, ipfyonii, malo siika biijokajo myanii chitañ.

¹² Ngo kanualo ho ronye nyodu, ngo hakhualyañ hikha ngiika paniiñ hokii bidu.’

¹³ Hojalo biijokajo myaniibo, adho ho dala, mohka amee mitrḛ yapuñ ho kadu chamapa, hojalo mohka habyañ hoya kiisu biidola, lubiido, ‘Pinii, ngiimi arohpe ingyamiigya bomi!’

¹⁴ Ngo nunumi lukoso, siika miyusi mohka ude ho intiiku ludḛrkokula akoyami hentola; niimpalukoda hujalo atohmi kaye miisutalyi atudopa miikiñdo, hojalo huna atohmi atu miisu talyinii hiimi kaye dopa miikiñdo.”

Jisu Himme Atu Atañ mi Lyando

¹⁵ Siisi mohlu himme ajañ lohepa mohko ahgii bitii mohmi mohlumi tenka kiine dupa; ho hiimi henjeajiñ atañ kappa lala, mohlu mohlumi gatii.

¹⁶ Hojalo Jisu mohlumi mohko gyoliitii, lubiidola, “Himme atañmi ngiiko ahkenento, ho mohlumi ahyo hiila lutiñyo; niimpalukoda Pinii ka raddeganda hii siika atañ kiike.

¹⁷ Jijeloda, ngo nunumi lukoso, hujalopa Pinii ka raddeganda mi siika himme chuli larii tama hii ho ahla kemake.”

Mingo Miyu

¹⁸ Ho sangiibo mohmi takatii, “Denki Tonsḛrbo, niihpe ngo miido koda santḛrlamanii sango kappa kendo nii?”

¹⁹ Ho Jisu mohlumi lutii, “Niimpa no ngiimi denki hiila gyodu? Kone tiirḛ denkima hojalo Pinii kontiisii.

²⁰ No chindo lujubiniiñmi: ‘Ipfyo lyayo, Melyayo, Diipyo lyayo, Amuhpa haki lyibi lyayo, niika annii-aba mi khiitolya.’”

²¹ Ho mo lutii, “Hikha siika atañmi ngo ngiika yapa hokii miicha biidu.”

²² Ho Jisu siimi tapa lala, mo mohmi lutii, “Drih kone no giima ranke. Pyunge hikha niiko hoka doniimi ho arro atañmi tache tahe binge, ho niikii dariiganda ho alḛrdrih dokiñ doke; ho ahto, ngiimi imbomonto.”

²³ Hojalo mo siika siimi tapa lala mo heru ritii, niimpalukoda mo ano mingotii.

²⁴ Jisu mohmi kadi biidola lutii, “Niimkane ahru do mingo atañpa Pinii ka raddeganda ho ahdupa!

²⁵ Niimpalukoda siikasi uth paya pasu ubu ho pabbo papyo yakiñdo mingo miyu ka Pinii ka raddeganda hoka ahniiñmi hentola.”

²⁶ Hutiina siimi tapa nyatiinii lutii, “Hokoda hu lyangur kola kendo?”

²⁷ Hojalo mo lutii, “Niihmina miyuatañ miila manii hiimi Pinii miila doke.”

²⁸ Ho Pitar lutii, “Kato, ngunu ngunuka ude atañmi apateku ho niimi imbomondu.”

²⁹ Ho mo mohlumi lutii, Jijeloda, ngo nunumi lukoso, miyu kone hetḛr nyima huna udemi malo mihie mi malo anubarmii malo annii-aba mi malo himmeoho mi apatiinii, Pinii ka raddeganda ka piigopa,

³⁰ hii siika santuso abu yapa pakiñ do, ho ahsa niika santuñ ho santḛrlamanii sangomi.

Jisu Rohiñniipa Mohka Shiisanii Piigomi Ludo

³¹ Ho alyañlenye mi ingiila, mo mohlumi lutii, “Kato, ngunu Jerusalem lohe chakiñ doke, ho kapane drih miyu ka Oho mika nyibuheniiñ atañka keniiñhii lyipe kendoke.

³² Niimpalukoda mohmi Midomiyu atañ ko tiilii bikiñdo, ho nyapa kokiñdo ho hiinyañ miipyu kokiñdo ho chukḛr chupu kokiñdo;

³³ mohlu mohmi hikiñdo ho mohmi mengkiñdo, ho allo lohiñ niiho mo turiturku kendoku.”

³⁴ Hojalo mohlu gonge hetḛr tachiñ matii siika drih atañ siimi; siika kolobiisie si mohluko hokii achuñ tola dotii, ho mohlu tachiñ matii nii hiila lutii.

Jisu Micha Myado Bomi Miipya Biido

³⁵ Mo Jeriko aruñho ahchi kiile, michanii kone lembo aruñho dula myatii;

³⁶ ho miyuabuje innii mi tapa lala, mo takatii siikasi niihna.

³⁷ Mohlu mohmi lukotii, “Nazaret daka Jisu impobiila doke.”

³⁸ Ho mo gyutii, “Jisu, David ka Oho, ngiimi arohpe!”

³⁹ Ho hutiina mohka hataho datiinii mohmi gatii, mohmi aduyo lubiido; hojalo mo uro yapaya gyutii, “David ka Oho, ngiimi arohpe!”

⁴⁰ Ho Jisu damotii, ho mohmi ngiiko ahgii hiila lutii; ho mo aruñ ahkele, mo mohmi takatii,

⁴¹ “Nii miibi kencho hiila hendu ngiimi niipa?” Mo lutii, “Atoh, ngiimi kappa kiine kupe.”

⁴² Ho Jisu mohmi lutii, “No kappa toku; niika henje ke niimi miipya biinenii.”

⁴³ Ho ohepada mo kappa tiiku ho mohmi imbo montii, Pinii mi assañbiido kula; ho hikha miyuatañ, hiimi kappa lala, Pinii mi assañbiido.