LUK KA AYAPUYU 16 - NITI GONTU N.T. (BSI)

Piibi Kalyabinii

¹ Mo hiira lutii henjeajiñ atañmi, “Mingo miyu kone kii kahlya binii kone dutola, ho haliinii atañ mohmi ahgii bitii siika miyu si niika drih atañmi miilyu miicha miija biidoke hiila.

² Ho mo mohmi gyola lala ho mohmi lutii, ‘Niihpe siikasi ngo niika piigo mi tapa biidonii? Niika kalya biniiñ piigorago mi luko kupe, niimpalukoda no kalya biniipa lyila keñku make.’

³ Ho kalyabiinii bo mo atoh mi lusutii, ‘Niihpe ngo miichinii, ngiika atoh ngiika kalya biiniiñ mi lara biilyi ku? Ngo hiimkane tamo ma aji mudupa, ho ngo myado dupa hiinyañdo.

⁴ Ngo niihpe miichinii hiimi hemmyo tiiku, niimpalukoda miyuatañ ngiimi larii yapa mohluka ude ho, niidana ngiimi kalyabiiniiñ hokii nempa talyi kunii.’

⁵ Hopa, mohka atoh kokii ka pagi giinii atañmi kone kone gyori la gyoliitii, kapyo jami mo lutii, Ne no ngiika atoh kokii pagi giido?

⁶ Mo lutii, ‘Kutu dije lange hepa’. Ho mo mohmi lutii, ‘Niika pota mi laliñto, ho nyibya pa duhala ho alyañlyango hepa keto.’

⁷ Ho mo kone mi lutii, ‘Ho no ne pagi giido?’ Mo lutii, ‘Yatañ yopo lange hepa.’ Mo mohmi lutii, ‘Niika pota mi laliñto, ho pinyikhange hepa keto.’

⁸ Atoh lotiimanii kalyabiiniiñ bomi assañbiido mohka piibi niimi; niimpalukoda siika dohadolo ka oho atañ piibi yado mohluka santuñ ho sandupa hutoh ka oho atañmi hentola.

⁹ Ho ngo nunumi lukoso, nunu ajiñ biito nunupa kiiddiapiñ ka tiickoyanii lo, niimpalukoda hiika nyiku malyi ho mohlulo lyulamanii duko atañ ho larii kodupa.

¹⁰ “Huna hempḛr iche mi lotii biidonii abu mitrḛ lotii biikiñdo; ho huna hempḛr iche mitrḛ lotii manii abu mitrḛ lotii biikiñ ma.

¹¹ Hokoda nunu matiirḛ kiiddiapiñ ka tiickoyanii paya lotii bimakoda, hu nunumi jije ka mingo mi kabii tote luchi?

¹² Ho nunu matiirḛ niihna mikii nii hiimi lotii bima koda, hu nunumi bikiñdo niihna nunuka atoh kiinii?

¹³ Miira kone tiirḛ attoh anye mi miiho lakiñma; niimpalukoda mo kone mi kahu kendo ho kone mi henkiñdo, malo kone mi hensañ lyakiñdo ho konemi hema lyakiñdo. Nunu Pinii la tiicko nyimi miiho lakiñ make.”

Jisu ka Kolobiisieniiñ Tonge

¹⁴ Parisi atañ, hutii na tiicko hembyo nyatiinii, hikha siika siimi tapa lala, ho mohlu mohmi ngarpa nyatii.

¹⁵ Hojalo mo mohlumi lutii, “Nunuke hiika atañ hutiina atoh mi miyu atañka hataho denki kakiñ siidanii, hojalo Pinii nunuka ahha mi chindo ke; nii mina miyu ka hataho assañ siidonii hii Pinii ka kata ho khiimake.

¹⁶ “Dapo la nyibuhenii nyi done Jon ka ahlyi lohepa; hiikii hokiija Pinii ka raddeganda ka aya payu atañ tonsḛrkhenyo tii, ho kone abi hiiko chechepa ahnya do.

¹⁷ Hojalo siikasi dariiganda la kiiddiapiñ nyiya lyupyo yakiñdo, dapo hokii penyo pere keniiñ ka lyusa niimi hentola.

¹⁸ “Koneabi huna atoh mihie mi byasu tela koneya mihie lahchi nii hii ipfyo do, ho huna atoh milo kokii byasu niimi mihie lahchi nii hii ipfyo do.

Mingo miyu la Lazaras nyi

¹⁹ “Mingo miyu kone duto la, huna niiji ho hempḛr aya kapyo pulye giitii ho huna allo karmyañmi diiji adi diitiinii.

²⁰ Ho mohka hagya ho arro miyu kone giila dotii Lazaras hiila armyañ, une adiñ giitola,

²¹ huna mingo miyu ka diitananii hokiika huhi niimi diinañ la dotiinii; hiikahaho ho akie atañ tiirḛ ahla ho mohka une mi lyasutii.

²² Arro miyu bo shiitii ku ho miidopopi atañ Abraham ka habyañho golii biitii. Mingo miyu botrḛ shiitiiku ho alie tiiku;

²³ ho nelimyoko ho, herumyanka la dola, mo kadu chala kachatii, ho Abraham mi adho pa kappatii ho Lazaras mi mohka habyañho.

²⁴ Ho mo gyoritii, ‘Aba Abraham, ngiimi arohpe, ho Lazaras mi kiiniñ tope mohka lahchi mituho yasie iche niibyu biila ho ngiika allyo mi tenka kiinetope; niimpalukoda ngo heru lake donii siika miilyo so.’

²⁵ Hojalo Abraham lutii, ‘Oho, hempato no niika sango ho aya drih adiñ kappatii, ho Lazaras hii chulipa ayamanii drih adiñ; hojalo siisi mohmi so hempyo pa biido kuke, ho no heruhela do.

²⁶ Ho hikha siimi opalala, niika la ngunuka punkoho hempḛr poro pa miipe tola do, niimpalukoda huna sokiila niiko impo biipa hendonii ila madopa, ho kone mitrḛ hiiko hokiila ngunu ko impo lama dopa.’

²⁷ Ho mo lutii, ‘Hokoda ngo niimi lyardu, aba, mohmi ngiika aba ka ude ho kiiniñ tope,

²⁸ niimpalukoda ngiikii anu midiñ yangohe du, niimpalukoda mohmi mohlumi luluñ kiinedupa, hiilamakoda mo lutrḛ siika heruhenko ganda so ahkiñ doke.’

²⁹ Hojalo Abraham lutii, ‘Mohluko Mose la nyibuhenii atañ duke; mohlumi mohluka luniiñmi take nento.’

³⁰ Ho mo lutii, ‘Ma, aba Abraham; hojalo shiitii hela matiirḛ kone mohluko ahdo koda; mohlu henkur kendoke.’

³¹ Mo mohmi lutii, Mohlu matiirḛ Mose la Nyibuhenii atañka luniiñmi tama koda, mohlumi shiinii hokii kone chala tiirḛ lyala kemake.”