LUK KA AYAPUYU 14 - NITI GONTU N.T. (BSI)

Jisu Achihnii Miyu kone mi Miipya biido

¹ Dumoalo lohe mo sangiinii koneka ude ho diigo dudu pa inkele mo huna Parisi tiinii, mohlu mohmi kala dotii.

² Ho kato, hiiko miyu kone mo hataho dutii hukiina yotiinii.

³ Ho Jisu lutii dapochenii atañ la Parisi atañmi, lubiidola, “Dumoalo hoka miipya niisi miidi kopeha malo miikha dopeha?”

⁴ Hojalo mohlu adumatii. Ho mo mohmi tenka lala ho mohmi miipyatii, ho mohmi inke nentiiku.

⁵ Ho mo mohlumi lutii, Nunukokii hu, nunuka oho jalo malo siih jalo siikuñ ho huhi dokoda, nyibya loda nunu mohmi seliñ kengkuma ha dumoalo ho?

⁶ Ho mohlu luko lusi lamatii siimi.

Chimeeñyanu la Hapumibya

⁷ Siisi mo lutiñnaniiñ lukotii hutii mina gyolii tiinii, mo mohlumi kala lala mohluka khiiko dalyi duko mika chiniiñmi, lubiido mohlumi,

⁸ “Nunumika mihie millo lasuko butiiapiñ diiko hoka gyolyi ho, khiiko dalyi ka duko ho dulya yo, hiilamapa nunumi kayeya miyu mi mo gyotii koda;

⁹ ho mo niimika gyoliibola anyeru ahla ho nunumi lukiñdo, Siika miyu siimi duko bito, ho nunu hiinyañ biidola khiima jaka duko duhi bikiñdo.

¹⁰ Hojalo niida nunumi gyolii talyi, inge ho dungelya khiimajaka dukoho, niimpalukoda niida udeatoh ahchi niimi lukiñdo, ‘Ajiñ, hahoyaho duto’; ho nunumi khiikiñdo miilañruka kadopa hutiina diigo diiko dunya dunii nunuka agiñho.

¹¹ Niimpalukoda koneabi hujalo atoh mi kaye hensutalyi hiimi atu miipa kendo, ho hii huna atohmi atu hensu talyinii hiimi kaye miicha kendo.”

¹² Mo lutii hiika miyu mitrḛ huna mohmi gyolii tiinii, “Niika alyiñapiñ malo butiiapiñ holyiho, niika ajiñmi gyoliiyo malo anubarmii mi malo niika henii-myanii mi malo mingo ariapii mi, hiilamiikoda mohlutrḛ niimi gyosi kendo, ho niimi bili kendo kuke.

¹³ Hojalo nunuka butiiapiñ holyiho, arro atañmi gyoto, lacha niimi, liicha niimi, micha mi,

¹⁴ ho nunumi lyankiñdo, niimpalukoda mohlu nunumi bisi lakiñ kuma. Nunumi turiturku lyiku hosu denki agiñho bili kensu donii.”

Hempḛrkahe Butii Apiñ Honiiñ mika Lutiñnaniiñ

¹⁵ Mo agiñ hoka diitananii hoka dubo monii kone siimi tapa lala, mo mohmi lutii, “Lyankokendo hii huna Pinii ka raddeganda ho diigo diibo kendonii!”

¹⁶ Hojalo mo mohmi lutii, “Miyu kone ronge hempḛrkahe butii apiñ hotii, ho abuje gyotii;

¹⁷ ho butii apiñ dudu myodu ahku kiile mo mohka miira mi kiiniñtii hutii mina gyotiinii lungete hiila, Ahto; niimpalukoda hikha siisi henju tiikuke.

¹⁸ Hojalo miilañru lupya rigiido. Kapyo jahii mohmi lutii, ‘Ngo aji ngohe riitii, ho ngo ila hiimi kate kendo loda; ngo niimi kudu, ngiimi hellope.’

¹⁹ Ho kone lutii, ‘Ngo siihhiibo dorngohe riitii, ho hiimi aya siido ha hiila kaka takiñdo; ngo niimi kudu, ngiimi hellope.’

²⁰ Ho kone lutii, ‘Ngo mihie latiiku, ho hopa ngo ahla kema.’

²¹ Hopa miira ahku bukula ho siimi mohka atoh mi lukotiiku. Ho udeatoh hii hadiila lutii mohka miira mi, ‘Inge nyibya loda citi ka lembo ho subusiiko abi, ho arro ho lachanii ho michanii ho liichaniimi ahgii.’

²² Ho miira hii lutii; ‘Tonsḛrbo, niika lungete luniiñmi miitii ke, ho hiira chidii dorañ.’

²³ Ho atoh lutii miira mi, ‘Inge lemyalera hola subusiiko ho, ho miyu atañmi ahdo pa loda miinge, niimpalukoda ngiika ude mi pote kiine dupa.

²⁴ Niimpalukoda ngo nunumi lukoso, kone hetrḛ humina ngo gyotonii diika latrḛ diipa kemake ngiika butii apiñ hokii.’”

Henjeajiñ Lyidu Pakoda

²⁵ Siisi hempḛr miyuabuje mohmi imbo montii; ho mo mokur biila ho mohlumi lutii,

²⁶ “Hu jalopa ngiiko matiirḛ ahchi ho mohka atoh aba mi ho annii mi ho mihie mi ho wiinga atañmi ho anuabañ mi ho barmii atañmi kanamapa miitema, ḛh, ho mohka sango mi lohepa, mo ngiika henjeajiñ pa lyila kema.

²⁷ Hujalopa atoh ka pogyañ mi bagiimapa ho ngiika kiiliñ ho ahbotalyi, ngiika henjeajiñ pa lyila kema.

²⁸ Niimpalukoda nunukokii hu, sobya pempa hendo koda, kapyopa dula ho nehna inkiñ donii khiika kema siipeha, mo hiimi penja lakiñ siido peha hiila?

²⁹ Hiilamakoda, mo liidi mi ari tiiku koda, ho penja lama koda, hikha hiimika kanii atañ mohmi ngarpa kendo,

³⁰ lubiidola, ‘Siika miyu si peritii, ho mo penja lama.’

³¹ Malo niihtañ radde, radde kone mi gyambo pate pa ilyila, kapyopa duhala ho takatara kema siipeha mo jarlyañhela pamiñlakiñ doha pamiñ lakiñ maha mohmika pariihanii jarnyikhañhemi?

³² Ho hiilamatrḛ miima koda, koneka hempḛr adho pa ahla dorañpa, mo puyubabi bomi kiiniñ kendo ho lukiñdo chimie mi atiisa.

³³ Hiiko hopa, hujalopa nunu hikha nunukoka doniimi apamakoda ngiika henjeajiñ pa lyila kema.

Piigoamanii Alho

³⁴ “Alho hii ayado; hojalo alho tihi matiirḛ tikhu doku koda, niihtañpa hiika tihi mi laku talyiku?

³⁵ Hiika hii kiiddi patḛr ayama malo ikha patḛr; miyuatañ hiimi ripadu. Hukiina yaroo giidonii tana naniipa, hiimi take nento.