LUK KA AYAPUYU 1 - NITI GONTU N.T. (BSI)

Lukolupyoniiñ

¹ Ngunuka punko hoka drih lyiniiñ mika lukotola doniiñ mi abuje miyu kekuñ kekañ nyane,

² niihtañpa mohlu ngunumi lukone hii chuli hutiina lotu jaho hokii ameela kaparibii tiinii ho puyu mika lukonii atañ,

³ si kakoso ngiipa tiirḛ ayado, kapane drih atañmi aruñ ahnii laka innekuniiñ mika keboniisi, hiimi ketiñ biila niipa kedo paka lyiniiñsi, ngiika heniiñja Tiopilus,

⁴ niimpalukoda niimi jije drih mi chinke nendupa niimika lukonii drih atañmi.

Jon Baptisma Biniibomi ka Oho Busaniimi ka Lukoniiñ

⁵ Herod, Judia ka radde paka duho myodu ho, hiiko nyibu kone dutii Zakariah hiila armyañ, Abija ka halugiira hokii; ho mohka mihie Aron ka wiinga, mo armyañ Elizabeth hiila.

⁶ Ho mo anye anyeru Pinii kata ho denkitii, Pinii ka hikha luniiñmi takho mapa ho pahañ halii komapa santii.

⁷ Hojalopa mo anye kii wiinga nyimatii, niimpalukoda Elizabeth tarluñtii, ho anyeru hempḛr akha tiiku.

⁸ Siisi mo Pinii mi miiho la dakele mohluka halugiira miigo paka lyilyinii,

⁹ nyibu atañka miigo miiju paka lyikoho, hiila lyitii mohmi Attoh ka piniiude ura ho ahla ho byamu dupa lyitii.

¹⁰ Ho hikha miyuatañ agoho kubila datii byamu byadu jaho.

¹¹ Ho hiiko Attoh ka miidopopi mohka agiñho ahtii, byamu ko agyañ ka lahbi dalyiho datii.

¹² Ho Zakariah mohmi kappa lala aluñtii, ho biisola mohko ahtii.

¹³ Hojalo miidopopi mohmi lutii, Biisolyo, Zakariah, niika kuniiñ mi talii biineke, ho niika mihie Elizabeth milobo wiinga giikiñ doke, ho no mohka armyañ mi Jon hiila myantolya.

¹⁴ Ho no ano hempyo kendo ho jojo kendo, ho abuje hempyo nyakiñ do mohmika bulyiho;

¹⁵ niimpalukoda mo Attoh ka kata ho ano khiiniiñ pa lyikiñdo, ho mo roalha tiirḛ takiñ ma ho ow alha tansa tiirḛ, ho mo Darii Yajiyallo poteje giikiñdo, mohka annii ka akhiiere jahokii.

¹⁶ Ho mo abuje Isrel ka oho atañmi Attoh mohluka Pinii ko ahkudopa miikiñdo,

¹⁷ ho mo mohmi impyo yapa inkiñdo yajiyallo la Elija ka harchichikelo, ho aba ka ahha mi wiinga atañ kii dalyi henga dopa, ho luniiñ tamanii atañmi chila denki kii dalyi, Attoh pa miyu atañpa miimyo bidupa miinyatii.

¹⁸ Ho Zakariah lutii miidopopi mi, “Niihtañpa ngo simi chiñkiñdo? Niimpalukoda ngo aba akhaku, ho ngiika mihie tiirḛ akha doku.”

¹⁹ Ho miidopopi lusitii mohmi, “Ngo Gabrel ke, Pinii ka duko hoka danii; ho ngiimi niimi lurii hete la kiiniñtii, ho siika ayapuyu siimi niimi babi dupa.

²⁰ Ho kato, no adu-abiñ kema ho lula kema nii dahepa siika luniiñsi lyipe tama, niimpalukoda no ngiika aguñ atañmi taje ma, niihna myodu ahlyi ho lyipe kendo nii.”

²¹ Ho miyuatañ Zakariah mi kalyala datii, ho mohlu hemur nyatii mohka piniiude hoka dakañ niimi.

²² Ho mo ago linku kiile, mo lurii lamatii mohlumi, ho mohlu helanyatii mo piniiude ura ho mihu kappatii hiila; ho mo mohlumi nyakiñ lala ho luha la dutii.

²³ Ho mohka miiho sanii myodu inja kukele, mo mohka ude ho intiiku.

²⁴ Hiika allo hokii mohka Mihie Elizabeth wiinga giitii, ho piilo barngo hemi mo achuñ giila dutii, lubiidola,

²⁵ “Hiila Attoh ngiipa miibi mohka ngiimika karii lyi allo ho, ngiika diima giima mi miyu atañka punko hokii lapa dupa.”

Jisu mika Busa niimi Lukotii

²⁶ Piilo barkhe niiho miidopopi Gabrel mi Pinii kokii kiiniñtii Galili citi Nazaret luniiñho,

²⁷ dokasanka manii nyimuñ koneko mabo inchi tola donii Josep hiiniiñko, David ka ude hokiitii; ho hiika, dokasanka manii nyimii ka armyañ Mary hiilatii.

²⁸ Ho mo Mary ko ahla ho lutii, “Hempyoto, kajikoniiñ bo, Attoh niika agiñho dake!”

²⁹ Hojalo mo hempḛr ahiare giitii mohka luniiñ hokii, ho mo hentii siika aya puyu si niihiisa niimipe.

³⁰ Ho miidopopi mohmi lutii, Biisoyo, Mary, niimpalukoda niimi Pinii kaji biidoke.

³¹ Ho tageto, no wiinga giikiñ doke ho milobo oho kone bukiñdo, ho no mohka armyañ mi Jisu hiila myañtolya.

³² Mo kaye kendo, ho hempḛr kaye ka oho lukiñdo; ho Pinii Attoh mohmi mohka aba David ka duko mi bikiñdo,

³³ ho mo Jakob ka ude mi ayu dahepa sangii kendo; ho mohka raddeganda lyukiñma.

³⁴ Ho Mary lutii miidopopi mi, “Si niihtañpa lyila kendo, niimpalukoda ngiikii milo nyima?”

³⁵ Ho miidopopi lutii Mary mi, “Darii Yajiyallo niiko ahkiñ doke, ho hempḛr kaye jaka harchichike hii niimi lyipu biilyi diike; hopa wiinga buko sanii bomi darii lukiñdo, Pinii ka wiinga hiila.

³⁶ Ho kato, niika henii-myanii Elizabeth tiirḛ mo akha siido kutrḛ oho kone giikiñdo; ho siikasi piilo barkhe duku mohka giikunii taluñ hiila gyokobo.

³⁷ Niimpalukoda Pinii ka miila maniiñ nyima ke.”

³⁸ Ho Mary lutii, “Kato, ngo Attoh loka pukonii; no nii ludo hiila lyike nento ngiiko.” Ho miidopopi mohkokii intiiku.

Mary Elizabeth ko Sohatii

³⁹ Hiika allo ho Mary gurila ho hempḛr nyibyapa putoopuko gandaho intii, Juda daka citi ho,

⁴⁰ ho mo Zakariah ka ude ho ahtii ho Elizabeth mi ayasiido lo hiila takatii.

⁴¹ Ho Elizabeth Mary ka luniiñmi tapa hangkele, mohka erre daka wiinga abyu ritii; ho Elizabeth ko Darii Yajiyallo ahtii

⁴² ho mo hempyo biidola hempḛr uropa gyutii, “Nyimuñ atañ lyañko kendo, ho lyanko kendo niika erre loka wiinga bukonii!

⁴³ Ho niimpa siikasi ngiipa miibitii, ngiika Attoh ka annii mi ngiiko ahdopa?

⁴⁴ Niimpalukoda kato, niika ayasiido lo luniiñ mi ngiika yaroo ho tapa dakele, ngiika erre daka wiinga hempyola abyu rine.

⁴⁵ Ho lyanko kendo no huna henje danii lyipe kendo hiila, niihna Mary mi lutiinii Attoh kokii.”

Mary ka Assañnii Biisie

⁴⁶ Ho Mary lutii, “Ngiika yallo Attoh mi assañdiilañ do,

⁴⁷ ho ngiika yajiyallo hempyodo Pinii ngiika lyangur boko,

⁴⁸ niimpalukoda mo mohka khiimaja miira mi khiido. Niimpalukoda kato, siilo kiija hikha santuñ atañsi ngiimi lyankonii hiila gyokiñdo;

⁴⁹ niimpalukoda mo ano tamobo hempḛr kaye miigo ngiipa miibitii, ho darii mohka armyañ.

⁵⁰ Ho mohka aroh hii hiiko dokiñdo huna mohmi biiso donii santuñ kone hokii santuñ abipala.

⁵¹ Mo kakiñtii tamo mi mohka lapolo, mo hentii siinii atañmi mompya monsa monjatii mohluka ahha heniiñmi,

⁵² mo ano tamo atañmi sepa lotii mohluka raddedutananii hokii, khiimapama miyu atañmi jotu chatii;

⁵³ mo haya miyu mi ayadrih poteje bitii, ho mingo mi arapa nempatii.

⁵⁴ Mo mohka miira Isrel mi hembyuñtii, mohka aroh mi hempa hengi naniiñpa,

⁵⁵ niihtañpa mo ngunuka aba atañmi lutii, Abraham mi ho ayudahepa mohka ohoasi atañmi.”

⁵⁶ Ho Mary mo agiñho piilo bariñhepa dubotii, ho mohka ude ho ahkurtiiku.

Jon Baptisma Biniibomi ka Buniiñ

⁵⁷ Siisi Elizabeth pa budu ahtii ku, ho mo milobo oho kone butii.

⁵⁸ Ho mohka ariapii atañ la henii-myanii atañ tapatii Attoh mohmi hempḛr aroh tii hiila, ho mohlu mo agiñho hempyo montii.

⁵⁹ Ho allo lopinye niiho mohlu wiinga mi mitupipa dupa ahtii; ho mohlu mohmi mohka aba Zakariah mi myantipa miitii,

⁶⁰ hojalo mohka annii lutii, “Hiila make; mohmi Jon hiilake myankiñ donii.”

⁶¹ Ho mohlu mohmi lutii, “Kone hetḛr niika henii-myanii siika armyañ mi myamma.”

⁶² Ho mohlu mohka aba mi miikiñtii, takatii mo nii hiilana mohmi myanchi nii.

⁶³ Ho mo matadrih keko mi kutii, ho ketii, “Mohka armyañ Jon.” Ho mohlu hikha hemur nyatii.

⁶⁴ Ho ohepada mohka aguñ lula ritiiku ho allyo tiipya tiiku, ho mo lutii, Pinii mi assañritii.

⁶⁵ Ho hikha ariapii atañ biiso nyatii. Ho hikha siika drih mi lusu nyatii hikha Judia putoo ganda siikoho;

⁶⁶ ho hikha siimi ka tapanii atañ mohluka ahha ho siimi hengii nyatii, lubiidola, “Siika wiinga si niihpa lyine yuha?” Niimpalukoda Attoh ka alah hii mo agiñho dobotii.

Zakariah ka Nyibuheniiñ

⁶⁷ Ho mohka aba Zakariah Darii Yajiyallo poteje giitii, ho nyibuhentii, lubiidola,

⁶⁸ “Assañsa Isrel ka Pinii Attoh mi, niimpalukoda mo ahtii ho mohka miyu atañmi tupyatii,

⁶⁹ ho ngunupa sangopyako ka arii sari kendoke mohka miira David ka ude ho,

⁷⁰ niihtañpa mo lutii darii nyibuhenii atañka aguñlo ayuho,

⁷¹ ngunu lyangur kokiñdo ngunuka ahha banii atañ kokii, ho hikha ngunu mika kariñnii atañka alah hokii;

⁷² ngunuka aba atañ mika aroh miibi talyi luniiñmi miidupa, ho mohka darii hemmesiiniiñ mi hempa hengi naniiñpa,

⁷³ ngunuka aba Abraham mika mo hemme biniiñmi,

⁷⁴ ngunumi talii yape, ngunuka ahha banii atañka alah hokii tupya kokula, mohmi biiso mapa miiho kodupa hiila,

⁷⁵ darii henju la denkimiiju jaho mohka hataho hikha ngunuka sango ho.

⁷⁶ Ho no, wiinga, gyoko kendo kayejaka nyibuhenii hiila; niimpalukoda no impyo biila Attoh ka lembo atañmi mohpa miiju bikiñdo,

⁷⁷ sangopyako ka piigomi luko kiine dupa mohka miyu atañmi mohluka ingyamiigyanii atañ hokii hello biido kula,

⁷⁸ ngunu Pinii ka biinyah aroh lo, niidana hutoh hii ngunu pa haho hokii byohu bichinii

⁷⁹ huna kamo la shiigo ubu nyiho dunii hiimi hutoh byohu kiine dupa, ngunuka alih mi chimie lembo ho pagii dupa.”

⁸⁰ Ho himme sanchatii ho yajiyallo ho alḛrtii, ho mo zabyo ho datii mohka Isrel hoka limpo menda hemi.