KOLOSIA 4 - NITI GONTU N.T. (BSI)

¹ Atoh atañ, nunuka miira atañmi miidiko ho ayapa hento, chimbii dola nunukiitrḛ Atoh kone du dariiganda ho.

Lukoniiñ

² Kukañ ari yanupa kuniiñ mi kuto, hendi biidola hiimi payapacho hiibiidola;

³ ho ngunu patrḛ kuto lyape, niimpalukoda Pinii mi ngunu pa hagya miiko bidopa puyupa, Kristo ka michilamanii mi luko dopa, nii piigopana ngo pattiih tunko tiinii,

⁴ niimpalukoda ngiimi siimi didḛrpa ludopa, ngiika lusanii chikañpa.

⁵ Nunuka mujuluju mi hendi miidola miito ago miyu agiñho, aya myodumyolo mi miidiko miibii dola.

⁶ Nunuka lujju mi kiirañ lujuaya ho luto, tadiñdopa, niimpalukoda nunu chindupa niihtañ pana nunu kone abimi lukolusi kendonii.

Kamijapa Ayahelyi

⁷ Taichikas nunumi luko kendoke hikha ngiika piigo ragomi; mo heniiñja anu ke ho lotii miihoniiñ ho Attoh ka miira ahiñke.

⁸ Ngo mohmi siika piigo pa loda nunuko kiiniñ biilyi ke, niimpalukoda nunumi chinke nendupa ngunu niihtañ dona hiila ho mohmi nunuka ahha mi haro lupa nyake nendupa,

⁹ ho mohka agiñho Onesimas miilañ, lotii ho heniiñja anu, mo nunuka punko hokii kone. Mo anye nunumi luko kendoke kapane drih soka lyiniiñ atañmi.

¹⁰ Aristarkas ngiika pattiih tuhiñ koniiñ ahiñ nunumi ayahelyi ke, ho Mak Barnabas ka achibaro (hupa nunumi luko lumyoto, mo matiirḛ nunuko ahlyi milo, mohmi larii tolya hiila),

¹¹ ho Jisu humina Jastas hiila gyodunii. Siika miyuatañ kontiike mitupikonii ngiika agiñ hoka Pinii ka raddeganda paka miigo miibo nii, ho mohlu ngiimi aroh robyuñtii.

¹² Ipapras, hiikahii nunuka punko hokii kone, miira kone Kristo Jisu kii, nunumi ayahelyi, kiirañ nunumi mohka kuniiñ ho hempadu, niimpalukoda nunumi hengḛrla dake nendupa hiila ho hikha Pinii ka henko jaho taliila miidopa.

¹³ Niimpalukoda ngo mohpa haki bidu mo hempḛr uro miigo miinii ke nunupa, ho Laodisia la Hirapolis hoka dunii atañpa.

¹⁴ Luk heniiñja datḛr la Demas nyi nunumi ayahelyi ke.

¹⁵ Ngiika ayahelyi luniiñmi Lahodicea daka anubarmii atañmi bingepe, ho Nempa la mohka ude daka gyoliñkonii atañmi.

¹⁶ Ho niida siika siiti siimi nunuka punkoho richi, siika siimi Laodisia daka gyoliñkonii ho miilañ rike nento lya; ho kabiidola nunu tiirḛ Laodisia hokiika siiti mi rito lya.

¹⁷ Ho Archipas mi luto, Kato no miipe siitiiha niimika Attoh ka miigo biniiñmi.

¹⁸ Ngo, Pol, siika ayahelyi luniiñmi ngiika atoh alah lo kebii lyi. Ngiika dachañ ranyi mi henge giitolya. Nunuka agiñho aroh-aya dolyi diike.