JON KA AYAPUYU 5 - NITI GONTU N.T. (BSI)

Siipḛr Hoka Miipya niiñ

¹ Hiikahiibaho hiiko Jew atañka dituñ dotii, ho Jisu Jerusalem ho chatii.

² Siisi Jerusalem ho siipḛr kone dotii Siibuñ Hagya luniiñ aruñho, Hebrew ho hiimi Betzata ludu, hiika hii liirii liingohe giitii.

³ Hiiko abuje miyu achihnii dotii, micha, liicha, lukuñlamunii.

⁴ niimpalukoda Attoh ka miidopopi myodu ho siipḛr ho totii, ho yasie mi abyu dopa miitii, hujalopa kapyo japa daha talyi yasie ka abyu dalyi niihtañ achih mo giido jalo miipya kodatii.

⁵ Miyu kone hiiko dotii, hii hikhañhela nyampinye achih laka donii.

⁶ Mohmi Jisu kappa lala ho chintii mo hiiko ho anyañ abuje giila dotii hiila, mo mohmi lutii, “No miipya kona doha?”

⁷ Achih miyu mohmi lusitii, “Tonsḛrbo, ngiikii mi nyima ngiimika jolo niipa siipḛr ho yasie ka abyu chalyiho, ho ngo topa miihañ milo koneya ngiimi kapyoyapa togodo.”

⁸ Jisu mohmi lutii, “Gurito, niika pepu mi khebii kula, ho ingeku.”

⁹ Ho ohepada miyu hii hempyo datii, ho mo pepu mi khebii kula ho intiiku. Siisi hiika allo hii dumoalo tii.

¹⁰ Hopa Jew atañ miyu mi lutii hukiina hempyo tiikunii, “Siikasi dumoalo, siikasi miiju make niika pepu mika khebii niisi.”

¹¹ Hojalo mo mohlumi lusitii, “Ngiimi ka miipya bo miyu ngiimi lune, ‘Niika pepu mi khebii kula ho ingeku.’”

¹² Mohlu mohmi takatii, “Huna hiika miyu niimi ka, ‘Pepu mi khebii kula, ho ingeku luniibo’?”

¹³ Siisi hiika miyu humina miipya tiinii chimatii hu hiika hii hiila, niimpalukoda Jisu insa giitiiku hiiko miyuabuje dalyinii.

¹⁴ Dahidamo lala, Jisu mohmi piniiude ho kappa biido, ho mohmi lutii, “Kato, no aya dokuke! Ho hiira ingyamiigya kulya yo, hiila makoda ayamaya pa niiko lyiko diike.”

¹⁵ Hiika miyu intiiku ho Jew atañmi lukotii hiika hii Jisu ke mohmika miipya bo.

¹⁶ Ho hiipa Jew atañ Jisu mi miihimiire tii, niimpalukoda mo siika simi dumoalo ho miitii.

¹⁷ Hojalo Jisu mohlumi lusitii, “Ngiika Aba siisijalo miilado, ho ngo miiladu.”

¹⁸ Siika sipa Jew atañ uroyaya metii mohmi mendu pa hiila, niimpalukoda mo dumoalo mi kontii muduloma, hiikahaho ho Pinii mi mohka Aba hiila lubiidola hiila, attohmi Pinii kalyañ miisuda.

Oho ka Otority

¹⁹ Jisu mohlumi lutii, “Jijeloda, jijeloda, ngo nunumi lukosa, Oho mo attoh pa hang miila kema, hojalo Aba niihna miidonii hiimi kala lala kontiisii; niimpalukoda niijalo mo miido, hiimisii Oho miisu danii hii chulipa.

²⁰ Niimpalukoda Aba Oho mi hendo, ho mohmi kakiñda hikha mohka miiniiñmi; ho kayeya miigo atañmi mo mohmi kakiñ kendo, nunumi kapuñtale dopa.

²¹ Niimpalukoda niihtañpa Aba shiinii mi turdopa miido ho mohlumi sango bido, hiichulipa Oho tiirḛ sango bido humina mo bina donii.

²² Aba kone mitrḛ haliima, hojalo hikha ayakacho kasa niimi Oho mi bitii,

²³ niimpalukoda miilañ rumi Oho mi khiike nendupahiila, Aba mika mohluka khiichañ ho. Hii huna Oho mi khiima nii hii Aba mitrḛ khiima mohmi huna kiiniñ tiinii.

²⁴ Jijeloda, jijeloda, ngo nunumi lukoso, hii huna ngiika aguñmi tadonii ho mohmi henje donii ngiimika kiiniñ bomi, mohko santḛrlamanii sango do; mo ayakacho kako ahkiñma, hojalo shiigo mi impo biila sango ho daku.

²⁵ “Jijeloda, jijeloda, ngo nunumi lukoso, myodu hii ahlyi ke, ho siisi ke, niidana shiinii atañ Pinii ka Oho aguñmi tapa talyinii, ho hutiina tapa talyinii sankiñdo.

²⁶ Niimpalukoda Aba kii sango do mo atohko, hiichulipa mo Oho mi bitola do sango mo attoh ko dopa,

²⁷ ho mohmi otority mi bitola do ayakacho kaniipa, niimpalukoda mo miyu ka Oho.

²⁸ Siimi tala la kapuñtale nyayo; niimpalukoda myodu hii ahlyike niidana hikha hutiina byuh ho donii mohka aguñmi tapa nyakiñdo

²⁹ ho linya kendo, hutiina aya miigo miinya tiinii, turiturku niika sango dalyi, ho hutiina diimmah pa miinya tiinii, turiturku kendo ayakacho kako dupa.

Jisu mika Haki Biniiñ

³⁰ “Ngo ngiika atoh otority lo hang miila kema, ngo niihtañpa tapado, ngo hiitañpa ayakacho kadu; ho ngiika ayakacho kaniiñ hii kadikoke, niimpalukoda ngo ngiika henko ho mema hojalo mohka henkoho huna ngiimi kiiniñ tiinii

³¹ Ngo matiirḛ attohmi haki bisu dokoda, ngiika pyakonii hii jijema;

³² koneya da huna ngiimi haki bidonii, ho ngo chindo mohka ngiipaka pyakobiniiñ hii jije hiila.

³³ Nunu Jon mi kiiniñtii, ho mo jijemi haki bitii.

³⁴ Si ngo miyu ka pyakoniimi lariido hiilamake; hojalo ngo simi ludu niimpalukoda nunumi lyangur kiine dupa.

³⁵ Mo tila dotii, ho byonii muru ke, ho nunu talii nyado ichuche hempyo dupa mohka hutoh ho.

³⁶ Hojalo ngiiko hoka pyakonii donii hii Jon kiimi hentola kahe yake; Aba ka ngiimika miigo miipe dopaka biniiñ hii, siika ngiika miigo miiniiñsi, ngiimi haki bido, ngo Aba loka kiiniñ koniiñ hiila.

³⁷ Ho Aba huna ngiimi kiiniñ tiinii mo loda ngiimi haki bitii. Mohka aguñmi nunu ronge hetḛr tapa make, mo niihtañ hiimi nunu ronge hetḛr kappa make;

³⁸ ho nunu mohka aguñmi nunuko atiima, niimpalukoda nunu mohmi henjema humina mo kiiniñ tiinii.

³⁹ Nunu piniipota mi medo, niimpalukoda nunu hendo hiiko santḛrlamanii sango do hiila; ho hiika atañke ngiipa haki bitiinii;

⁴⁰ hojalo nunu ngiiko ahdupa taliinyama nunuko sango mi giidupa.

⁴¹ Ngo miyu atañka assañdiilañ mi larii make.

⁴² Hojalo ngo chindo nunuko Pinii ka heniiñ hii nunuka ura ho nyima.

⁴³ Ngo ahdu ngiika Aba ka armyañ pa. ho nunu ngiimi larii nyama; koneya matiirḛ mo attoh armyañ pa ahdo koda, mohmi nunu larii kendo.

⁴⁴ Niihtañpa nunu henje lakiñdo, huna kone anyañ ka assañ niimi larii siila ho Pinii kokiika assañdiilañ ahnii miya menya mapa?

⁴⁵ Hiila heyo ngo nunumi Aba ka agiñho haliido hiila; si Mose ke nunu mika haliibo, huko hona nunu nunuka hentiñ mi atii donii.

⁴⁶ Nunu matiirḛ Mose mi henje dokoda, nunu ngiimi tiirḛ henje kendo, niimpalukoda mo ngiika piigo mi ketii.

⁴⁷ Hojalo nunu matiirḛ mohka keniiñ mi henje makoda, niihtañpa nunu ngiika aguñmi taje talyi?”