JON KA AYAPUYU 12 - NITI GONTU N.T. (BSI)

Jisu Mi Betany Ho Arrḛyartii

¹ Impobiiniiñ dituñ ka allo lokhe dorañpa, Jisu Betany ho ahtii, nohna Lajaras dutiinii, humina Jisu shiinii mi turdopa miitiinii.

² Hiiko mohlu mohpa alyiñapiñ diidupa miimyo bitii; Marta miihotii, ho Lajaras diitananii hoka mo agiñ ho dubo nii konetii.

³ Mary hempḛr khiiniiñ hang miiyomanii nard kutu mi jola lala ho Jisu ka alih ho arrḛyartii ho mohka alih mi mohka adiñdimu lo nyupa biido; ho ude ho poteje kutu ka naru nempyo sula dotii.

⁴ Hojalo Judas Iskariot, mohka henjeajiñ atañ hokii kone (mo huna mohmi talubalo kentiinii), lutii,

⁵ “Niimpayu siika kutu mi lahiñhe denariipa pyula lala ho arromiyu mi bimapa?”

⁶ Siimi lutii, mo arromiyu mi henado hiilamapa hojalo niimpalukoda mo diipyonii, ho mohko tiicko bako dosu lyiniiñ mo hoka aliinii hokii lala lyitii.

⁷ Jisu lutii, “Mohmi kahpa siito, mohmi simi atii biike nento ngiimi alie lyi allo hopa.

⁸ Arro miyu kiirañ nunuka agiñ ho dalyi diike, hojalo nunu kiirañ ngiimi dagii kemake.”

Lajaras Mika Rhuniiñ

⁹ Hempḛr miyu taro Jew atañ hokii mo ho da hiila chimpa lala, mohlu ahtii, Jisu ka piigo kontii pama pa Lajaras mitrḛ kadu pa hiila, humina mo shiinii mi turdo pa miitiinii.

¹⁰ Hopa nyibu burii atañ Lajaras mitrḛ mendu pa hemmyo tii,

¹¹ niimpalukoda mohka piigopa abuje Jew atañ impa nyatii ku ho Jisu mi henje la.

Jerusalem hoka Ahniiñ

¹² Allo lohe yaho hempḛr miyu taro hutiina dituñ soko ho ahtiinii Jisu Jerusalem ho ahla do hiila tapatii.

¹³ Hopa mohlu pam sannii ka halloh mi tarbiila mohmi kapa dupa agoho linyatii, gyubii dola, “Hosana! Lyanko kendo hii huna Attoh ka armyañ pa ahdonii, Isrel ka Radde tiirḛ!”

¹⁴ Ho Jisu gadoh gapho dore kappatii ho hiiko dutii: hiila ketola dotii,

¹⁵ “Biisoyo, Zayon ka wiinga; kato, nunuka radde ahdoke, gadoh gapho ho dula!”

¹⁶ Mohka henjeajiñ atañ kapyoho siimi tadḛrlama tii; hojalo Jisu mi assañdiilañ kukele, ho mohlu hemparido siika keniiñ si mohmi ketii ho mohpa miitii.

¹⁷ Miyu abuje danii atañ hakibitii Lajaras mika byuh hokii ka agoho mohka gyoliñ lala ho shiinii mika turdo miiniiñmi.

¹⁸ Niimpa miyuatañ mohmi kapa dupa intii lukoda mohlu tapatii mo siika kagiñnanii mi miitii hiila.

¹⁹ Parisi atañ ho lutii kone anyañmi, “Nunu kato nunu hang miila kema; kato, dohadolo si mohmi imbo monya lyi.”

Grik Tange Jisu Mi Medo

²⁰ Siisi dituñ hoka herii dupa ka ahnii atañ tange hii Grik tii.

²¹ Hopa hiika atañ Pilip ko ahtii, Galili daka Betsaida hokiitii, ho mohmi lutii, “Tonsḛrbo, ngunu Jisu mi kapa nando.”

²² Pilip intii ho Andrew mi lukotii; Andrew Pilip agiñho intii ho mo anye Jisu mi lukotii.

²³ Ho Jisu mo anye mi lusitii, Myodu si ahdoku miyu ka Oho mi assañdiilañ dupa.

²⁴ Jijeloda, jijeloda, ngo nunumi lukoso, nii dahepa emmo elyañ kiiddi ho liihi tama ho shiitema, hii kontiisii dokañ siidunii; hojalo hii matiirḛ shiido koda, hiika hii abuje ahee hidu.

²⁵ Hu attoh ka sango mi abyo siido hii alyu siidu, ho huna attoh ka sango mi siika dohadolo so hempa siidonii hii santḛrlamanii sango pa dokiñdo.

²⁶ Hujalopa matiirḛ ngiimi miihotalyi, mo ngiimi imbo monkiñdo loda; ho noh ngo da, hiiko ngiika miira tiirḛ dakiñdo; hujalopa ngiimi matiirḛ miihotalyi, Aba mohmi khiikiñdo.

Jisu Mohka Shiisanii Piigo Mi Ludo

²⁷ Siisi ngiika yallo si ahiaredo. Ho niihiila pe ngo luchinii? Aba, ngiimi siika myodu sokii lyangur pe? Ma, siika piigopa ngo siika myodu so ahdu.

²⁸ Aba, niika armyañ mi assañ diilañto. Ho dariiganda hokii aguñ gonge luliñtii, “Ngo hiimi assañdiilañ tiikuke, ho hiira ngo hiimi assañdiilañ talyi.”

²⁹ Miyu abuje danii atañ hiimi tapa biido ho lutii si yapuñ ke gendo nii. Tange lutii, “Miidopopi mohmi luriida.”

³⁰ Jisu lusitii, “Siika aguñ nunu pake lindo nii, ngiipa make.

³¹ Siisi ke siika dohadolo mika ayakacho kadu, siisi siika dohadolo mika sangii bomi mompa kendo;

³² ho ngo, niida ngiimi kiiddiapiñ sokii yucha talyi, hikha miyu atañmi ngiiko selii giichi.”

³³ Mo siimi lutii kakiñ dupa hiila niihtañ shiiju pana mo shiikiñ donii hiila.

³⁴ Miyuabuje danii atañ mohmi lusitii, “Ngunu dapo ho tapa to Kristo ayu dahepa dukiñdo hiila. Niihtañ pa no ludu miyu ka Oho mi yucha kendo hiila? Hu siika miyu ka Oho?”

³⁵ Jisu mohlumi lutii, “Hutoh si nunuka agiñ da ichu chesuke dasutalyinii. Into nii dahepa nunuko hutoh do, hiilamakoda kamosi nunumi miipu biichi ke; huna kamo ho indo nii chinsu make mo noh indo hiila.

³⁶ Nunukoka hutoh dorañ ho, hutoh mi henjeto, nunu hutoh ka oho atañpa lyidu pa.” Jisu siimi luku lala, mo intiiku ho mo attoh mi mohluko hokii achih giitii ku.

Henjemanii Miyuatañ

³⁷ Mo abuje kagiñnanii mohluka hataho miibii siine, hojalo mohlu mohmi henje nyama;

³⁸ siikasi nyibuhenii Aijaya ka keto laka doniimi lyipe kiine dupa: “Attoh, hu ngunuka luko niimi taje kendo, ho humi Attoh ka lapo hii kakiñ kendo?”

³⁹ Hopa mohlu henjelama tii. Niimpalukoda Aijaya hiira lutii,

⁴⁰ “Mo mohluka amee mi micha dopa miitii ho mohluka ahha mi alḛr dopa miitii, hiila makoda mohlu mohluka amee lo katiido ho mohluka ahha hela tiido, ho ngiiko anyañ tiido mohlu miipya kodupa.”

⁴¹ Aijaya siimi lutii niimpalukoda mo mohka tatukatu mi kappatii ho mohmika luniiñmi.

⁴² Hiilamapa abuje otority atañ tiirḛ mohmi henje nyatii, hojalo Parisi atañ mika biisomi mohlu hiimi khako matii, hiila makoda mohlumi sinagog hokii agoho nempa linkiñdo:

⁴³ niimpalukoda mohlu miyu ka assañ niimi uro yapa hemi lyado Pinii ka assañ niimi hentola.

Jisu Aguñ Atañ Loka Ayakacho Kanii

⁴⁴ Ho Jisu gyuritii ho lutii, “Huna ngiimi henje nyadonii, ngiimi henje make hojalo hiimi ke huna ngiimi kiiniñ tiinii.

⁴⁵ Ho huna ngiimi kado nii mohmi kado huna ngiimi kiiniñ tiinii.

⁴⁶ Ngo hutoh pa lyila dohadolo so ahdu, niimpalukoda hujalopa ngiimi henjetalyi kamo ho duku madopa.

⁴⁷ Hujalopa ngiika kolobiisie mi matiirḛ tapa lala ho hiimi atii biima koda, ngo mohmi ayakacho kalii make; niimpalukoda ngo dohadolo so ayakacho kapa ahma hojalo dohadolo mi lyangur dupa.

⁴⁸ Huna ngiimi khiipa donii ho ngiika kolobiisie niimi, halii tiiku; ngiika aguñ luniiñ hii mohmi halii kendo kami allo ho

⁴⁹ Niimpalukoda ngo ngiika attoh otority la lusuma; Aba ngiimika kiiniñbo mo loda ngiimi lujubiniiñ mi bitii nii lusanii ho nii lukiñdo.

⁵⁰ Ho ngo chindo siika lujubiniiñ so santḛrlamanii sango do. Ngo nii luchi, hopa, ngo ludu Aba ka ngiimika lunge luniiñmi.”