JEMS 5 - NITI GONTU N.T. (BSI)

Mingo Mika Luluñniiñ

¹ Ahto siisi, nunu mingo atañ, kheto ho haru hemmyoto miliñdorso nunukoka ahsa niipa.

² Nunuka mingo atañsi yala do ho nunuka pulyetarii mi tagyu diija biido.

³ Nunuka ayyiñ la rupu nyimi harti abiido, ho hiika atañka harti hii nunumi chekho giiniika katiñ naniiñpa lyikiñdo ho nunuka ayya mi diikiñ do yamu chitañpa. Nunu alḛrdrih atii tiikuñ biisudo kamikalo allopa.

⁴ Kato, kheniiñ nyoniiñ atañka injo huna niika aji mi pidonii, nii mina no bimapa atiibiidonii miisimiipiñ biila, gyunyado; ho amoo pinii atañka gyuniiñhii Atoh ka yaroo ho chachido.

⁵ Nunu kiiddiapiñ so pepolelo ho hempyopa sanyada; nunu nunuka ahha mi hudopa miibii nyada membilyi allo hopa.

⁶ Nunu halii biine, nunu denki miyu mi membiine; mohlu nunumi latrḛ siimatii.

Pigiinii la Kuniiñ

⁷ Ahhakeyiñ nyato, hopa, anubarmii atañ, Attoh ka amiñ dayemi. Kato, aji miinii atañ kalya nyadu khiiniiñ ahee kiiddiapiñ hoka hiliñ niimi, ahhakeyiñ la kalya biilyadu nii dahepa nyibya ho kami paka miido huniiñ hii hutema.

⁸ Nunu tiirḛ ahhakeyiñ to. Henjugiito nunuka ahha mi, niimpalukoda Attoh ka ahsa kuniiñ tunii dokuke.

⁹ Budubude nyayo, anubarmii atañ, kone anyañmi chekho siila, nunu halii koma dopa, kato, ayakacho kaniibo alyeh si daku.

¹⁰ Heruheniiñ la pigiiniimi lutiñ nanii pakoda, anubarmii atañ, nyibuhenii atañmi lutiñ lanto hutiina lunya tiinii Attoh ka armyañ pa.

¹¹ Kato, ngunu mohlumi hempyo hiila gyodu hutiina ranttiniinii. Nunu Job ka rantiniimi tapa tiido, ho nunu Attoh ka piigo mitrḛ kapa tiido, niihtañpa Attoh arohne ho aroh tii.

¹² Hojalo urojapa, ngiika anubarmii atañ, hemme lyayo, dariiganda malo kiiddiapiñ malo khiibe hemme heta nala, hojalo nunuka ḛh hii ḛh ho nunuka ma hii ma, niimpalukoda nunu haliikoho huhi madopa.

¹³ Nunuka punko mi heru nyado peha? Mohmi kuke nento. Mi kone hempyo domilo? Mohmi assañ niika biisie siike nento.

¹⁴ Nunuka punkoho mi achihnii dupeha? Mohmi gyoliñkonii hoka amiabañ mi gyoke nento, ho mohlumi mohpa kubi kiineto, mohmi kutulo arrḛyarbiidola Attoh ka armyañ pa;

¹⁵ ho henje biido laka kuniiñ hii achih miyu mi hempyo giikiñ doke, ho Attoh mohmi seri kendoke; ho mo matiirḛ ingyamiigya tiikoda, mohmi hello kendoke.

¹⁶ Hopa nunuka ingyamiigya niimi kone anyañ khako siitoku, ho kone anyañpa kuto, niimpalukoda nunu miipya kodupa. Denki miyu ka kuniiñ ho anouro harchichike giidoke hiimi miipya naniipa.

¹⁷ Elija ngunu chitañ miyu konesii ho mo hempḛr uropa kutii miido huma dopa, ho danyi nyahiñ hela piilo barkhe kiiddiapiñ so miido humatii.

¹⁸ Ho hiira mo kutii ho yapuñ hokii miido hutii, ho kiiddiapiñ so ahee-amḛr hiliñ tiiku.

¹⁹ Ngiika anubarmii atañ, nunuka punko hokii matiirḛ kone ngodo koda jije hokii ho mi kone matiirḛ mohmi ahkur giido kukoda,

²⁰ mohmi chinke nento hujalo ingyamiigyanii konemi mohka miigyanii lembo hokii ahkur giichi mohka yallo mi shiisa nii hokii lyangurtii ho abuje ingyamiigyanii atañmi lapu biido.