JEMS 4 - NITI GONTU N.T. (BSI)

Dohadolo mika Ajiñnii

¹ Nii hii gyambo pasugiidu, ho nii hii pasugiidu nunuka punkoho? Nunuka helyihembyo hiima siipeha nunuka hakhu ura ho gyambo pasula donii?

² Nunu hemmi siido ho pala ma; hopa nunu mendo. Ho nunu hemikami do ho iche hetrḛ pala ma; hopa nunu pasudo ho gyambo paliñgiido. Nunu pala ma, niimpalukoda nunu kuma.

³ Nunu kusudo ho bikonyama, niimpalukoda nunu kukha la kudo, nunuka helyihembyo ho sona nandupa hiila.

⁴ Lotiimanii pukonii atañ! Nunu chimapo dohadolo mika ajiñ niisi Pinii ka ahha-banii pa lyido hiila? Hopa hu jalopa dohadolo mi ajiñ talyi hii atohmi Pinii ka ahha-banii pa miisu do.

⁵ Malo nunu hiila henduha siikasi piigo ama piniipota ka luniiñsi, “Mo kariñsiiniiñ mi laliitii yajiyallo ho nii mina mo ngunuko dubo dopa miitiinii”?

⁶ Hojalo mo abuyapa aroh-aya mi bitii; hopa siikasi ludo, “Pinii hentii siiniiñmi kamake, hojalo yanu mi aroh-aya mi bidu.”

⁷ Atohmi Pinii ko tiilii siibito. Miitḛr siito igiimi ho mo nunu kokii hargii kendoke.

⁸ Pinii ko ahdeto ho mo nunuko ahde kendoke. Nunuka alah mi harsuto, nunu ingyamiigyanii atañ, ho nunuka ahha mi darii miito, nunu lyonye paka miyu heniiñ atañ.

⁹ Herunyato ho haruhenyato ho khenyato. Nunuka ngarniiñmi herunyato ho nunuka hempyo saniimi moyonyato.

¹⁰ Attoh ka hataho atohmi yanu giito ho mo nunumi jotu kendoke.

Koneanyañ mika Halii niimi ka Luluñnii

¹¹ Kone anyañmi anyamapa lusu nyayo, anubarmii atañ. Mo huna anubarmii mi ayamapa ludonii malo haliidonii mohka anubarmii mi, dapo mi chekhola ayamapa ludo ho dapo mi haliido. Hojalo nunu matiirḛ dapo mi halii dokoda, nunu dapomi miiniipa lyima hojalo haliinii.

¹² Hiiko ho dapo binii konesii ho haliinii, mo huna lyangur lakiñdonii ho miidu lakiñ donii. Hojalo nunu hu nunuka ariapii mi haliinii?

Khansu niimika Luluñnii

¹³ Ahto siisi, nunu huna ludonii, “Siilo malo arda ngunu hiiko insa ho hiitañ taunho ho anyañ nyange ho dasa ho kiirimiisa ho paser miiliñ biisa”;

¹⁴ hiilalusu dono nunu arda nii lyikiñdo chima. Nunuka sango hii nii? Nunu hapiñ sii ichuche myodupa linte hela ho lyuda siido ku.

¹⁵ Hiilamapa nunu hiilaya lukiñdo, “Attoh ka henko dolyi milo, ngunu so sanchi ho ngunu siimi ho hiika hiimi miichi.”

¹⁶ Siika sitañpa, nunu khansu nyada nunuka hentii siiniiñho. Hikha siika khansu niisi diimmah ke.

¹⁷ Hujalopa chindo niihna miidi konii ho hiimi miima koda, hiipa hiika hii ingyamiigya niike.