JEMS 3 - NITI GONTU N.T. (BSI)

Allyo

¹ Nunu abuje sariipa lyilya yo, ngiika anubarmii atañ, niimpalukoda nunu chindo huna tonsḛr donii hiimi uroyapa ayakacho kakiñ doke.

² Niimpalukoda ngunu abuje miikha nyadu, ho hu jalopa matiirḛ miikha miika ma mohka luniiñ ho hii digoabiaya miyu ke, hikha atoh apo mitrḛ kagur siila kendo.

³ Ngunu matiirḛ gora ka aguñ ho taru holii lado koda mohlumi ngunu luniiñ tadopa, ngunu mohka hikha apo mi sorbii lado.

⁴ Yasie jaji atañ mitrḛ kato; hiika hii hiimkane kahe siido tiirḛ ho hempḛr uro allyi lo hebii kosudo, hiika atañmi hempḛr khona nanii atu khohe lasu raduñ giisu donii khogiibo no hiimi khogii nando.

⁵ Hopa allyo hii atu hakhu konesii ho kaye drih atañmi khana nandu. Niimkane morey kaye siijalo hiimi yamu atu khohe la hompa lado!

⁶ Ho allyo si yamu ke. Allyo si ingyamiigya dohadolo ke ngunuka hakhu agiñho giibonii, hikha apo mi miibḛr giila, yamu tiiliido dumiñ henju atañ ho, ho yamu tiilii do yamuganda hokii.

⁷ Niimpalukoda kapane achu-amyo la piita, tabutiyyo ho yasie hoka achu-amyo danii, atañmi sula kendo ho miyuatañ subii lakiñdo,

⁸ hojalo miyu kone hetrḛ allyo mi atiñ siila kema, dumomanii diimmah, poteje shiigiinii iimmyo giitola.

⁹ Siika silo ngunu assañdu Attoh la Aba nyimi, ho silo ngunu miyu atañmi bedu, humina putiinii Pinii chuli dopa.

¹⁰ Aguñ gongelo lyaniiñ la beniiñ nyimi luliñdo. Ngiika anubarmii atañ, siimi hiila miikiñma.

¹¹ Yasie shoo kone hokii darii yasie la alhotihi yasie huliñ dupeha?

¹² Tarro sannii hii, ngiika anubarmii atañ, olives ahee hila kendo peha, malo rosannii hii tarro ahee hila kendo peha? Hiichulipa alho tihi yasie hokii darii yasie lila kema.

Ayoh Hokii ka Chila

¹³ Hu chila ho chiniiñ nunuka punko hokii? Mohka denki sanjulo mohka miigo miiniiñmi kakiñ kiineto chila ka chimeeñyanu lo.

¹⁴ Hojalo nunuko matiirḛ kochi kariñ giido koda ho henchi hehi henju nunuka ahha ho giido koda, khansu nyayo ho jije mi amuh dopa miiyo.

¹⁵ Siika chila si ayoh hokii tomake, hojalo kiiddiapiñ kiike, yajiyallo giimanii, igii kokii ke.

¹⁶ Niimpalukoda noh kariñ ho henchi hehi henju lindo, hiiko chekho siikiñdo ho kapane ayamanii muju hii do.

¹⁷ Hojalo ayoh hokii ka chila hii kapyo japa darii, hiikahiibaho chimie, yanu, luniiñ taliinii, poteje aroh ho aya ahee atañ, heriñkariñ giima malo lyolyichochi nyima.

¹⁸ Ho denki ka amoolasa niimi chimie ho alie tii hutiina chimie dopa miigiidonii.