IPISIA 6 - NITI GONTU N.T. (BSI)

Himme La Annii-aba Atañ

¹ Himme atañ, annii-aba ka luniiñmi tato Attoh ko, niimpalukoda siikasi miidi koke.

² “Nunuka annii-aba mi khiito” (siikasi kapyo japa ka lujju biniiñ ke hemme binii ka agiñho),

³ “niimpalukoda nunuka agiñho aya kiine dupa ho nunu kiiddiapiñ so sankañ dupa.”

⁴ Aba atañ, nunu himme atañmi hadii dopa luhuluha yo, hojalo mohlumi luniiñtado pa sucha to ho Attoh ka lukoho.

Miira la Attoh atañ

⁵ Miira atañ, denkipa luniiñ tato nunuka kiiddiapiñ ka attoh atañka luniiñmi, biiso ho alye biidola, ahha puhe pa hembiidola, Kristo mika henchañho;

⁶ amee kata ho aya miichi hiila miimapa, miyu mika hempyo miipa pamapa, hojalo Kristo ka miira atañ hiilyañ, Pinii ka henko jaho ahha hokiila miito,

⁷ aya henju ho hembiidola miigomi ayapa miito Attoh mika miiho donii hiilyañpa miyu mimapa,

⁸ chimbii dola niijalo miyu aya miigo miichi, mo hii chulipa Attoh kokii lakur kendoku hiila, miirajalo malo dasḛr miyu jalo.

⁹ Atoh atañ, mohlumi tiirḛ ahiñpa miito, ho luluñ niimi apato, chimbii tola mo huna anye ruka Attoh nii hii dariiganda ho du hiila, ho hiiko hang khiingu khiire mohko nyima.

Hikha Pinii ka Gyambo Panananii Dankho panyi

¹⁰ Kamijapa, Attoh ko alḛrpa dato ho mohka harchichikelo.

¹¹ Hikha Pinii ka gyambo panananii dankho panyi mi giito, niimpalukoda nunu igii ka miikiñcho hiila ka heniiñmi datrḛ siidupa.

¹² Niimpalukoda ngunu asiialyo la ai nyimi cherii make, hojalo igii atañ mike, tamo atañmike, siika siilobiilyo ka dohadolo mika sangiinii atañ mike cherii dunii, diimmah yajiyallo ka atoh atañmi dariiganda ka lengo hoka dunii atañmi.

¹³ Hopa hikha Pinii ka gyambo pana naniiñ dankho panyi atañmi giito, niimpalukoda nunu diimmah allo ho datḛr siina naniiñpa, ho hikha miija kula la, daladopa.

¹⁴ Hopa gurito, niika giigya mi jijelo apu giito, ho denki mi habyañsiitiñ naniiñpa,

¹⁵ ho nunuka alih ho luku mi giito chimie ka ayapuyu mika luna naniiñmi;

¹⁶ siika atañka hiiba ho, henje ka siitiñ mi jobiitola, niilona nunu byomi lakiñ donii hikha diimmah ka yamu-miilyo tiilii niimi.

¹⁷ Ho sangopyako ka dachañ byopami, ho Yajiyallo ka ilyomi, niihna Pinii ka aguñ nii.

¹⁸ Kiirañ kuto lya Yajiyallo ho, hikha kuniiñ ho arohtapa paka kuniiñ agiñho. Kami lyihepa pigii biidola alḛrpa datolya, hikha piniimiyu atañpa arohtapa kubi tolyo,

¹⁹ ho ngiipa tiirḛ, hiika luliñ niimi ngiimi bitii ngiika aguñmi gonko dalyi haropa michilamanii ayapuyu mi gyuko dopa,

²⁰ ngo ayapuyu ka nyibotubulyañ ke hiipa patiihtunko tola du; hiimi ngiimi haro biidola luko ladopa, ngiika lusaniimi.

Kamijapa Ayahelyi

²¹ Siisi nunu tiirḛ chinkiñdo niihtañ ngo ho nii ngo miido, Tychicus heniiñja anu ho lotii Attoh koka miigomiinii nunumi luko kendoke hikha drihmi.

²² Ngo mohmi nunuko kiiniñ biilyi ke siika piigo lodapa, nunumi chinke nendupa ngunu niihtañ hiila, ho mohmi nunuka ahha mi haro lupa kiine dupa.

²³ Anubarmii atañmi chimie, ho hensunii henje ka agiñho, Pinii Aba kokii ho Attoh Jisu Kristo kokii.

²⁴ Aroh-aya dokiñcho hikha ruko hutiina ngunuka Attoh Jisu Kristo mi hendonii ayudahepa.