IPISIA 2 - NITI GONTU N.T. (BSI)

Shiiniiñ Hokii Sango

¹ Ho nunumi mo turdo miitii, nunuka shiila ka doniiñ hokii pallenii la ingyamiigyanii atañ ho

² niihona nunu ronge ila datiinii, siika dohadolo ka henju ho imbo laka doho ho, ho yapuñ ka raddewiinga ka harchichike ka kiiliñ ho imbola dane, yajiyallo siisijalo miigo miila do luniiñtamanii oho atañ ko.

³ Siika atañka punkoho ngunu hikha ronge sambola dato ngunuka asiialyo ka hembyokabyo ho, asiialyoho ahha ka henju ho imbomola, ho hopa ngunu henju hokii hadii ka himme atañpa lyito, hikha khiibemiyu atañ hiilyañ.

⁴ Hojalo Pinii, huna aroh ho mingo donii, hempḛr hensunii hokii mohka ngunu mihka hennii,

⁵ ngunuka shiila ka doho ho ngunuka pallenii hokii, ngunumi turdo miitii Kristo ka agiñho (aroh-aya loke nunumi lyangur tiinii),

⁶ ho ngunumi seri tiiku mohka agiñho, ho ngunumi mohka agiñho dariiganda ho dubo dopa miitii Jisu Kristo ko,

⁷ niimpalukoda ahlyi niika santuñ ho mohka khiikolamanii aroh-aya helakala ka mingo mi ngunumi kakiñ dupa Kristo Jisu ko.

⁸ Niimpalukoda nunumi aroh-aya loke lyangur tiinii henje kiilo; ho siikasi nunuka atoh miisu niima ke, siikasi Pinii ka ahmiñayiñ ke,

⁹ miigo miiko hopa make, hopa miyu kone hetrḛ khansu kema.

¹⁰ Niimpalukoda ngunu mohka miigomiinii miyu, Kristo Jisu ko ayamiigo miinii paka puliñnii, nii mina Pinii kapyopa miimyo tiinii, hiiko ngunumi inke nendupa hiila.

Kristo ko Konepa

¹¹ Hopa hengka nyato ronge nunu Midomiyu atañ asiialyoho, gyonya kotii mitupikomanii hiila mitupikoniilo, nii mina miitiinii asiialyoho alah lo,

¹² hengka nyato nunu hiika myodu ho Kristo kokii miipe tola done, Isrel ka halugiira hokii nempalinto la done, ahhe-siinii ka hemme nii atañka nyibo pa lyine, hang hentiñ nyimapa ho dohadolo so Pinii nyimapa.

¹³ Hojalo siisi Kristo Jisu ko nunu humina ronge hempḛr adho danenii ahgii tiiku aruñho Kristo ka ai kiilo.

¹⁴ Niimpalukoda mo ngunuka chimie, huna ngunumi anyerumi konepa miitii kunii, ho chesuresu laka tachetahe giinii tasi mi pyadu lotii ku,

¹⁵ mohka asiialyoho lapatii dapo hoka lujubiniiñ mila miiju atañmi, niimpalukoda mo mohko niti miyu kone puliñ dupa anye ka dasako, hopa chimie dopa miitii,

¹⁶ ho ngunumi yardiñ tiiku anye rumi Pinii ko apo konepa pogyañ kiilo, hiila miibiidola chesuresumi lume lotii ku.

¹⁷ Ho mo ahtii ho chimie ka ayapuyu mi tonsḛrkhenyo tii nunumi hutiina adho ho datiinii ho chimie kiineto hutiina aruñho danii;

¹⁸ niimpalukoda mo kiilo ngunu anyeru ahlado Yajiyallo konepa Aba ko.

¹⁹ Hopa nunu nyibo kumake ho lohelonye paka dulya niimake, hojalo nunu atoh ganda hoka duhiñ ahiñke piniimiyu agiñho ho Pinii udeka uru ahiñ kuke,

²⁰ liidi mi pentii ku kiiniñkonii la nyibuhenii nyiko, Kristo Jisu mo atoh loda siirañrantu pa dugiidola,

²¹ hukohona hikha ude hii pengi nando nii ho sancha da darii piniiude pa Attoh ko;

²² humina nunu mitrḛ puchatiinii hiiko Pinii Yajiyallo pa dugii nanko pa.