HIBRU 8 - NITI GONTU N.T. (BSI)

Jisu Ngunuka Bukuñ Nyibu

¹ Siisi drih niihna ngunu ludunii hii sike: ngunukii sitañ bukuñ nyibu du, kone huna dunii dariiganda ho Pinii raddeduko ka lahbi alah ho,

² dariinenchañ ho miihoniiñ ho jije tabyoude ho nii mina miyu pematii hojalo Attoh ka puniiñ.

³ Niimpalukoda koneabi bukuñ nyibu mi ahmiñayiñ ho membi niipa kahetii; hopa siika nyibu tiirḛ hang drih ako bidupa loda lyitii.

⁴ Siisi mo matiirḛ kiiddiapiñ so datii koda, mo pema nyibu pa lyidiima, niimpalukoda nyibu atañ danyada huna dapo hoka keniiñ chuli ahmiñayiñ bidonii.

⁵ Mohlu dariiganda ka dariinenchañ ka kapu ho yallo misu miilyañ mondonii; niimpalukoda Mose ka tabyoude mika pempa miilyiho, mo Pinii lo luko kotii, lubiidola, “Kato no kapane drihmi niimika putoo hoka kakiñniiñ hiilyañ jaho miito.”

⁶ Hojalo siikasi hiilatii, Kristo patii siika miihoniiñ simi niihna ano khiiniiñ yanii khu hemmesiiniiñ mi hentola, mohka lulyañluda niisi ayayado, niimpalukoda siikasi ayaya hemme niiho miigii biitii.

⁷ Niimpalukoda matiirḛ kapyo daka hemmesiiniiñ hang miigyanii giima tiikoda, anye nii bosimi anna dopa myodu lyikiñmatii.

⁸ Niimpalukoda mo mohluko ho miigya nii kappatii mohka hiila lulyiho: “Allo hii ahkiñ doke, Attoh lutii, niidana ngo niti hemmesiiniiñ miicha talyinii Isrel ka ude ho ho Juda ka ude ho;

⁹ ngiika mohluka aba atañka agiñ hoka hemmesiiniiñ hiilyañ mapa hiika allo ho niido hona ngo mohlumi alah lo sebii tonii mohlumi ingiila Egip ganda hokii agoho lingii lupa; niimpalukoda mohlu ngiika hemmesiiniiñ ho dakañ mane, ho hopa ngo mohlumi tage mato, Attoh ludo.

¹⁰ Siika sike hemmesiiniiñ ngiika Isrel ka ude agiñ hoka hiika allo atañka hiiba ho, Attoh ludo: Ngo ngiika dapo atañmi mohluka punyu ho atii talyi, ho mohluka ahha atañ ho kechi, ho ngo mohluka Pinii pa lyichi, ho mohlu ngiika miyupa lyikiñdo.

¹¹ Ho mohlu tonsḛr kema kone abimi mohluka ajiñmi malo kone abi mohluka anubarmii mi, lubiidola, ‘Attoh mi chinto,’ niimpalukoda miilañru ngiimi chinkiñdo, atujaho hokii khiiri biila kaheja lohe.

¹² Niimpalukoda ngo mohluka ingyamiigya miiju atañmi aroh talyi, ho ngo mohluka ingyamiigyanii atañmi henge giite kuma.”

¹³ Niti hemmesiiniiñ ho lusu dokoda mo kapyo mi gordu akuma lukiñdo. Ho niihna gordu akumanii ho khu dokunii hii lyupa kendoku.