HIBRU 7 - NITI GONTU N.T. (BSI)

Nyibu Melkizedek

¹ Siika Melkizedek, Salem ka radde, Akhoja Pinii ka nyibu, Abraham mi kappatii radde atañmi mentii hekula ahkurla doku kiile ho mohmi lyambiido;

² ho mohmi Abraham bibiido kapane hokii hakhualyañ hemi. Mo kapyo ja, mohka armyañ mika luko lusinii, denki ka radde, ho mo hiira Salem ka radde, hiika hii, chimie ka radde.

³ Mohkii aba malo annii malo ohoasi nyimatii, ho allo lotu malo sango ka kami allo tiirḛ, hojalo Pinii ka Oho kapupa mo dukañari nyibupa dutii.

⁴ Kato niimkane mo kahe! Abraham aba-apa akho jahii mohmi hakhualyañ hemi bitii gyambo pabiinii hokii.

⁵ Ho hiika Levi ka ohoasi atañ hutiina nyibu lyisi nyakiñ donii dapo ho lutola do hakhualyañ hemi miyuatañ kokii lakiñdo hiila, hiikahii, mohluka anubarmii kokii, mohlutrḛ Abraham ka ohoasi siijalo.

⁶ Hojalo siika miyu si mohluka aba-apa mika khiiko amasiitrḛ Abraham kokii hakhualyañ mi latii ho mohmi lyantii huko hona hemmeniiñ dotiinii.

⁷ Siika so chesudopa lyikiñma atuya kayeyalo lyankotii hiila.

⁸ Siikaso hakhualyañ mi shiila sanii miyu latii; hiikaho, kone humina pyakodonii mo turla da hiila.

⁹ Kone rongkoda hiila tiirḛ lunedo Levi mo atohloda, hakhualyañ mi labiine, Abraham kiilo hakhualyañ mi bikotii,

¹⁰ niimpalukoda mo siisi jalo mohka aba-apa ka harpuñ hokii tiirañ, mohmika Melkizedek ka kapa lyiho.

¹¹ Siisi matiirḛ digoabiaya dopa miiniiñmi Levi nyibu atañ kiilo miila siido koda (niimpalukoda hiika uraho miyuatañ dapo mi latii), niihpa hiika hahoho anna talyi koneya nyibu Melkizedek ka hiibaho, Aron ka kiiliñ hoya myammapa?

¹² Niimpalukoda noh nyibulyisa ko lyiguhdo, hiikaho lyiguhkendo loda dapo hiitiirḛ.

¹³ Niimpalukoda kone humina siika drih atañsi ludonii lukoda koneya halugiira hokii hiila, nohkiina kone hetrḛ yugyañ ho miiho la miimatiinii.

¹⁴ Niimpalukoda siikasi jijeloda ngunuka Attoh Juda ka ohoasi, ho hiika halugiira kii dalyi mi Mose hang nyibu atañka piigo mi luma.

Nyibu Koneya, Melkizedek Chuli

¹⁵ Siikasi uroyapa kadḛrdo niida koneya nyibu saritalyi Melkizedek ka kapupa,

¹⁶ huna nyibupa lyitii kunii, dapomiiju lujju ka luchamiichañ homapa, asiialyo hokii ka liniiñ mapa hojalo pyadulamanii sango ka harchichike hokii.

¹⁷ Niimpalukoda siikasi mohmi haki bitola do, “No ayu dahepa nyibupa dukiñdo, Melkizedek ka duchañ ho.”

¹⁸ Yoheyapa ludo koda, kapyo paka lujubiniiñmi lapa yatiiku niimpalukoda hiika ajju kopa ho piigo ama kopa

¹⁹ (niimpalukoda daposi hang ako mitrḛ digoabiaya dopa miimatii); yohe yapa ludo koda, aya ya hentiñ naniiñmi miiliñbitii, niilona ngunu Pinii ko ahde lakiñ donii.

²⁰ Ho hiikaho hemmeniiñ giima pa lyima.

²¹ Hutiina kapyo ho nyibupa lyinya tiinii mohlu hemme matii, hojalo siika konesi nyibu hiila myantii hemme niika agiñho, “Attoh hemme tii ho mohka henje mi hengu kema, ‘No ayu dahepa nyibupa lyikiñdo.’”

²² Si Jisu mi lyigiitii ayaya hemmesiiniiñ ka gyandimi chigii niipa.

²³ Kappyo ho nyibu atañ abuje dutii, niimpalukoda mohlumi lutiñ tiiku shiiniiñlo nyibupa dupe madopa;

²⁴ hojalo mo mohka nyibu lyiniiñmi biipela biitii, niimpalukoda mo lyikañ ari lyitii.

²⁵ Hiiko hopa mo hikha myodu ho mohlumi lyangur latii hutiina Pinii ka aruñho ahde tiinii mohko ahbiila, niimpalukoda mo kiirañ turla da mohlupa kubi dupa.

²⁶ Niimpalukoda siikasi ayado ngunupa sitañ bukuñ nyibu duniiñ si, darii, pahañhansa giimanii, miibḛrmanii, ingyamiigyanii atañ hokii ponsa miiniiñ, dariiganda atañmi haho yapa assañtii.

²⁷ Mo anna matii, bukuñ nyibu atañ hiilyañ, kiirañ membi nii, kapyopa mohka atoh ingyamiigyanii atañpa ho hiikahiiba ho miyu atañpa; mo siika atañmi ronge pada miida tii mo atohmika bipa siilyi ho.

²⁸ Jijelusu dokoda, dapo hii miyu atañmi kahetii mohluka ajju ho bukuñ nyibupa, hojalo hemme niika aguñsi, niihna dapo mi kami yapa ahtiinii, Oho mi kahetii humina miitiinii ayudahepa digoabiaya dopa.