HIBRU 6 - NITI GONTU N.T. (BSI)

¹ Hopa kiije ngunu chimpyo paka Kristo ka tonsḛrniimi atii lyartii kula ho hengḛr dalyi ya hata chasa, hiira miisamanii miigo hokii henkur niika liidi mi rammapa ho Pinii kii dalyi ka henje miya rasa,

² luko biidola baptisma piigomi, alah tencha niimi, shiinii ka turiturku kuniiñmi, lyulamanii ka ayakacho kaniiñmi.

³ Ho siimi ngunu miichi Pinii matiirḛ miidopa bilyi milo.

⁴ Niimpalukoda siikasi hiira miila kema henkurdopa humina ronge chindopa miitii kunii, huna dariiganda ka ahmiñayiñ mi henka tiikunii, ho Darii Yajiyallo mi larii tiiku nii,

⁵ ho Pinii ka aguñ ka aya mi henka tiikunii ho ahlyi nii santuñ ka tamo mi,

⁶ mohlu matiirḛ ho henje kuma pa khiibe pinii mi herii dokoda, mohlu hiira Pinii ka Oho mi mohluka atoh piigo pa ledabiido ho mohmi khiimapama miipa biido.

⁷ Niimpalukoda nii kiiddina miido yasie mi sadonii hiikohoka kiirañ huhi niimi, ho hamasanii lingiidu hiika atañpa hupana balyibalu miidonii, Pinii kokii lyarniiñ mi lariido.

⁸ Hojalo hiiko matiirḛ tiirḛ la morey tagurenso nyi chadokoda, hiika hii piigo ahma ho beko dopa lyikiñdo; hiika hiimi kamikalo ho hompa dopa sii lyikiñ siidonii.

⁹ Ngunu hiila lusu dojalopa, hojalo nunuka lugo ho, heniiñja, ngunu hendo jije aya ya drih atañ hii sangopyako hoke donii.

¹⁰ Niimpalukoda Pinii hensamiisa la nunuka miigo miiniiñmi kago kema ho nunuka heniiñmi mohkiipa piniimiyu atañ mika miiho niimi, siisi jalo nunu miila do.

¹¹ Ho ngunu hendo nunu kone abimi siika heniiñ ahiñ jami giikiñcho hendḛr rila hentiñ naniiñ ka hemme biniiñ mi kamikalo lohepa,

¹² niimpalukoda nunu mi bayyo bayyo dama dopa, hojalo katiñ nanto lya huna henje la pigiinii lo hemme niimi penko tiinii.

Pinii ka Jije Hemme Biniiñ

¹³ Niimpalukoda Pinii ka Abraham mika hemme lyiho, mohmi kayeya hemme hiita naniiñ nyima lyinii, mo atohmi hemme hiita nantii,

¹⁴ lubiidola, “jijeloda ngo niimi lyanchi ho niimi abu loda drihulo bukke nenchi.”

¹⁵ Ho hiila Abraham, yanupa kalyala dutii, hemme biniiñ mi kappatii.

¹⁶ Miyu atañ atohmika kahe yami hemme hiita nandu, ho hikha mohluka chesuresu ko mohluka hemmeniiñ hii kamikalo ludiñsiina naniiñpa lyidu.

¹⁷ Hopa Pinii mohka hemme niimika pensi kosa niimika kakiñ nala helyiho lyiguh lamanii henju mohka piigopa, mo hemme hiita nantii,

¹⁸ niimpalukoda anye lyiguh lasamanii drih do, nii mina Pinii gollu lamanii, ngunu huna siitiñ giidupa hiila hargii donii uro yapa haro kendo gatu biidupa ngunu hata hoka hentiñnanii doniimi.

¹⁹ Ngunu kii siika jije ho dokañsanii hatunanii yallo hii do, hentiñnanii do pulye ka kiiliñ daka heriiko doko lohe ahchi ladopa,

²⁰ nohna Jisu innenii ngunu kiipa impyo yala, bukuñ nyibupa lyila ayudahepa Melkizedek ka duchañ ho.