HIBRU 4 - NITI GONTU N.T. (BSI)

¹ Hopa, mohka hemme biniiñ dumo koka ahsa niihii dolya tii, kiije biisosa hiila makoda nunu ayakacho kakola hiiko ahchi lama pa miidii ke.

² Niimpalukoda ngunuko ayapuyu ahtii mohluko hoka ahchañ ho; hojalo mohluka puyu tapanii mohlupa piigo ahgii matii, niimpalukoda siimi henjelo tanii atañ tamatii.

³ Niimpalukoda ngunu hutiina henje donii hiika dumo ko ahkiñdo, mohka luniiñ chuli, “Ngo ngiika hadii ho hemme tii, ‘Mohlu pema ngiika dumo ko ahkiñ make,’” mohka miigo hii miija siitiikujalo dohadolo mika pulyi hokii.

⁴ Niimpalukoda mo ngoyakoneda hiila kanunii allo mi lune, “Ho Pinii dumo tiiku kanu allo ho hikha mohka miigo miiniiñ hokii.”

⁵ Ho hiira siika piigo mi mo lutii, “Mohlu pema ngiika dumoko ahkiñ make.”

⁶ Hopa siisi jalo tongepa dolya do hiiko ahke nendupa, ho hutiina lapyo pa lariitiinii ayapuyu mi ahla matii niimpalukoda luniiñtama kopa,

⁷ hiira mo allo loyeya atii bitii, “Siilo,” David kiilo lutii hempḛr abuje anyañ ka hiibaho, aguñ luniiñmi hiira lutila, “Siilo, nunu mohka aguñ mika tapa doso, nunuka ahha mi alḛr giiyo.”

⁸ Niimpalukoda Josua matiirḛ mohlumi hemmo dopa bitii koda, Pinii ludii matii loyeya allo mi.

⁹ Hiiko hopa, dumoalo hii Pinii ka miyu atañpa dumo allo pa lyitii;

¹⁰ niimpalukoda hu jalopa Pinii ka dumoko ahchi mohka miigomi dumo kendo Pinii ka mohka miigo hokii ka miichañ ho.

¹¹ Kiije ngunu hopa uropa miisa mohka dumoko ahdupa, kone hetrḛ mohlu hiilyañ luniiñtamapa nyila huhimaduha.

¹² Niimpalukoda Pinii ka aguñ si turnii ho chikhoke, ilyo lyogañ lyoro areh giinii mitrḛ areh yake, yallo la yajiyallo lohepa khache khahe miila do, loriiloko ho lochuñ lohe, ho heniiñmi ho ahha hoka miichi hiila heniiñ lohepa chilado.

¹³ Ho mohka hataho hikha pukonii kone tiirḛ achugiila kema, hojalo hikha rumi miiko tola arapa do mohka amee kata ho huka agiñ hona ngunu luko siido pa lyikiñ donii.

Jisu Kaye Bukuñ Nyibu

¹⁴ Hiiko hokiija ngunukii kaye bukuñ nyibu duku huna dariiganda mi impo biila intiinii, Jisu Pinii ka Oho, kiije ngunuka khako niimi khakañ ari khasa.

¹⁵ Niimpalukoda ngunuka bukuñ nyibu hiitañ make huna ngunuka ajjuho ngunumi kalyañ lakiñ manii, hojalo kone humina kapane drih ho tenka tiikunii ngunu mika tenchañ ho, hojalo hang ingyamiigya giimanii.

¹⁶ Kiije ngunu hopa hentiñ biidola aroh-aya ka raddeduko ho ahdesa, niimpalukoda ngunu aroh mi larii dupa ho aroh-aya mi kapa dupa hembyuñ kodupa anna myodu ho.